Dr. Zam Sian Khai

Thupatna:

Leitung ah thupiang tuamtuam tam semsem n na lamdang tuamtuam zong tam semsem ta hi. I neulai pek pan kipanin ‘Zeisu hong pai baih ding hi,’ kicici hi. Tu’n bel, hong nai mahmah ta ding hi. Lai Siangtho sungah Zeisu hong paikik ciangin lim tuamtuam piang dingte kigen khol hi. Hun Nunung Thupiang Dingte (The Endtime Events) khenpi tuamtuam in kikhen hi. A masa penin Rapture thu kikum ni.

Rapture: Rapture in hun nunung ciangin hong piang masa pen ding khat ahi hi.  Rapture in ‘laktohna’ cihna hi. Rapture kammal in Latin kam (rapiemur/rapio) pan kila ahi hi. Tua Latin kammal in Grik kammal harpazo pan kilet sawn ahi hi. Thuciam Thak sungah harpazo kammal 14 vei kizangh hi. Laktohna tawh kisai in mun tuamtuam ah kigelh hi (John 14:1-3; I Cor 15:51-54; I Thes 4:13-17). Thessonika Masa 4:16, 17 “Pasian’ thupiakna awging lianpi, vantungmi mangpa’ thugenna, le Pasian’ pengkul hong ging dinga, vantung panin Topa mahmah hong paisuk ding hi. Tua ciangin tua hun laitakin a nungta lai eite pen vankim lai-ah Topa a dawn dingin amah a um a sisa mite tawh hong kilakhawm ding a, Topa tawh I omkhawm tawntung ding hi, cihna ahi hi.” Kilakhawm ding a cih in Rapture ahi hi.

Rapture Pianziadingte: Thakhat in hong piang ding hi. Korin Masa 15: 51, 52 “Kuamah kim in a theih loh thusim khat na ngai un. Eite khempeuh a si khin ding ihi kei a, thakhatthu-in a kikhelvat ding ihi hi. 52Peengkul nunung hong gin’ ciangin mitphiat kikal sungin i kikhelpak ding hi. Bang hang hiam cih leh peengkul hong gin’ ciangin misite a sithei nawn lo dingin hong tho ding a, i vekpi-in i kikheel ding hi.” Rapture ciangin thakhatthu in kikhelvatna om dingin laktohna om ding hi. Mitphiatkal sungin a piang ding ahi hi. Thumadawk om lo ding hi. Rapture hong tunma in theihsakna thumadawk bangmah om lo ding hi. Tua hangin a hun le ni ding kua mah in thei lo hi. Tu ni zong hi thei, zingciang zong hi thei. Mai kum ciang zong hi thei, tuzawh kum tampi ciang zong piang thei hi. Limlak khol om lo ding hi. Sun khat thu, zan khat thu in hong piang thei ziau ding ahi hi. Thuummite ading bek ahi hi. “Tua ciangin tua hun laitakin a nungta lai eite pen vankim lai-ah Topa a dawn dingin amah a um a sisa mite tawh hong kilakhawm ding” (I Thes 4:17) hi ci hi.

Rapture Upna Tuamtuamte: Rapture hong tun hun ding thuumite sungah sanna le khiatna tuamtuam om hi. Gimna Lianpi Pianma Rapture (Pre-tribulation Rapture): Hih dinmun a lente’n thuummite in Gimna Lianpi hong tunma in Rapture ah laktohna ngah ding uh hi, cih um uh hi. Pawlkhat Laktohna Rapture (Partial Rapture): A picing zawdeuh thuumite in Gimmna Lianpi tunma in laktohna ngah ding uh hi, cih upna hi. Gimna Lianpi Laizang Rapture (Mid-Tribulation Rapture): Thuumite in Gimna Lianpi pawlkhat nawkkha ding a, tua khit ciangin laktohna ngah ding uh hi, cih upna hi. Thukhenma Rapture (Pre-wrath Rapture): Rapture in Gimna Lianpi hunnunung lam ah hi ding a, thukhen nunungte madeuh in piang ding hi, cih upna hi. Gimna Lianpi Khit Rapture (Post Tribulation Rapture): Hih in Gimna Lianpi khit ciangin Rapture le Second Coming piangkhawm ding hi, cih upna hi. Rapture le Second Coming kikhen tuam loin thuumite in Gimna Lianpi nawkkha ding hi, cih upna ahi hi. Hih upna tuamtuamte lakah Gimna Lianpi Pianma Rapture (Pre-Tribulation Rapture) upna in Evangelical Khristiante sungah a tamzaw in a santheih uh dinmun ahi hi. Thuumite in Gimmna Lianpi nawkkha lo ding, cih upna hang hi pen hi (Mang 3:10; I Thes 1:10, 5:9, 10). Thakhatthu in hong piang ding Rapture ahihna hangin gimna lianpi pianma hi ding kici thei hi (I Cor 1:7; Phil 3:20; I Thes 1:10; I Tim 6:14; Titus 2:13; Mang 22:20).

Rapture le Second Coming: Laktohna le Second Coming a kibang ahiam? Kibang lo hi. Hun nunung ciangin thupiangdingte nampi nih in kimu thei hi. A masa Rapture in thuumite ading ahi hi. Second Coming in Kumtul Mangna (Millennium Kingdom) ding kipat ciangin hong piang ding ahi hi. Rapture ciangin meii tungah misiangthote la dingin Zeisu hong pai ding hi. Second Coming ciangin leitung ah misiangthote tawh Zeisu in Kumtul Mangna dingin hong kumsuk ding hi. A nam nih in a kibatlohna mun tampi ah kimu thei hi; Rapture in meitung ah (I Thes 4:17), Second Coming in leitung ah (Zecha 14:4, 5) hi ding hi; Rapture in hehnepna piangsak in (I Thes 4:18), Second Coming in thukhenna hun (Mang 19:15) ahi hi. Rapture in ‘Khazih sungah’ thuumte (I Thess 4:14, 16) ading hi a, Second coming in Israel le minam khempeuh tawh kisai hi (Zecha 12:2-9). Rapture ciangin thuumite’ pumpi kikhel ding a (I Cor 15:51-53), Second Coming ciangin Jew mite lungsim kikhel ding hi (Zechar 12:10). Rapture hun in gimna lianpi hong tunman hi ding hi. Khazih sungah a sisa mite thakhat in thokik ding hi. Khazih sungah a nungta laite thakhat in kilaktohna om ding hi. Khaizih sungah a thokikte le a nungta laite thakhat in kilato ding uh hi.

            Tuteng thupiangte i et ciangin Leitung in lungmuan huai lo semsem dinmun hi. Gal le sa tam semsem hi. February 24, 2022 a kipan in Russia in Ukraine nisim in thauvui thautang tawh dodo in mi tampi sikhin hi. Russia President Putin in gal a lel dekdek phial ahih manin nuclear bomb zangh ding hi ing, cih tawh tawngtawng ta hi. China in Taiwan simnuam ahih manin galvanleng tampi tawh umcih zeel in pautau sak mahmah hi.  Leitung ah nuclear thaulutang (warhead) 13, 080 om hi. Russia in nuclear lutang 6,257, US in 5,550, China in 350, France in 290, UK in 225,  India in 156, Pakistan in 165, Israel in 90, North Korea in 50 neita hi (www.armscontrol.org). China in nuclear lutang nawhtakin behlap ahih manin kum 2035 ciangin 1500 neita dingin kiummawh hi (www.politico.com). China in Russia le US demin leitungah a thahat pen gam hi ding cih ngimna lianpi nei hi. Ezekiel 38 sungah Israel gam do dingin gam tuamtuam tampi kikaikhawm ding hi ci hi. Israel gam kiim a om Arab and Muslim gamte in Israel suksiat ding ngim tawntung uh ahi hi. Leitung mun khempeuh en lehang, galgim nam bek hilo in, mun tampi ah gal kidodo ta hi. Leitung munci tengah hun nunung limlak semsem ta hi.

-Rapture Ading Bangci Kigingkhol Ding? Zeisu in “Bang hun in na Topa uh hong pai ding cih thei lo na hih manun na pilvang un… Mihing tapa zong, note’ upmawh loh hun laitakin hong pai ding ahih manin note zong na kiging tawntung ta un” (Matt 24:42, 44) ci-in nagen hi. Zeisu i Gumpa leh Topa in a sang nailote in hun omlai in Zeisu kiang zuan ni! Mi khat in a hoihna, phatna le gamtat hoihna hangin Pasian maipha mu ding hilo hi. Rom 3:23 “Mi khempeuh a mawhkhin a, Pasian maipha muhna ding kisia khin hi” ci hi. Rom 6:23 ah “Mawhna thaman in sihna hi a, ahih zongin Pasian’ hong piakkhong in Zeisu Khazih i Topa tungtawn in i ngah nuntak tawntungna ahi hi” ci hi. Leitung ah a kip ding bangmah omlo hi. Pasian hong piak nuntak tawntungna bek a kippen ding ahi hi. Zeisu na san naikei leh, na lungsim sungah samin na Topa le na Tanpa in sang in. Na mawhna panin a sisan tawh hong tankhin zo hi, na up in na san leh, nuntak tawntungna na ngah zo hi. Zeisu na sankhit leh, Rapture ading kiginna dingin na nuntakna kisit pha in. Pasian ta na hih leh Pasian’ ta bangin na nungta hiam? Pasian tanu na hih leh, Pasian tanu tawh kilawm dingin na nungta hiam kisit pha ciat ni. Zeisu hong pai ding nai semsem hi. A kiging ciat dingin Topa in thupha hong piaciat ta hen.

Etkak Laibute

Benware, Paul N. Understanding End Times Prophecy. Chicago: Moody, 1995.

Couch, Mal., ed. A Bible Handbook to Revelation. Grand Rapids: Kregel, 2001.

__________. Dictionary of Premillennial Theology. Grand Rapids: Kregel, 1996.

Crutchfield, Larry V. The Origins of Dispensationalism: The Darby Factor. Lanham, Maryland: University Press of America, 1992.

Kelly, William. “The Rapture of the Saints: Who Suggested It, or Rather in What Scripture?” The Bible Treasury 4(ns) (1903):314-18.

LaHaye, Tim, and Thomas Ice. Charting the End Times. Eugene, Ore.: Harvest House, 2001.

MacArthur, John. The Second Coming: Signs of Christ’s Return and the End of the Age. Wheaton, Ill.: Crossway, 1999.

Reiter, Richard R., ed. The Rapture: Pre-, Mid-, or Post-Tribulational. Grand Rapids: Zondervan, 1984.

Ryrie, Charles C. Basic Theology. Wheaton, Ill.: Victor, 1986.

__________. What You Should Know About the Rapture. Chicago: Moody, 1981.

Svigel, Michael J. “The Apocalypse of John and the Rapture of the Church: A Reevaluation.” Trinity Journal 22ns (2001):23-74.

Tenney, Merrill C. Interpreting Revelation. Grand Rapids: Eerdmans, 1957.

Thomas, Robert L. “The Place of Imminence in Recent Eschatological Systems,” in Looking into the Future: Evangelical Studies in Eschatology. Edited by David W. Baker. Grand Rapids: Baker, 2001. 199-216.

Turner, David L., “The Structure and Sequence of Matthew 24:1-41: Interaction with Evangelical Treatments.” Grace Theological Journal 10/1 (1989):3-27.

Walvoord, John F. The Blessed Hope and the Tribulation. Grand Rapids: Zondervan, 1976.

__________. The Prophecy Knowledge Handbook. Wheaton, Ill.: Victor, 1990.

__________. The Rapture Question. Grand Rapids: Dunham, 1957.