Bowling Green a om Zomite in vok khawng, kel khawng i gawh ciangin hih Amishte kiangah i go sak hi. Mehkha khawng i leinate zong Amish saite mah ahi hi. Mawtaw zang lo, fon zang lo, elektrik mei zang lo uh ahih manin lamdang i sa mahmah hi. Tuma kum 20 lai a Zomite khamtunggam ah i teng lai mah tawh kibang phial uh hi. Tua hun lai-in Zomite in bel iteel hi heh lo-in gam ki-ukna hoihlohna hanga i thuak khak haksakna pawlkhatte ahi hi. Ahi zongin, Amishte in ahih leh, leitungbup a gam khangto pen ah teengin eite ading Thawng ku zya (1900) lai bangin nunta mawk uh hi. A bang thu in amaute hih ci bangin nunta sak mawk ahi diam.
Amish a kipatna
Amish biakna pen Jacob Amman (1644-1720 CE) in na pankhia-in Amish cih min pen hih a makaipa min pan kila ahi hi. Mennonite biakna pan khanglui Mennonite ngeinate a zang nuam a kemcing nuam pawl ahi hi. A upna uh ciangin Mennonite makai Menno Simons (1496- 1561) lai-atte le 1632 Mennonite Dordrecht Confession of Faith tungah kinga hi. Mennonite pan a kakhia, hih Amishte pen Switzerland and Rhine gun khanglam gamte ah tam teen zaw uh hi. Mennonite pen thu-upna lam ah khuah pai saklohna hangin kum zalom 17 sungin a paikhia uh ahi hi.
US Amish
Kum zalom 18 kipat lam panin US ah lal kipanin Pennsylvania ah teeng masa uh hi. Tua pan gamke tuamtuam ah kikhen uh hi. Gamke 22 ah kitheh thangin kum cingsa ulian 180000 kiim pha dingin ki-ummawh hi. A beisa kum 20 sungin Kentucky ah Amish mimal khang mahmah hi. Mun dang pan eimite mah bangin lal ziahziah dan uh hi. Mi picingsa 8000 val pha hi. Kentucky ah lo kiman ahih manin tua delha hong lal uh ci hi.
Upna
Amishte’ upna pen Evangelical le Fundamentalist te upna tawh kibang gai pian hi. Gupkhiatna pen ei thalawh hilo, a khawnkhonga Pasian hong piak cih pen a sang uh hangin, tha khat thu-a kisik in kikhel cih dan umlo uh hi. Nisimin Jesuh sun tetekna lam ah kikhel toto ding cih um uh hi. Tua mah bangin, gupkhiatna kitel cianna ah zong i kilam dang hi. Amish te ading gup ngah kitel cih bang omlo-in vantung tung ding le hell tung ding pen a nuntak bupsung a gamtatna tawh kizui-in Pasian in khensat ding hi ci uh hi. Hih upna hangin Khristian dangte in upna manlo, pai khial hi ci-in sim gel uh hi. Tua manin pawl khat in Khristian in simlo uh hi. Elektrik mei, TV, internet, le fon a zat lohna uh pen apua lam tawh kizom leh nin ding uh ahih manin a nihloh theihtheihna dinga a bawl a thukhun uh hi. Gal do lo ding, le galkap lut lo ding ci uh hi. Thukhen zumte ah kiciamna (swear) deih loh uhin, kipsakna (affirmation) bek zang uh hi.
Nuntak khuasakzia
Inn ah German dialect khat ahi Pennsylania Dutch zangin, biakpiakna ah High German pau zang uh hi. A tunga i gensa mah bangin mei, fon, tv, internet cite zanglo uh hi. Kumpi kiangah huhna pensian, nasep neilote’ insuaren, medicare, medicaid cihte bangmah la lo uh hi. Amau pawl sung fund pan akisam bangin kihuh uh hi. Man foto kizaih ding kham uh hi. Thukham 10 pan a nihna ah milim bawl lo ding acihna hang hi. Biakinn nei lo uha pawlpi mite’ inn ah abanbanin kikhawm uh hi. Nekledawn zong inntekte in pia uh hi. Eimite homecell tawh kibang cih theih hi.
Thukhupna
A khangto pen gam ah a teeng uh hangin, Amishte in a upna hangun tua khantohna khempeuh tang’/ngawl in Pasian maipha zong uh hi. A thuak baih ding ze-etna hi dek lo hi. Ei a khangto nailo gamte in a ngah zawhna ding ahanciam phat mahmah khantohnate ahi hi. Ei gambeel, peemta minoirty pawlte in nop isak pen i deih pen teng ahi hi. Amau gamtatna upna pen man hi, man lo hi a ci ka hi kei a, a upna tawh kizui-in a nuntakna uh thupi a sa ka hi hi. Laisiangtho sungah “A nungta upna (the living faith)” a cihte hi ding hi.
Ekkak: Religioustolerance.org, https://amishamerica.com/
https://www.courier-journal.com/story/life/faith/2013/12/26/mennonite-community-lives-quiet-kentucky-life/4210625/
