A Khiatna: Millenium kammal in mille leh annus kici Latin kammal nih kigawm ahi hi. Mille in tulkhat cihna hi a, annus in kum a cihna hi. Hih mille le annus kammalte a kigawm ciangin Millennium kammal hong piang hi. LST sungah hih kammal lian a omloh hangin kum 1000 cih kammal om hi. Maangmuhna 20:2-7 sung bekah zong kum tul kammal guk vei kihel hi.

A Sawttan: Kumtul Manna hun in gimna lianpi kum sagih a bei khit, Armageddon gal kido khit Jesuh Olive mual tungah gualzawhna tawh hong kumsuk hun panin kipan ding hi. Pawlkhatte genna ah,  Lai Siangtho gen kum 1000 in a kum phazah taktak hilo in a hun sau simsim khat a sawt  agenna hi ding hi, a ci om hi. Ahih hangin a sawttan ding a kigenna ah, kum 1000 sung sawt ding hi, ci in kiciantak in  Maangmuhna (20:2-7) sungah kigelh ahih manin kum 1000 takpi mah sawt ding hi.

A Khuamite:  Hih kumtul manna ah misiangtho khempeuh leh Armageddon pan a suakta mi million honkhatte kihel ding hi. Jesuh Khazih in Jerusalem phualpi dingin zanghin thuman-thutakna tawh uk ding hi. Khemna, zuauna, golhgukneekna, kibawlsiatna, kidona le kizawhthawhna cihte omlo in Jesuh Kumpi makaihna tawh vai khempeuh diktakin kigeel, kihawmin kisem khia ding hi. Kumpi langpang kipawlna a kipan minam pi le minam neute sungah kipawlna tuamtuam le kidona tuamtuamte om lo ding ahih manin nuam mahmah ding hi. America gam in vantunggam maleep hi, ci’in akigen sangin hih kumtul manna in vangtung maleep taktak hi zaw ding hi. Jesuh tawh hong kumsuk khawm misiangtho honpite le Jesuh in makaih in ukna nei ding ahih manin thusia lasia a geel le a bawl nuamte in thusia sem zo lo ding hi. Hoihna le phatna vive in zo zaw ding ahih manin nuam mahmah ding hi.

A Khuapi:  Millenium sungin thu-le-la vai khempeuh kigelna le kizekkhiatna mun bulpi pen dingin Jerusalem kizang ding hi. Jerusalem thupitna lahna in min tuamtuam kipia hi; a singtho khuapi (Isa 33:5; Jer. 31:40), Pasian omna khuapi (Ezek 48:35), biakpiakna khuapi (Isa 60:3; Jer 3:17; Zech 8:23), gamvai kihawmna khuapi (Ps 2:6; 110:2; Isa 2:2-4; 24:23; Mic, 4:7), a bit a daai le a muanhuai khuapi (Isa 40:2; 66:20; Jer 31:6), daupaina khuapi (sumbawlna phualpi) (Isa 2:2; 60:11; 66:12; Mic 4:1) le a thupipen khuapi (Isa 2:2-4; Zech 14:9-10) kici hi.

A Khua-misiangthote Dinmun: Kumpipa Jesuh in misiangthote’ cihtakna tawh kituakin uk theihna za kipia ding hi (Luke 19:17). David kumpi pa le Jew makai tampite in Jesuh ukna nuai ah ukna le thuneihna nei ding uh hi. Jesuh nungzuipite in zong panmun kician mahmah nei ding uh hi. A upna hangin sihna dong a thuakte akipan a nungtak sungin cihtakna tawh Topa ading a semte in panmun le thuneihna tawh thuhkikna ngah ding uh hi. Corinth Masa 6:2-3 ah “Misiangthote in leitung mite tungah thukhen ding ahih lam thei lo na hi uh hiam?… Eite in vantungmite tungah thu a khen ding I hih lam thei lo na hi uh hiam?…” ci in Paul in thuumite in leitungmite le vantungmite tungah thukhen ding ahih lam na gen hi. Khazih makaihna nuai ah a dawldawl thuneihna tawh gamsung kiuk ding hi. Misiangthote in thukhen neuneute hi ding a, Khazih sehna bangin gam 5 gam 10 bang uk ding uh hi (Luke 19: 11-26; Mang 2: 26-28). Thuneihna bangzah nei ding a, gam bangzah uk ding cih in thuumite a nuntak sungun Pasian ading bangzah mannei semkhia cih tungah kinga ding hi. Panmun le thuneihna a pia ding Pasian hi. Lungsimtawng le gamta nate khempeuh a theitel Pasian in deidanna le maitang ettuam neilo in thuman takin panmun guangin nasem ding hi. Misiangthote in a vanglian pumpi (glorified body) tawh om ding uh ha, leitung mite in leitung pumpi mah tawh om ding uh hi. Jesuh lungsim pua in Jesuh dikna le thumanna tawh kidim ding uh ahih manin a sepna a bawlnate kheupeuh uh nuamsa in gualzo in daupai ding uh hi. Midangte in zong a thu uh mang diamdiam ding hi. Pawlpi sung kibuai kikhen cih om nawnlo ding hi.

A Khuamite Gamtatna le Nuntakzia: Kumtul mang’ hun sungteng Satan kol kibulhin mong neilo kuahawmpi ah kikhiasuk ding hi. Kum 1000 bei ciangin tawmvei suahtakna a kipiak ma dongin minamte khem thei lo ding hi (Maang 20:1-2). Antikhazih le kamsang zuaupa pen kaat le meilipi sungah kikhia ding hi. Hih hun sungin mawhna’ nasepna kiciangtan dinga Satan in khemna zangh thei lo ding ahih manin thusia-lasia tawm mahmah ding hi. Pasian’ vangliatna le misiangthote huzaap  nuai ah mipite omin thumang ding uh ahih manin nop mahmah ding hi.

A Khuasung Omzia: Gamsung ah daihna le kilemna om ding hi. Mihingte sung bekah kilemna om ding hi loin, ganhingte sungah zong kilemna om ding hi (Isa 11:6-7; 23; 65: 25). Hih kumtul man hun in gimna lianpi hun sung tawh kilehbulh lian ding a, nopna, daihna le kilemna tawh kidim ding hi.  Late 46:9 ah “Amah in leimong dong ah gal beisak hi” ci hi. Isa 32:18 ah “Ka mite pen kilem takin a tenna, lungmuang takin a omna, daitakin a tawlngakna munah om ding uh hi” ci hi.  Zech 9:10 ah Topa in “Gal kidonna leengte Israel gam pan beisak in, sakol galkapte, Judah gam pan ka lakhia ding a, galdona a kigzang thalte kisusia ding hi” ci hi. Isaih 2:4 ah “Amaute in a namsaute uh lokhawhna tu, a teipite uh singhiang heuhna temkawi-in a seek ding uh hi. Minam khat le minam khat kido nawnlo ding uh a, galdo dingin kithawi nawn lo ding uh hi” ci hi.

A Khua Hoihna: Pasian in Israel mite gam tuamtuam panin kaihtuah in Israel gam puahkik ding hi. Sehnel gam bangin a keucip munte kipuahpuah ding hi. Tu hun mahmah in zong mihing lam panin nakpi takin Israel gam kipuahpuah ta hi. Jew minamte zong a gam vuah ciah kikin kinawnnawn ta uh hi. Hih kumtul man hun ciangin Pasian mahmah in a gam nosak, selsak le dawngsak kikin Eden huan tawh kibangsak kik ding hi (Is 35:1; Ezk 36:35).

A Khuamite Daupai Mazanna le Cidam Khansauna: Isaih 35:1 ah “Gamlak le lei keuna gam lungdam ding a, sehnel gam lungdamin palhkhia ding hi.” A keugaw leitang ciktui hong suak ding hi (Is 35: 6-7). Gammang tulak abang leitang in Eden huan hong bang ding hi (Ezek 36:35). Amos 9:13 ah “An a kihauh luat manin anlak a kizawh ma-in lo khawhkik hun tungin, leenggahte lenggah zu a bawl a kizawh ma-in a suankik hun… hong tung ta ding hi” ci hi. Nasep nuamsa ding uh hi (Is 65:22; Zech 8:4). Bengnongte’n khuaza in, mitaw te’n khuamu thei ding uh hi. Khebaite zong lamin diangin, a pautheilote in lungdam in la sa ding uh hi. Cidamna kicing tawh kidim ding hi (Isa 29:18; 33:24; 35:5-6; Jer 30:17). Kum 100 pha khat in naupang tawh kibang ding hi (Isa 65:20). Mi pung semsemin naupang khangno tam mahmah dinga, nuntak gimnam mahmah ding hi (Jer 30:19; Zech 8:5).

A Khuamite Lungnopna: Kumtul manna hun sung tawntung ah nopna vive hiphial ding hi (Isa 9:3; 12:3; 14:7; 25:8; 30:29; 55:12). Isa 55:12 “…lungdamna tawh na paikhia ding  uh a, nopsakna tawh hong kipaikhiat pih ding hi. Isaac Watts in Khrismas la in i sak “Leitung lungdam Topa hong pai” acih “Joy to the World” la gelh hi.  Khrismas adingin a gelh hi loin kumtul manna ah lungnopna kicing a om ding thu a gelh hi zaw hi, kici hi. Matthew 6:10 ah kigelh vantung thungetna “Na gam hong piang ta hen. Van ah na deihna kicin mah bangin lei ah kicing ta hen!” in kumtul manna ciangin hong tangtung taktak ding hi. Ahizongin, hih hun sungah na khempeuh kicing khin cih om tuan lo ding hi. Satan kol kibulh ding ahih manin mawhna le zehetna tawm mahmah ding hi. Ahi zongin pianpih mawhna pumpi tawh a nungta ki-om lai ding ahih manin gitlohna le langpan nopna lungsim akipan mawh theihna om veve ding hi. Satan zehetna le kiimlepam siatnate huzap tawmzaw ding ahih manin mawhna’ nasepkhiatna kiciangtan  mahmah ding hi. Kicina thei veve in, kisi thei veve lai ding ahih manin, lungnopna kicing taktak om khin thei lo ding hi.

Thukhupna: Kumtul manna sungah a teeng ding mihing nam nih om ding hi; 1). Jew le Gentile mite lakah Gimna Lianpi sungin tatkhiatna a ngahsate in cilesa pumpi tawh hong lut phei ding uhi. 2). Khazih sungah a sisa thuumte le Thuciamlui thuumte in vangliatna pumpi nei khinsa-in Khazih tawh van pan hong kumsuk khawm ding uh hi. Amaute in kha pumpi tawh om ding uh a, mawhna  pumpi nei nawnlo ding hi (I Cor 15:51-54). Tua hi in, cilesa pumpi le kha pumpi tawh om mi nam nihte teeng khawm ding uh hi. Cilesa pumpi tawh hong lutte in a pianpih mawhna pumpi nei lai ding uh ahih manin a mau sungpan a suak asuan-akhakte uh in pianthakna ngah ding kisam lai ding uh hi.

Kumtul manna sungah a ngeksih le a khansih om lo ding hi. Sihna ahih leh om veve ding hi (Is 65:20). Mite in tanglai mite Adam (kum 930), Noah (kum 950) le Methuselah (kum 969) bangin sauvei pipi kinungta ding hi. Kumza cing loin a site in samsiatna ngahte kici ding hi (Is 65:20). Hih bangin a sibaihte in kumtul man hun sungin a suakte hi ding a, samsiatna thuaksa mawhna pumpi tawh hong suakte ahih man-un pianthak ding kisam ding uh hi. Vantung ah tawntung nuntak hun masiah sihna om thei veve ding hi (1 Cor. 15:24–26; Rev. 22:3). Hih sihna in mawhna hang ahi hi. Sihna tawh kipelhna dingin mawhna maisakna ngah ding kisam hi. Mawhna maisakna hong pia thei mi khat bek om hi. Tua Pa in Jesuh Khazih ahi hi. Kumtul Manna sungah Jesuh tawh ukna za luah dingin i kihel nop leh, mawhna maisakna ngahsate i hih ding kisam hi. John Masa 1:9 ah “I mawhnate pulak lehang i mawhnate hong maisak in i diktatlohna khempeuh pan hong sawpsiang dingin a mah muanhuai in a dik hi” ci hi. Tuhun ciangin kum saupipi nuntak ding kilunggulh in leitung zato lam pilna siamnate le vanzatte hangin nuntakna tawmno kikhan thei bek hi. Kum saupipi nuntak ding le tawntung nuntak ding i lunggulh leh, Jesuh i Tanpa le I Topa in (John 14:6) i san ding kisam pen hi.