Thu masa

Zomi Nam Ni thu I gen ding ciangin tua ni anei Zomi Namte thu tawm genmasa lo-in a Ni thukia tawh vuicing theilo hi.  Cope Topa in Zolai hong bawlsak masiah Zomite in lai neilo I hih manin I tangthu  a kikamgen(Oral) vive leh lai anei namdangte(eg. Kawlte, Mangkangte etc.) in amau hong lawhna leh muhna bangin ana ciamtehna uh omsunte bulphuh I tangthu kisut ahih man in gendan a kibanglo zong omthei zeuhzeuh hi.

Zomite pusuah cilna

Zomite pen Sen gam, Tibet pan in 3000-2000 BC kim in Kawlgam lut in irrawati gun leh Chindwin gun kuamteng ah na teng uh hi. Tua pan in Kawlpi (Khawlpi) ah, tua pan in Ciimnuai ah, Ciimnuai pan in mun tuamtuam ah kikhenthang I hi hi.

Ki-ukna

Mangkang kumpi hong khan masiah Zomite mi namdang khatpeuh ukna nuai-ah a-omngeilo,  ei gam ei leitang tungah  ei le ei a ki-uk, a suakta minam I hi hi. 1885 kum Kawltein Mangkang gal lel uh a, British khut sung tungin, India uk sungah kikoih hi. Tuakhit ciangin Zogam hong simleuleu uha,  1893 kum in Tonzang Innpite man in Rangoon puak uh hi. 1895 kum a kipan in gamkek British-te  khutnuai kitung hi. Mangkang kumpi in 1896 kum a kipan Kamhau upadi kici Chin Hill Regulation Acts bawl  uha, Ukpite tungtawn in Kamhau Upadi tawh ei le ei hong ki-uk tuam sak uh hi. 1917 kum in Zomi galkap 1033 te in Piantit  (Germany) ah Mangkang kumpi gal huh in na kuan uh hi. 1937  kum in Mangkang kumpi in India gam sung pan in Kawlgam ki-ukna tuam(a crown colony) in khenkhia uh a, Zogam phelnih kisuah in India le Kawlgam ah Zomite I kikhen kha hi.

Kawlgam Zomite le Kawlgam Mangkang ukna sung a om minam tuamtuamte in 1947 Feb. 12  ni in Kawlte tawh suahtakna lakkhop ding thukimna Pinlong Agreement bawl uh a, tua hangin  akipawlkhawm gam (Union of Burma)hong piang hi. 1948 Jan. 4 ni in Mangkangte tungpan Kawlte tawh suahtakna (Independent) I lakhawm a, Kawlgam I suak hi.

Zomi Nam Ni hong  pianna

Zogam pen asuakta gamkhat hita ahihna dung zui in bangci kalsuan a, kibangci uk ding cihtawh kisai   Zogam amunmun pan  makaite 1948 Feb. 20 ni in Falam ah kikupna  na nei uh a, mipi thuneihna Dimukrisi tawh ki uk dingin na thukim uh hi. Tua ni pen 1950 Oct. 09 ni in Chin Affair Council in , “Zomi Nam Ni”  in ciapteh uh a  kumpi zumkhak (National Holiday) ni hisak uh hi.

Pawlkhatte in Feb. 20 ni Zomi Nam Ni pen Ukpite thuneihna kibeisak ni, agen uh a tua tawh kisailo hi. Mangkang kumpi in suahtakna hong piak ding ciangin Ukpi ngeina zong beisak in  amau khut nuai pan gam uksawn Ukpi khempeuh zong compensation (zawzi)  pia uh hi. Ukpi ngeina abeisak pen Mangkang kumpi hi-a, Zomi nam Ni pen a suakta minam I hihna tawh kizui in Democracy tawh kalsuan ding kithukim ni a hi hi.

Thukhupna

Zomi tangthu sungah Hunpi 3 om a, tuate in; 1. Mangkang hunma-in ei gam ei leitang tungah  ei le ei ki-uk a suahta (free/ independent) minam I hi hi. 2. 1895 pan Mangkang  khutnuai I tunga, sal ( slave ) I suak hi. 3. 1947 pan Kawlte tawh liangko kikim dingin suahtakna I lakhawm a, 1947 Feb.20 ni in Democracy tawh kalsuan ding thukim himah le hang netcip, gakcip(bound) in ki-om hi. Mangkang kumpi khutnuai I tun a kipan I saltan zawh kum 127 cingta hi.

2022 Feb,20 ni Zomi Nam Ni ah I kipawksak nop thu-in, Zomite pen midangte mah bangin gam le lei nei in ei le ei a ki-uk minamte I hih banah ki-uk cipna adeihlo, 1947 laipek in Democracy atelkhinte I hih lam kiphawk kiksak nuam hi hang. Abeisa I hihnate lungngai kik in I lunggulh suahtakna leh mimal hamphatna ahilo minam hamphatnate I ngahna dingin thungen in mapang ciat ni.

Sia  Pauno