2023 Nu’Ni a mu thei kik dingin Pasian in hamphatna hong pia lai ahih manin Ama Min ka phat masa hi. 2022 in Nu’ Ni tawh kisai Topa in Pi Hagar nuntakna tawh hong hopih hi. 2023 in Topa kingah ka ngen leuleu a, Sheba Kumpinu thu tawh a thakin hong phawksak kik hi.

A. Sheba Kumpinu i cih kua hiam?
Topa Jesuh in, “Leitaw lam gam kumpinu in na gen hi.” Solomon kumpipa’ pilna ngai ding hong pai hi ci-in pulak kik hi (Matt 12:42). Leitaw lam a cih pen Laisiamte in Arabia (or) Ethiopia dingin ummawh uh hi. A tamzaw in Ethiopia gam dingin kip sak zaw uh hi. (Dake Bible, 636). Bang hanghiam cih leh tu khang hun ah Khristian tampi Ethiopia ah om hi. Sheba kumpinu mission nasepna hi dingin ummawh uh hi. Ethiopia mangpa Jerusalem ah a sawlkhia kumpinu zong, Sheba kumpinu khit kumpi tokhom a luah Kandeis ahi hi. Kandeis pen kumpinu, mi piangthak khat a hihna kimu thei hi. (Sawl. 8:27)

B. Solomon Kumpipa i cih kua hiam?
David kumpipa’ tapa hi in, a pilna, a siamna le a hauhna tawh Israel kumpi a minthang pen ahi hi. Pasian tungah pilna a nget ciangin Pasian in pilna bek hilo, hauhna tawh pia khawm hi. Leitungah amah zah a, a pil a hau kumpi om ngei nailo hi. Ama siamnate:
1.Kha thu a van-siam ding Siampite koih hi.
2.Gam uk-siam ding ulian makai mipil koih hi.
3.Sum le paai zon-siamte koih hi.
4.Gammite lungdamna ding hanciam in uk-siam hi, (Rev. San Toe).

C. Sheba kumpinu bang hangin hong pai hiam?
1.Solomon minthanna za ahih man mu nuam hi.
2.Mu bek loin thu haksa dong nuam hi.
3.A lungsim khempeuh tawh holimpih nuam hi.
4.A pilna mukha takpi hi.
5.Mite’ gen thu, thumaan hi ci-in pulak hi.
6.Letsong tampi puak hi.
7.A theihnop khempeuh dong hi.
8.Lungdam takin a gam zuan kik hi. (Dake Bible, 636)

D. Jesuh le Solomon
Topa Jesh in Solomon sangin a lianzaw khat hiah om hi, ci-in amah na kipulaak hi. Tua ahih leh Jesuh a cih kua a hi tam? (Matt 12:42)

1.Alpha le Omega
2.Lei le Van a bawlpa.
3.Immanuel Pasian.
4.Mualkuam Unok Paak.
5.Hong Gum, Hong Tan, Hong Hon Pasian! A Kam tawh mawhpipi mah mawhlo hi, ci-in hong Gum hi, (Rom 5:16). Mawhmai nadingin a Sisan tawh hong Tan hi, (Rom 5:8). A pumpi mahmah kipum piakin hong Honkhia hi, (Luke 19:10).

E. Sheba le Nute
Sheba kumpinu in Solomon’ minthang nate a zak ciangin a mit tawh mu nuam tektekin zuan pah hi. A nuntakna ah a tel zawhloh thu haksa tampi dot sawm pah hi. A lungsim khempeuh sungkhia in holimpih nuam hi. Solomon a muh ciangin Pil takpi mah ei, ci-in pulak hi. A ma neihsa sung pan a manpha pen: Paaknamtui, Kham le Ngun, le Suangmanpha tampitak letsong pia hi. A theihnop thuthuk tampite dong thuahthuah hi. Tua teng khit ciangin a gamah lungdam takin ciah kik hi.

NU’ NI ah NUTE
-Sheba kumpinu mah bangin Jesuh thu a za bek hi lo, mit tawh muh sawm tek ni.
-I telzawh loh thu tampi om mah hi, ama kiangah dong ciat ni.
-Lungsim takpi tawh amah tawh holim (thungen) tawntung ni.
-Topa aw! pil takpi mah cei ci-in phat tawntung ni.
-Ama hong piaksa talente, neih le lam, tu le ta, suan le khak, pilna siamna, khempeuh tawh ama kiang zuan kik ciat ni.
-Hih thupha khempeuh tawh i inn i lo zuan kik in lungdam ko tawntung ni! Nute adingin i Mission field a kisam pen le a thupi pen in i INN ahi hi.
Laisim mimal khempeuh Topa Pasian in thupha hong pia tawntung ta hen. AMEN! 

Don Ngaih Lian