Rev. Gin Sawm Thang

“Tua hun laitakin gamlakah a tuuhonte a giahpih tuucing pawlkhat a om uh hi. Amaute kiangah Topa’ vantungmi khat hong kilang a, Topa’ minthanna vang in amaute hong taan ahih manin a lau mahmah uh hi. Ahi zongin vantungmi in, “Lau kei un. Mi khempeuh a lungdamsak ding thuthak hoih khat note a’ ding ka hong puak hi.” Luke 2:8-10

Jesuh hong suah laitakin Bethlehem khua kiim ah zaan aa tuu a cingte kiangah vantungmite kilangh cih a tunga laisiangtho mun ah kimu hi. Bang hangin amau banga mi nunniamte kiangah vantungmite va ki langh sese hiam? Leitungah a lungdam huai pen bang hi ding ahiam? Pasian mahmah leitung hong pai na pen I lungdamna lian pen hi ding hi. Pasian takpi mihing bangin hong piangin, nang le kei ading hong pai cih mawk pen I lungdamna a lian pen a hih ding nakpi takin thupi kasa hi.

Tua hun lai-in tulai mah bangin mi nam tuamtuam om hi. A hau a zawng a neu a lian…cih bangin om hi. A zenzen in kumpi pa kiangah vantungmi kilang hi leh, ama kam pan in Jesuh pen Judah kumpipa hi, ci leh, mitampi takin Jesuh nung zui ding hi. Aih  hangin, kilangh lo hi. Herod lungtang puak en ni. A lungtang puak manlo hi. Judahte’ kumpipa hi ding hi, cih ahihmanin Herod in Jesuh that ding a sawm pah hi. Tua manin, mipilte kiangah ahi zong, Joseph kiangah ahi zong, Pasian in Herod kiangpan a gamla ah a tai ding uh hilh khol hi. Mithanna, za khawng I iplah leh, hih nopna hong tung lo ding hi. Kisit tel ni.

Mi khempeuh kitang sap pen in lungnopna hi. Tua lungnopna pen Jesuh kiang bek ah om hi. Herod banga kihihsakna, hazatna i neih leh, tua lungnopna ei kiangah hong tung lo ding hi. La phuak siampa bangin, kiniam khiat na tawh Pasian mai I zon leh bek tua nopna ei tungah hong tung thei bek ding hi.

Mipilte in Herod kiangah hih kumpipa koilai ah suak ding hiam cih a dot ciangin, thukham hilhsiate leh siampite kiangah a dok leh, Bethlehem ah suak ding hi, ci in mantakin gen thei uh hi. Bang hang hiam cih leh, amau pen Pasian thubu laisiangtho pen tel cihtaka telte ahi uh hi. Ahi zongin, Judah kumpi pa Jesuh a suahna ding thei napi, amau in Jesuh bia dingin pai sawm lo uh hi. Laisiangtho theihna, biakinn paina in vantunggam hong tun’ lo ding hi. Kineihkhemna in zong hong tun’ lo ding hi. Kiniam khiata Jesuh khe phungah zuatna bek in vantung hong tun’ ding na hi hi.

Piancial 18:1- Abraham in vantung lam en to ci hi. Late 121:1 ah “keimah in mualtung lam ka en to hi. Keima huhna koi lai pan hong pai ding ahi hiam? Van le lei a bawl Topa’ kiang panin keima huhna hong pai hi”, ci hi. Piancil 28 ah Jacob pen a upa kiangpan galtai in Bethel a cihna ah zaantamin om hi. A mang sungah vantungmite vantung le leitung kikal a kileh ziahziah mu hi. Pasian ompihna ngah hi. Jacob mah bangin a mangthangte a zong dingin Mihing Tapa hong pai hi (Luka 19:10). Mi tampi leitungnate sungah mangthang uh hi. Jesuh in tuma kum 2000 lai pekin nang hong zong hi. Nang aa dinga hong pai, Jesuh na sangnai maw leh…

John Newton a cih theologian khat kiangah khangno khat in thu va dong hi. Na khan’ sungah theihhuai , ciapteh huai nasak pen thu hong gen in, ci hi. Thu 2 omin, 1 na ah kei pen mawhna nei mi pa ka hi hi. 2. Jesuh ahih leh honpa ahi hi, ci hi. A thupipen thu nih ahi hi.  Vangtung nopna kumpi tokhom nusia-in Jesuh nang leh kei adingin a hong pai ahi hi. Tuni in kisit tel ni. Khamuanna taktak na ngah nai hiam? Nanga ading hong suak Jesuh bang tawh na dawn ding hiam???

(Dec 24, 2020 Zaan sermon pen a kitom lakkik hi.)