A PICING MI
Ahih hangin antak in a sia a pha khen theihna pilna a nei, zakna muhnate zangin zongsang a, amau le amau a kiseksa, a picing mite’ ading ahi hi.(Heb 5:14)TB77
- A PICING I CIHTE
Lai Siangtho in “A PICING MI” cih ciangin a dawn a tung mi, a khancing mi, a hihna zah ding ciang ahi mi cihna ahi hi. Topa Jesuh suun ta cihna ahi hi. Biakna sung Pawlpi sungah a makai hihna bek hi lo, mite sang hoih zawin kawkbang nading om lo cih ciangciang hi lo hi. Tuapa (Jesuh) in a lian semsem dinga, kei(John) ka hih leh ka neu semsem ding hi (John3:30) cih i muh bangin, ei pen neu semsem dingin i nuntakna-ah Jesuh lian semsem ding cih nuntakna pen A PICING MI ahi hi.
Lai Siangtho sungah mi nam (3) in hong khen a, Leitung mi (a piangthak nai lote), Piangthakte (Jesuh a sang khinte) le Khamite (a picing) cih ahi hi. Piangthak sate hong khangto ding, Khamite hong suah ding (Jesuh hong suun) cih pen PICINNA thu ahi hi. Innkuan sungah, lawm le gual lakah, Pawlpi sungah, a zum kahna le na sepnate ah picing ding ahi hi.
- BANG CI LENG PICING THEI DING
1Pet 2:2 TB77
“. . . hong gupkhiatna ah na khan’toh nadingun Pasian’ thu nawizu siangtho a duh a suak tung naupangte bangin lungsim na nei un.”
(As newborn babes, desire the sincere milk of the word, that ye may grow thereby)
PICING a khanna pen Pasian’ kamal nek le dawn a neihna in piangsak hi. I khan nading, hong cipingsak ding ahi Pasian’ kammal – nawizu pen i dawndawn i neknek ciangin i lungsim ngaihsutna hong kihual ding, i kampaute tawh zong hong kihual ding, i gamtatnate tawh zong hong kihual ding ahi hi. Midangte in hong muh uh ciangin hih mipa in “Jesuh tawh kisuun taktak ee” hong ci ding uh hi. A pa suun taktak ei! cih dante hi lo.
Rom12:2 TB77
“. . . na lungsim uh bawl thakin, na lim uh na kilamdangsak un.”
(..but be transformed by the renewing of your mind. KJV)
Pasian’ kammal tawh i lungsim kidim sakna in i nuntakzia hong khel ahi hi. Nungzuite zong Jesuh tawh kizuizui uh ahih manin Jesuh’’ lungsim bang pua, Jesuh’ pau dandan a pau, a hek a tatdan khempeuh uh Jesuh’ aa dan bekbek suak uh hi. (Mtt 26:73;Act 4:13). Nuntakna pen ei utut cih bang hi nawn loin, Topa Jesuh deihdeih dandan suak zaw ta.
Kha Siangtho letsongte (1Cor 12:8-11) na zat khiat zawh nailoh hangin Kha Siangtho gahte; itna, ungdamna, kilemna, lungduaina, mi hehpihna, gitna, diktatna, lungnemna, pumpi’ deihna khamnate (Gal5:22-23) na nei ta ding hi. Tua hileh Pawlpi kitamkham cihte i mu nawnkei ding hi.
- A PICINGTE HAMPHATNA
Satan in bang cihin na hong khem a, eite’n bang cih zawh ding cihte zong i thei ding hi. (Jeim 4:7) “Tua ahih ciangin Pasian’ ukna na mang un. Dawimangpa na kham un; na kham uh leh, note kiang pan a taikhia ding hi.”
Dawimangpa in Pasian’ kammal tawh kileh bulh lam bekbekin hong makaih nuam ding hi. Na lungtang sungah hong kituh Khaici (Pasian’ thu) hong mangngilh sak nuam hi. Ahi zongin tua na Khaici tungah kinga paisuakna in Dawimangpa na zawh nading ahi hi.
Pasian’ thu tawh a kituak lian lo khempeuh Dawimangpa hong khemna hi a, zuau bulom hi pah hi. (1Pet 5:9) “Leitung mun khempeuhah a om na u na naute un tua bang gimna thuakin a om uh hi ci-in thei un la, upna tawh kipin Dawimangpa na nial un.”
Leitung a sia semsem ahihna i muh hangin, eite a hoih semsem ding ihi hi. Eite in Leitung dandan a pai dingte hi lo a (Rom 12:2-Hih leitung mite bangin na om kei un), Pasian dandan, Kha dandan a pai ding ihi hi. Peter in a lawmte dandanin tui tungah gunkuang tawh pai ding teel lo a, Jesuh dandanin khe tawh pai ding hong kisin a, pai thei hi (Matt 14:28-29).
Leitung dan a i dam theih mah bangin Pasian’ thu tungtawnin zong i dam thei hi (John 5:1-9 Kum 38 cina). Leitung mite dan in i hauh theih mah bangin Pasian geelna lampi tawn in hauh thei veve hi (Gen 33:11- Jacob). Leitung danin ulian makai i suah theih mah bangin Pasian’ lampi tawnin ulian makai pi i suak thei hi (Gen 41:38-40). Leitung dan zui-in kimai etna tawh i maavang thei a, Pasian’ ompihna hangin i hihna khempeuh ah i daupai thei veve hi (Gen 39:3 -Joseph). Tua in leitung zawhna neih dan ahi hi. (1John 5:4-5) “Bang hang hiam na cih uh leh, Pasian’ pian’sak peuhpeuh in leitung a zo thei hi. Eite upna in leitung zawhna ahi hi. Jesuh in Pasian’ Tapa ahi ci-in a um mi sim loh, leitung a zo kua mi ahi hiam?
Midangte tungah kinga ding i hi kei hi. Lai Siangtho in hi bang ci hi. (1John 2:27) “Note na hih uh leh, ama khut pan na ngah uh Kha Siangtho sathau nilhna in note sungah kipin a om a, kuamah in note thu hong hilh ding na kisam kei uh hi”.
Kha Siangtho tawh a kidim deuhte ngak kullo a eite ding tawm thei ding hi zaw hi. Thungetna khawng simsim ding hi loin, en ngen ding ngah ding. Hong veh vo, tha hong pia dih vo, thanem lua ing ei, cih khawng omsak nawn lo ding. Hih dan nuntakna pen A PICING MI nuntakna ahi hi. Pasian in a tua ding hong deih hi. Nupa nuam, innkuan nuam, Pawlpi nuam mahmah ihi theih pah ding hi.
