Tu kha ading kua interview bawl ding cih endik pawl ka kikup uh ciangin, December kha issue ah nasep lam tawh (Career) kisai tawh dotna dawnna bawl khin i hih manin tukha pen la lam bawl dingin ka khensat uh hi. Ami ding ka tel uh ciangin, pasal sangin numei lasasiam mah hi leh, ka ci uh hi. Bang hang hiam cih leh, tu hun paizia pen numeite Oosapyi masak hun ahih man hi. Numei lakah zong lasasiam tam lua ahih manin, lasa sangin numei la at la phuak siam khat ahi, sanggamnu Mary Lun kong teel khia uh hi. Zomi numei zawlla at, la phuak amah bek phial amin adawk hi mai hi. Laphuak bek hilo, a sak zong siam ci pi maha siam ahih manin, tutung 2022 Kha masa ai dingin Mary Lun tawh email pan dotna dawnna ka na bawl thei uh hi. Ama tungah zong hi banga hun hong piak le hong dawngnate hangin lungdam i ko nuam hi.

AD= Agape Digest

ML= Mary Lun

AD: Na min le na tenna nong gen thei dia?

ML: Aw. Ka minpi pen Niang lun Cing hi-in ka minneu pen Mary Lun hi. Ka  tenna Haiciin khua hi.

AD: Album bangzah khumkhin na hia? Pasian la e leh?

ML: Album 4 bawl khin ing. Pasian la pen dawng 7 kiim hi inteh. Tualo a dangte bel Zogam itna, Gam ngaih la le, Love song hi.

AD: Tu laitak bang la na at/ na khum laitak ahia?

ML: Tutak bel Pasian la leh Gam ngaih la tam at pen ing.

AD: La dawng bangzah at khin na hia? Pasian la e bangzah?

ML:  Ka la phuah vekpi gawmin Dawng 11 phuak ing, tualak ah Pasian La dawng nih phuak ing.

AD: Bang huna kipan la at na hia?

ML: Ka laphuah masak pen kum 20 kiim ka phak laitak hi.

AD: La at ciang bang haksatna khawng om thei ahia?

ML:  Laphuah dan bel mi khat leh khat I phuahzia le haksa isak bel kibang kim lo ding in ngaih sun  ing. Kei a dingin bel Haksa kasakna cih lian, Pasian thupha tawh om tuan kei, cih ding hin’teh, tu  ciang ciang.

AD: Pasian la le zawlla na at ciang, a kilamdangna bang khawng ai tam?

ML: Pasian la leh Zawl la kilam danna ah bel Pasian la pen la dangte tawh tehtheih ngait loh Pasian  kammal ngait Laisiangtho sung pansan a ki phuak khia Pasian thu, Pasian hong itnate hi in, la dang  tawh tehtheih loh in ngaih sun ing. Gamngaih la Love song te bel atom in gen leng, leitung la  cihdan hilo dia. He hee hee…

AD: La dawng khat at theihna ding  bang khawng kisam ahia? Gen: lakam theih kul, Laisiangtho thei kul, sim kul, lawm ngai ngei ding, muzik tawmtawm su thei dg, cih dan..etc.

ML: La dawngkhat at theih nadingin mihing khat leh khat kibang lo dingin ngaihsun ing. Ahang  pen khat in guitar tum thei-in, la phuak theih pah. Pawlkhat te’n lah guitar thum theilo- in, la at thei  ve ve cih dan a tuam tuam om in, ahizongin a tawpna ah bel music lam tawh kisai  hitheih/tumtheih khat limlim neileng, laphuah na ah a hizong, lasakna ah ahizong nop tuam mahmah inteh.

AD: Na nu lam ai zong, na pa lam ai zong, la phuaksiam a om hia?

ML:  Ka nu le ka pa bel la na uk mahmah un, zong phuak tuak uh.  Ka nu’n bel dawng tam phuak kei in,  ka pa’n bel tampi tak phuak mah.

AD: Na la phuak theihna pen na sin tawm ahia? Aih kei leh, hi dana phuak thei ziau na hia? Nang lam pan hanciamna cihdan a om hia?

ML: Ka laphuah theina bel sinna nei keng, Pasian hong piakngiat talent hi.

AD: Numei lasa siam a tam mahmmah hang, la at tam het lo. Tua lakah zawlla at pen tam lo kankan lai cileng. Tua kawmkal ah bang na cih leh, zawlla at thei na hia. Na haksatnate nong gen thei dia.

ML: Zawlla ka phuah theihna a bulpi in bel kei tuahkhak thu le, lawm le gualte phutkhak/tuah  khak thute tung pan hong piang khia hi.

AD: Numei khat na hihna tawh pasal lasa dangte lakah nenniamna, simawhna, neu-etna, haksatna na thuak ngei hia? A kicingin nong gen thei dia, a om leh?

ML: Pasian hehpih na tawh tuadan om lo cih di hi.

AD: Hi thei bang hi leh, na laphuakna ah hong huhzaw sem dingin bang khawng kisam, sin beh nuam lai na hia?

ML: Sofa leh music siam mahmah leng tampi tak nop tuam kha inteh.

AD: Tu’n zong Pasian la khawng phuak ta cileng, mailam ah zawlla at lai, na sa lai dia?

ML:  Ka laphuahte pen Pasian hongpiak ngiat hi-in ama deihna bang hong suak dandan hilel lo dia.

AD: Na pianthak zia tawm nong gen thei dia?

ML: Ka neulai in sunday school ka kah lai a ka Syapa un Zeisu a it numei no thu hong genna pan ka  lungsim hong lawngden in tua pan a piangthak hi’ng.

AD: Pandemic hong kipata kipan it le ngaih, makai tampi in hong nusia cileng, hih tawh kisai na phawk thak, na lungsim hong sukha thu, na muh thak a om hia.?

ML: Nuntakna hu hong kawm i Biak Pasian hong itna le a manphatna tel semsem ing.

AD: Numei la at nuam khangthakte ading na gennop a om hia?

ML: Ei Zomi sung ah numei lasa, ahizong laphuak a hizong, music tumsiam a hizong numei kitawm lua  lai mahmah ahih manin, lasak lam music tum lam laphuak lam cihte ah hanciam ngait ding  lunggulh le hong deihsak mahmah ing.

AD: Laisimte le nang ii fante tungah gen nop a om hia?

AD: Hi cibang hunhoih hunpha hongpia ih Biak Pasian tung ah lungdam thu ka ko a, tuni hunnuam  tak nong zatpih man un zong lungdam hong ko ing. Ka tangthu tom no hong sim sak mimal kim  tungah zong ka lung dam mah mah hi. Ka Lungdam lua …..Mary Lun