1.  Anung thu kanna

Laisiangtho sungah Foebe pen mun khat bek ah kigen hi. “Kenkhrea khua-a om pawlpite lakah na a sem, thu upna sungah i sanggamnu Foebe pen mihoih mahmah khat ahihna thu note’ theih dingin ka deih hi. Amah pen keimah a kipan mi tampi a dingin lawm hoih mahmah khat ahih manin, Pasian’ mite in a hih dingin a kilawm ahih mah bangin Topa’ thu sungah mihoihin na sang unla, note’ huh ding a kisapna khempeuhah hoihtakin na huh un” ci-in kigelh hi. (ROM 16:1-2 TDB)

2. Hih laikhak ettelna

Tua hun lai-a laikhakte a at uh ciangin tua lai a puate a kimeihset pen a ngeina khat uh ahi hi. Paul ii laikhak ah Foebe kihel ahih manin, amah pen hih Rom laikhak a puanu (Ahi kei leh) a puate tawh a paikhawmnu hi ding hi, cih kigen thei hi. Foebe cih min a khiatna in khuavak banga “Tang” (Radiant or Bright) cihna hi.

Paul in Foebe thu a gen zenzenna ahang pen Foebe ii a khristian nuntakzia leh a thupinate agen nuam na hihi.

3. Foebe a gennate

Paul in Foebe pen “I sanggamnu” ci-in khristian pawlpi mi khat a hihna, le Khrish’ sanggamnu khat ahihna a kawk ahi hi. Foebe ii sepnate a gen ciangin, “Deacon”, Laisiangtho versian pawl khat ah “Servant” cih kammalte zang ahih manin amah pen pawlpi sungah pawlpi huhsia khat bangin citak takin a kihel khat hi ding hi. Adiakin, amah pen mi citak mahmah khatin kithei-in, Grikkam in “Diakonos”, a khiatna pen “sila nasem” khat kici hi.

Foebe pen pawlpi huhsia hi-a, ahi kei zongin, Kenkhrea khua ah Khrish pumpi ahi pawlpi kilamhna ah citak takin a kihelnu hi.  Tua khua pen Korinth khua pan tai 8 (leh) 9 pawl gamla hi. Kawl laisiangtho ah “pawlpi huhsia” ci ahih manin,  Foebe pen pawlpi sungah ama kihelna pen bangzahin lian hiam cih, siang takin kimu thei hi.

4. Pawlpi ading a sepna

Paul in Foebe pen Rom aa thu-umte kiangah a sawl lai-in tua lai-a mite in amah pen a kilawm a kituakin a zindo na ding, leh Pasian kiang pan hong pai, itna siksakin pawlpi sungah kikhawl kawm ding na hantawn hi.

Adiak diakin,  Foebe pen “Pasian mi cingtaak khat ahihna tawh kizui-in lim takin a dawnna ding uh”  genin, thu-um mite pen Khrish pumpi tunga nate hi-in khat le khat kipanpihna hangin, Pasian min thangsak ding bek hilo-in, khat le khat tungah itna a khangsak semsem ihih lam thei-in, thupha ngahte  i hih ding deihna ahi hi.

Ni dangin kimuhpih ngeiloh thu-ummi ahih hangin, Pasian itna zangkhawmin kihuh, kipanpih, semkhawm, kilamsang ding hi hang. (John 13:15) Foebe pen bang vai tawh pai ahi phial zongin, Rom khua ah a om lai siah, ama ii kisapna khempeuh tua khua-a thu-um mite in ahuh ding, apanpih nadingin Paul in a ngen hi.

5. A huhsiam a hihna

Bek tham lo-in Pual in Foebe pen thu dang tampi ah zong a huh mahmah khatin na gen lai hi. Foebe in Khristian dangte hehpihna tawh itna lakin, huhin Mary leh Martha bangin zingdo siamin midangte ahuh mahmah khat ahi hi. (Luke 10:38-40)

Tua mah bangin, Tabitha (Grik min pen Dorkas) bangin mi zawngte, damlote ahuh apanpih zong hi lai hi. (Sawltak 9:36) Tua bek hilo, a lian Tonu bangin khualmite zindo  lengla do siam zong ahi hi. (2 John 1)

Paul mahmah zong Foebe ii a siangtho kiniamkhiata a sepna hangin hamphatna tampi a ngah hi. Pawlpi ah Foebe in bang panmun a len zongin, Rom 16 ah ama min a kihel pen thu-um mi taktak khat ii etteh huai, le kha le cilesa adingin hamphatna tampi asem a hihna Eite in mangngilh lo, aphawk huai den, etteh huai sia khat ahih hi.

Theih ding: “Who was Phoebe in the Bible?” a cih, Samuel Soe Lwin in Kawllai-a a let pen Zolai ah kitei sawn ahi hi.