A kaikhawm: Endikpawl

Zolaipu Gin En Cin in hong nusiat pen a innkuanpite le a pawlpi ading bek hi loin, Zomibup ading supna lianpi khat ahi hi. A sepsate ka ngaihsut ciangin thupi ka sa mahmah hi. A sep sawmlai zong tampi om ding hi tah, ci-in pammaih ka sa lua hi. 2018 ZBCA pawi lai-in a mah tawh kum tampi khit ciang ka kimu kik thei a ka lung a dam mahmah hi. Ama hun ngah lohna hangin niangtui na leng, dawmkhop hun ding ka ngah kei uh hi. Amah ka phawkna le Zomite theihloh a phamawh khat ahihna tawh kizui-in ama tangthu sut dih ni.

Siapa pen Tongzang khua gei-a Tuitum khuami hi-in Pu Son Tual le Pi Ning Khaw Vial sung pan 1935 kiimin suak dingin ki-um hi (Ciaptehna kician om lo le a om sunsun Japan gal sungin mei tawh kang mang hi). Khristian innkuan sung pan khang khia-in aneu a kipan mi citak, lau nei lo mipa khat hi.  Unau numei 3 le pasal 5 lak ah a li na ahi hi. A zi pen zato siamah Nu Don Khaw Hau hi-in ta 6 nei uh hi. A tate lak ah mipi theih zawdeuh ahi lasiam San Lun kihel hi. A taneu penpa in Covid sungin Kawlgam ah hong nusia khin hi.

Pasian nasepna

1969 in hunzang ding a kigingna ah Kal 4 (Just Four Steps by Oswold J Smith) cih laibu a simna pan amah le amah in piangthak hi. Lungdam lua ahih manin, tua a piangthakna laibu pen Zolai-in letin bu 3000 amawkna in hawm pah hi. Hun khat ciangin Harvest Camp Ministry phuanin lawki bei nai lohna khua 7 ah lawki pan Khristian pawlpi khat peuhpeuh ah biakna a laihna dingin va zol va hanthawnin khua 7 siansuah zo hi.

Lai lam nasepna

Tedim TBA khutnuai Cope Memorial Printing Press laikhenna ah 1964 pan 1974 dong sem hi. 1968 kum ciang, Burma Council of Churches’ vaihawmna tawh Bible For Adults (Khanghamte ading Laisiangtho) project ah Khangham Laisinna Makai (Adult Literacy Organizer – AOL) zong hong sem kawm hi. Hih hun sungtengin Tedim Tonzang khuahuam sungah khangham mi 1000 zolai at thei sak zo-in Ciapteh Pahtawi lai (certificate) zong pia hi. Minam le Zolai khantohna ding a hanciamna khat ahi hi.

Tan li ciang ading  Zolai simbu Puah Komiti ah 1972 pan kihel toto-in,  Komiti a kilaihlaih hangin amah pen kihel den hi. Komiti in Zolai Simbu bawl dingin tavuan pia pah ahih manin, sangnaupangte in a hun lapin Zolai Simbu a ngah theih nading lampi a om bangbang zangin citatakin sem hi. Khat veivei bang, lai pei nading Carbon om lo ahih manin a vom (color) dingin battery sunga “lead” a vomte gawi vui-in ka zang uh hi, ci zen hi. Zolai a vei zia kimu thei hi.

Zolai tawh kisai sepna tuamtuam ah na kihel den hi. 1974 Tedim Labu Komatite ah ma na pang hi. 1996 kumin, RC-te’ Biakna Labu bawlna ah zong na huh thei-in 1993 in zo uh hi. 1994 Falam a om sungin, Falam Zolai ACB Chart le Falam Zolaibu tan lang pan tan 2 ciang bawlpih hi.  S.T Hau Go’ bawl X’ian Labu ah zong a pat lam ah kihelin a lang kiim zawhpih hi.  1999 ZCLS Labu Puah Komiti ah zong kihel hi. 1977 kum, Sia Kam Khaw Thang’ tei Tedim Bible 77 ah Komiti nihna ah kihel hi. Zolai tawh kihawm

“Lungvakna” le “Thupha Puak” te ah ahi zong, Tedim Sangpi Magazine le Christian Kumza Tuitum Souvenir labute ah endikpi sem hi.

Thului le laibu tampi gelhin Mikang lai pan laibu zong tampi let hi. Tuate lah ah Zolai tawh kisai a thupi deuhte ah Zolai Endikte’ khutlet 2003, Zokam pan Zokam Tongdot (Dictonary) cihte ahi hi. A thupi penpen ah 1983 kiim pan Laisiangtho pen mikangkam New International Version pan Zolai ah tei na kipanin 2005 kumin Zokam International Version ci-in hawm khia zo hi. Zolai bek hi loin, biakna lam ah zong a na thuklut mahmah khat ahi hi.

Zolai tawh kisai a veina hih bangin dotna dawnna khatah gen hi,  “Zomite in i Zolai mah tawh Pasian kammal Laisiangtho simin i Zokam mah tawh Pasian pahtawina la sa-in, i Zokam mah tawh thu i nget ciangin Pasian tawh kizopna thukpen in, i lungsim hong bunpen hi. Zolai ka sep ciangin Pasian na a sema kingaihsun ka hi hi. Tua ban ah Zomite mi namkhata i kiciamtehna ahih manin sep loh phamawh hi,” ci hi. A khan’ khempeuh Zolai tawh kisai adingin ka zang hi, zong ci lai hi.

Pahtawina

Ama nasepnate hangin Tedim Bethel Bible College in 2005 in B.C. Min digri ahi zong International College of Bile Theology le World Bible College te kipawlin 2006 in Doctor of Divinity (D.D) pia uh hi.

(Hih anuai a pen ZomiDaily ah Pu H Gin En Cin lai-at pan dilekin kila kik hi.)

Lailam Dinmun Khantoh Nadingin

• Laimal gawmzia a kibat nading mun khat pan uk leeng
• Thu tangpek om loin kikum khawm liailiai leeng.
• Laimal a aw suahin gelh loin a malgawmin bawl leeng.
• Zolai tawh kituakte ah leitung buppi zat English mah bulphuh leeng.
• Zomite i omna peuhpeuhah i Zolai in hong khihkhawm lam theitelin no aa, ko aa ci loin a kisapna mun ah zangtuah leeng.
• Zokam veve no kam, ko kam ci loin kithupi ngaihsutsak ciat leeng.
• Zomite zat kim pen Laisiangtho suanga laimal zatzia le kammal zatzia zuih sawm ciat leeng.
• Laisiangtho sunga minte kam kiphen lo teng in a kibang zang khawm leeng.
• I omna mun tekah Thuzakna lai a tam theithei hawmkhia-in laimal gelhzia kibangsak leeng.
• Zomite lakah kampau telsut (Languistic) 4 bang 5 bang omin Zolai puah khawm leeng
• I kipawlna (denomination) phualpi ciat pan kizomtuah dimdiam leeng.
• Laibu bawl om ciangin kipahpihna (Royalty) pia leeng.
• Fund tampi nei-in Zokam a kibawlsa Laibute hawm khiatsak zo leeng.
• Mipi zat Laisiangthote Zolai le Mikang lai Diglot in nei zo leeng.
• Zokam pau khempeuh in Labu kibang zangin tua tungtawnin i kampau gawmkhawm leeng.
• Zolai sang bek hi lo Laisiangtho sangte ah Zolai Subject khatin Sinsak leeng.
• Kam kiphen lo khempeuh in Zolai Simbu Tanlang pan a kibangin zangkhawm leeng.
• Zolai Seminor nei khawm pahpah leeng.
• Saklam Zomite in “ou” le “ch” tangin “o” le “c” zang leh.

Zola (Ahikeh) Lakam

Minam lianpi tampi in a neih loh Zomite i tungtuanna hih lakam ahi hi. Pasian in hong piak tuam Thupha hi-a limtaka kep ding hi. I tu i tate limtakin hilh a theihsak ding ahi hi. Tu-a i zatsa sangin a hoihzaw lakam mal kaikhawm a sin ding ahi hi. Phuahtawm theih om leh zong phuahbeh lai ding ahi hi. Tan 7 pan a tungsiah ah Zola subject khatin nei-a sin ding hoih hi. Zola kammal in Zomite minampi khatin hong ciamteh hi.

Etkakte:

1. Dr. H. Gin En Cin: Camp Director and Bible Translator (www.zomimessenger.com)
2. Dr. Gin En Cin tawh holimna host by Naa Lian Zomi (March 2, 2022) (Youtube video)
3. Zolai Pupi Dr. Gin En Cin (posted on Zomidaily.org)