Mi khempeuh in a kibangin I lunggulh lakah Itna kihel hi. Mihing khat le khat tung pan I kilunggulhte pen Pasian in zong ei leitung mite tungah hong lunggulh lam kimangngilh thei khazel hi. Mihingte’ neih itna le Pasian itna teh theih ngei ding hi lo a, ahi zongin tua mihingte’ neih itna in a lian mahmah Pasian itna hong sangsiamsak thei hi.  Ei mihingte khat le khat I kipiak mawhmaina, kisangsiamna le cihtakna in Pasian itna a thuk zawin hong sin beh hong tel beh sak hi. Leitung I nuntak sungin I it mahmah aih kei leh, ei hong it mahmah khat I nei tek ding a, a om nai kei lehzong hong om ding hi. Mi khat I ngaih mahmah ciangin amau kimaisak den, amau hihna bangin kisangin, buaina kikal ah amau ki-it veve hi.

Itna in mawhna hong maisak zo den hi. I lawmngaihte in ei tungah hong khialin, a kamciamte hong pel den thei mahleh, hong thum ciangin I maisak nading baih mahmah hi. It mahmah I hih manin hong khialh ciangin na kisa na pi’n, hong thum kei taleh kimai sak a, hong thum ciangin maisak lua kisa a thu kimangngilh ta hi. Tua thu in Pasian kiangah tam veipi tak kiciampel in, amah kiheisan a, ahih zongin aman hong maisakin hong sang den hi. Tua ban ah Pasian in ei a tate mawhna te hong maisak khin himah leh, I thumnate ei kam pan mahin a zak nop lam hong phawksak hi. (1 john 1:19)

Tua bang ah, Itna in amau hihna bangbang hong sangzosak hi. Amau nunluite kisialsial nawn loin, ei tawh kimuh, kithuah le kingaih zawh a kipan amau hihna pen ei adingin thupi kisa zaw hi. Amau thanemna pen kipan pih nuamin, amau adingin a belh tak suangpi kihi nuam hi. Tua in, Jesuh in I hihna bangin ama kiang I zuat ding hong deih lam hong phawksak hi. Jesuh in na hoih ciang, na thupit ciang hong pai pan in, hong ci lo hi. Na hihna bangbangin hong pai in, ka ta aw, hong ci hi. Tua ama kiang I tung khit ciangin I thanemnateng ama kha tha tawh hong huhin hong gualzawh pih ding a, I mawhna khempeuh vuk bangin hong ngosak ding hi. (Isaiah 1:18)

A tawpna ah itna in hong pomsak hi. Bangzah takin I lawmngaihte ei tungah mawhin, khial a, I lungsim hong nasak den hang, amau mah ki-it tantan lai veve hi. Amau kiang pan I lamet kikna tawh I hun le neihsate a kipia hi masa zaw loin, I ngaih man, kikholh nop man le I piaknopna hang bekbekin a kipia masa hizaw hi. Tua bang hi tase mah leh, I lungsim natna hong tam pian ciangin ei lam panin Itna kiam thei a, ahi zongin Pasian in ei mihingte hong itna tul ngei lo hi. Ei mihingte I hih leh, a hunsim le naisimin I itna khauh den zo lo a, ahi zongin Pasian in ei a tate hong itna kip pai suak hi. Pasian in ei kicin’ man hong it hi zenzen loin, amahmah itna Pasian ahih manin eite hong it hizaw a, a tawp dongin hong pom pai suak hi. (Rom 8:38-39)

Lia Vung Lek