Leitung paizia i kiim i paam en leng, thusia lasia bekbek tawh kidim hi. Zomite ading diak bangin ci leng, Kawlgam lam ah tualgal tungin, Vaigam lamah Meitei gal a tung ahi hi. Gam nih kikalah i taitaina ah gal om ahi hi. Gam nihna omte ci leng, gen theih haksakna sung ah gam thumna pai ding cih lametna khat tawh mat le hen kawmkal minam dangte lak ah peemta in lungkham mang bang uh hi. Gam thumna pawl lah, leitung nate iplahna sungah nuamsa-in tuate ading sumlepaai zongin a thupha luanna Pa Pasian hun i pia man nawn kei hi.

Hih leitung pen a kip lo, a kho lo, a kisia ding ahihna Topa Jesuh mahmah in na gen khol hi. Mattiu 24: 35 (TB77) “Van le lei a mangthang ding hi; ka thu ahih leh a mangthang ngei kei ding hi,” na ci hi. A bei thei lo, a kisia thei lo ding, le a mangthang nawn lo ding in Topa’ kammal bek ahi hi. Paunak sungah na neihsa a lian pen bangin na zon dingin hong gen hi. Huih nun na lamlamah a awnte hi loin, Ama kammal ahi suangpi tungah kiptaka a dingte ihih nadingin, Ama kammalte i lungtang sa tungah gelhin Khasiangtho kimakaihsak ding ahi hi. Huihpi guahpite hong nungin khimkhua hong zing zongin eite adingin ama Hehpihna in bei hun nei lo, eite ading a om den, a ready den cih phawk ding hi hang. Kah La 3:22-23 “22A bei thei lo Topa’ hong itna le a hehpihna a kizom paisuak hi a, 23zing nisuak bangin thaksuak tawntung a, ni a hong suah pelmawh mah tawh a kibang ahi hi.”

Khristian khat ihihna tawh ahi zong, Zomi khat ihihna tawh ahi zong, mihing khat ihihna tawh ahi zong hih a kisia thei leitungah lam hong lak ding in Ama kammal le Ama Khasiangtho bek ahi hi.  Ama kammal tungah dingin, amah theihna sungah khangcingin, ama hehpihna sungah i nungta ding hi. Khristian nuntakna sungah a thupi tampi a om hangin, a tawpna ah a thupipen thu 3 bek om hi, Paul in na ci hi. Upna, Lametna le Itna te ahi hi. Hih teng lak pan Itna mah thupipen ci hi. I Kor 13:2 ah siamna tuamtuam ka neih hangin “…….itna ka neih kei leh ka kimanna bangmah om lo hi’, I kor 14:1 ah “Na deih lianpen uh ki-itna na hisak un…” ci kik hi. Kha thupha, leitung thupha tampi na ngah na nei kei zongin itna na neih nak leh, na Khristian nunatakna in a picing nuntakna, a gahpha le a thupipen a nei a sem na hi khinta hi.