( 1956-2021)

A  pianzia, Pilna zonna  le Pasian’ nasepna

Pu Ling Za Thang ( Gualnam beh) le Pi Kham Hen Niang (Taithul beh) te sung panin  June 7, 1956 kumin  Thangzang khua ah suak hi. Unau 9 pha in Dr. Khai Suan pen a ulam pan a 4 na ahi hi. August 9, 1991 kum in Gamlai khua mi  Sakollam veng a teeng Pu Zam Khua Thang ( Naulak beh) le Pi Khup Khan Cing (Hatzaw beh ) te’ tanu Sm. En Ngaih Lian tawh kiteengin, tanu 6 le tapa 1 nei uh hi. Pasian’ piak Tedim inn ah teeng uh hi.

Dr. Khai Suan a neulai – in dam lo a, zong si ngei liang ahih manin a nu le a pa in Pasian tungah, “Ka tapa nong damsak kik leh Nangma’ nasem dingin hong ap nung,” ci-in a ap uh ahi hi.

Pianthakna le sangkahna

March 31 ,1973 ni-in John 5:24 tungtawnin piangthak hi. A piangthakna hangin Tuiphum Pawlpi in Rev. Hau Lian Kham le Rev. Vial Kho Hau te tawh Pawlpi panin hawlkhia khawm uh hi. Evangel Bible  College, Yangon ah kah a, 1988 kum Kawlgambup buaina hangin sang zom thei nawn lo hi. Ahi zongin Rhema  Bible College for Mission ( Kalaymyo) panin B.Th ngah hi.

Pasian’ na sepna

A pianthak ciangin ama’ thu in Pasian’ na sem kawikawi hi. Hat lo ahih manin sakol tung tuang kawm sa-in a pa in paipih kawikawi hi. A zu a ham thuakin anguai pua in Lungdamna Thu tangko hi.  1978  March kha a kipan Rev. Hau Lian Kham tawh Pasian’ na semin Pawlpi kem khawm uh hi.  Sia Khambawi in  Yangon Evangel Bible College ah Siapi a va sep June  26, 1979 kum pan kipan Sia Khai Suan in Pasian’ angsung a tawlngak dong Tedim Bethel AG Pawlpi ah Senior Pastor sem hi.  Ama thungenna tungtawnin mitampi in gupngah kitelin piangthak uh a, mi tampi mah in  ama thungenna hang mahin  Pasian’ na sem dingin sapna ngah uh hi.

Pastor a sep kawm mahin Tedim Section EP, District No.3 , Yangon ah 1979-1986 kum dong Vice Superintendent sem hi. 1993-2002 kum March kha dong Kawlpi Distric No.4 zum ah hunbit Superintendent sem hi. 2011 kum Kawlgambup AG General Council panin Tedim District No. 7  hong piak uh ciangin Siapa mah District  Superintendent tavuan ( vaipuak) pia uh a,  2011-2013 kum sung DC No. 7 Superintendent  sem hi. 1993- 2011 kum dong Kawlgambup AG , GC, EP sem hi. 2006 kum in Tedim khua  Pawl namkim  Thunget phuankhia hi. Hih Pawl namkim Thunget pen khasim in Nino (Saturday) nihna ah kibawl den hi.

Ordination ( Siampi zaa)

April kha ni 6, 1980 kum in District in Licensed Minister pia a, February 12, 1987 kum in General Council in Putao ah Ordination pia hi.

Pahtawina ngahna:

Ama’ Pasian’ na sepna sa teng le a lawhcinna hangin Bethel Bible College , Tedim pan 1995 kumin B.C.Min. kipia  hi. Christian International School of Theology ( APTA ) in Malaysia Kuala Lumpur khuapi pan February 25, 2007 kumin Doctor of Divinity pia hi.

Rev. Dr. Chin Do Kham’ vaihawmna tawh Tedim Christian Fellowship te innteek in TBA tual ah Dec. 11-13 , 1998 sungteng  Lungdamkoh Pawipi kinei  in Zomi sungah pahtawi huaite  pahtawi piakna zong kinei a, tua lai – ah Pasian nasem lawhcing Pahtawina ah Rev.Dr. Khai Khan Suan zong pahtawina kipia hi.Tua hun a kipan  a tuntun na munte ah ama nasepna hangin pahtawina tuamtuam  kipia kawikawi hi.

Gamsung gampua zinna

1995 kumin Singapore , 2004 kumin India, 2005 kumin Singapore, a kipan Malaysia, USA, South Korea, New Delhi, Australia le Zogam Kawlgam mun tampi ah Pasian thugen in zin kawikawi  hi.

A damlohna

Ama pumpi tungah sikhum, zunkhum, awmbing, sihui vangneu natnate nei a, zato zong tung zelzel hi. Hong dam kik zela, Pasian nasepna mabante zom toto thei hi. Ahi zongin in June 9 , 2021 ni-in cisa, bukkhuh natna hong ngah in, hong gim semsem a,  Oxygen tawh kikem toto hi. Siavuan siamahte in a hih theih zahin hong kepsak hi napi- in, June 17, 2021 ni 1 : 15 Am hunin a na a sepsak a it mahmah Topa Pasian kiangah hong ciahsan  ta hi.

(A kaikhawm Endikpawl)