Sia Khaibawi

Amasa pen in , “Dawn,” cih kammal tel gen nuam hangh. Liimlangh ah ki en lecin, na mai a gum leh a maigum na maitang na mu dinga, na nuihmai leh tua liimlangh sung panin nangma’ nuihmai mah na mu ding hi. Tua mah bangin, Jesuh pen leitungmi khempeuh a dingin, hong pai ahi hi. I dawn Jesuh kibang a, a dawn mite lungsim ki lamdang hi.Tua ahih manin, “kumsim in ka dawn hi,” cihna lel tawh na dawn leh ki lamdanna na mu kei dinga, ahi zongin lungsim takpi tawh na dawn leh lungdamna na mu ding hi.

1. Josef in Jesuh bang cih, “DAWN” hiam? (Isai.6:9; Matt.1:21-23)

Mary pen Josef adingin zuthawl piaksa hi a, a kiten tatak ma-un Kha Siangtho in Mary gaisak hi. Josef ahih leh a dik a manin a gamta nuam mi khat ahi hi. Amah in Mary maizum sak nuamlo ahih manin Mary mak sim ding hong ngaihsun hi. Tua laitakin Josef mang sungah Topa’ vantungmi khat hong kilanga, ” David suan Josef aw, Mary sunga nau pen Kha Siangtho in a gaisak ahih manin amah teenpih ngam lah kei in,” a ci hi(Matt.1:20). A manin a gamta nuam Josef adingin thu haksa mahmah khat ahi hi.

Ahi zongin Josef in ama ngaihsutna leh a khentatna sa khempeuh nusia in Jesuh adingin, nuntak hong kipan pah hi. Josef in ama’ sisan mal khat zong kihel keimah leh tangval kimlai “Pa” dinmun laak na tawh Jesuh hong dawn hi. Naungek Jesuh a vak atah dingin amah ki pumpiakna tawh Jesuh dawn hi. Josef in ama si le sa deihna khempeuh ki-ukcip hi(selfcontrol). Tua ahih manin Josef pen leitungmi khempeuh a gumkhia ding Jesuh i pianna pa hong suak hi.

I geel thute hong tangtung loh hun ciangin Pasian geelna sungah i omlam kiphawk ni. Pasian hong sawlna bangin hangsanna tawh Josef bangin lungsim hoih le kipumpiakna tawh Jesuh a dawn dingin Topa’n thupha hong pia ta hen. Amen.

2. Mary in Jesuh bang cih ,”Dawn” hiam? (Luke1:26-38)

Mary kiangah vantungmi Gabriel hong kilanga, Pasian maipha ngah numei a hihna le ama sung panin Jesuh a pianna ding thu a gen hi. Mary in nungak siangtho a hihna le zuthawl kipia sa a hihna tawh naugai ding haksa sa mahmah hi. Atawpna ah Mary in, ” Kei pen Topa’ nasem nu ka hi hi. Na gen sa bangin keima tungah hong piang tahen,” a ci hi(Luke 1:38).

Mary in Jesuh a gai ding a ut pen ahih loh hangin, Pasian’ deihna bangin a sep ding amah kizo hi. Amah in Jesuh adingin kiphal takin nungak siangtho hi mahleh a naugil zang sak hi. Mary in ama minsiat ding leh midang te zahko na dingte nangawn awlmawh zo nawnlo zah dongin Zeisu na dawn hi. Tua ahih manin Mary pen Jesuh i pianna nu hong suak hi.

Mary in a siangtho na le a hoihna pen tawh kiphal takin Jesuh dawn hi. Amah in a sepna khempeuh ah Topa’ nasem bangin kingaihsun hi. Eite in zong i sep i bawlna khempeuh ah mite’ na sem bangin kingaihsun lo-in, Topa’ nasem bangin kingaihsun leng lungkim thei-in nuam i sa mahmah ding hi. Mary bangin i hoih i phatna pen le i ut ahih loh hangin Pasian hong zat nopna munah kiniamkhiatna tawh Jesuh a dawn siam dingin Topa’n hong makaih tahen. Amen.

3. Kumpi Herod in Zeisu bang cih “Dawn ” hiam?(Matt.2:1-3)

Mipilte in aksipi lamlahna tawh kizui-in Jew mite’ adingin kumpi lian khat suak hi, cih thei uh hi. Tua mipilte in hong suak kumpi a zonna lamin, kumpi Herod kiangah hong tung uh hi.  Mipilte in kumpi Herod kiangah “Jew mite’ kumpi ding ahi naungek a hong suak pen koi laiah om ahi hiam? …….Amah a bia dingin a hong pai ka hi uh hi,” a ci hi( Matt.2:2). Jew mite a uk dingin kumpi thak a suahna thu kumpi Herod in a zak ciangin lamdang sa mahmah a, tua thu in amah lunggim sak hi. Ama kumpi tokhom a laih ding mi a omloh na dingin, kumnih nuai naupang khempeuh thatlum sak hi. Tua gitlohna hangin ama ukna gam sungah kahna aw bekbek kiza hi.

Herod in Jesuh sangin Kumpi za thupi sazaw hi. Amah in Jesuh sangin, ama aituam nopsakna ding teel zaw hi. Herod in kumpi za le a kisim zolo nuntakna luangtampi khek ngam hi. Kumpi Herod in gitlohna, hazatna, le ngongtatna tawh Zeisu dawn ahih manin, ama ukna le gamtatna khempeuh khial khin hi.

I kalsuannate ah Herod bangin Jesuh sangin min le zate teel masa kei ni. Gitlohna, hazatna lungsim, le Pasian mite tungah thusia bawl nopna lungtang khempeuh paaikhia ta ni. Leitung nate sangin Jesuh a thupi sak zo den dingin Topa’n hong hehpih tahen. Amen.

4. Nang’ Jesuh bang cih ” Dawn” na hi hiam?

Jesuh pen mi khempeuh adingin a hong pai hi a, eima mimal dawnna bang tekin i nuntakna ah hong kilangh khia ding hi. Jesuh na dawn laitakin , eima nopsakna ding le eima hamphatna ding ciang bek hilo in, Jesuh it ngaungauna lungtang tawh i dawn ding hi zaw hi. Jesuh na dawn siam kei leh, kiamsuk na le supna lianpi na tuak kha ding hi. Ahi zongin Zeisu na dawn siam nak leh kha thu taksa thu ah nopsakna le a dimlet nuntakna na ngah lawh ding hi.

” Nang’ Jesuh na dawndan lianin Jesuh in nang hong dawn kik ding bang hileh, Na lung a Kim Sawm takpi mah hiam? Na lung akim dingdan lianin, Jesuh na dawn masa Limlim dih ve! Thupha na ngahkei taak leh!!

Note: Na Limlangh sungpan in,na dah maipuak mah mumu nuam lai maw? A hih keileh a maitaii siuasiua na maitang munuam taa ??

(2020 December 25 ni zanhun sermon pan a kitom lak hi.)