1. A cihtak mahmahna

Ruth le Naomi kikala om cihtakna pan sin ding lak theih ding tampi om hi. Amah pen Moab numei khat hi-in Israelte khat tawh a kiteeng ahi hi. Moab gamah a omkhop lai pekin a pasal le a teekpa in sih san hi. Tua ciangin a teeknu  a gam a lei ah a ciah kik ding hun ciangin a mipihte kiangah a khawl ding ngakpi takin ahanthawn hi. A diakdiakin Naomi in Ruth adingin a mah pen bangmah ahih loh lam, le Judah gam tung mah leh uh zong lamet ding bang mah a om loh lam kiciantakin a gen hi.

2. Siang takin a khentel theihnu

Naomi in bangbang a cih hangin, Ruth in Judah gam ah zuihkhuan a piakna ding le Moab gam ah a nusiat lohna dingin a ngen hi. Adiakin “Ahih hangin Ruth in, “Nang kong nusiat nading ahi a, nang zuihna panin ka ciahkik nading ahi zongin hong cici nawn kei in; bang hang hiam cih leh na paina-ah ka pai ding a, na giahna-ah ka giak ding hi. Na mite keima mite hi ding a, na Pasian keima Pasian hi ding hi. Na sihna-ah si-in ka kivui ding hi. Sihna cih lohbuang thudang hangin kong nusiat taak leh Topa in kei hong dawm kei ta hen,” a ci hi. RUTH 1:16-17 TDB

A tunga laisiangtho mun enleng, siang gen mahmahin, zong zahtak huai kasa hi. Adiakdiakin nulepa kiteeng kiciamna bangin Ruth in Naomi kiangah kiciamn kam zang hi.

3. Innkuanpih lungsim

Ruth in Naomi tungah innkuanpih lungsim maan nei hi. Teek le mo-in kum tampi tak omkhawm khin uh hi. A pasal a sih khit ciang na nawnin tua a cihtakna pen len tinten lai hi. Tua hang mahin “Ahih hangin Boaz in tua nu dawngin, “Na pasal a sih khit a kipan na teeknu a dingin na sepnate khempeuh, le na nu le na pa le na pianna gam nusia-in cikmahin na theih ngei loh mite kiangah na paina thu a kicing takin kei kiangah hong kigenzo hi (RUTH 2:11 TDB)” ci-in Boaz in  a phat mahmah lam zong in i thei kim hi.

Ruth in Naomi pen nu bangin kemin a ompih pen lamdangin, Naomi adingin ama mailam ding khempeuh a suplawh ngamna pen tua sang lamdang zaw kan lai hi.

4. Akho akip kiciamna

Naomi tungah Ruth in a nuntakna bup ap ngiat hi (Ruth 1;17). Ruth in Naomi nung a zuih ding a khentatna ah Naomi pen Pasian zahin a ngaihsun ahi hi (Ruth 1:16).

Ruth in Moab pasiante nusia hi. Tua pan Naomi tawh a nungta Pasian khat bek a bia hi. Hih lai mun ah Ruth in “Na sihna-ah si-in ka kivui ding hi. Sihna cih lohbuang thudang hangin kong nusiat taak leh Topa in kei hong dawm kei ta hen,” a ci hi (RUTH 1:17 TDB).”

Adiakdiakin a nungta Pasian tawh kisai-in “kiciamna” kam azang hi. Hih thu Naomi in a theih ciangin Judah gam ah a zuih ding vai bangmah kam pau nawn lo hi. “Tua ciangin Naomi in amah a zuih ding a lungsim a khentatna a muh ciangin bangmah ci nawn lo hi (RUTH 1:18 TDB).” Tua bangin Bethlehem lam hong zuankhawm uh hi.

5. Pianzia a tuampian

Ruth le Naomi kikal, le Naomi le Orpah kikal kizopzia kilamdang hi. A gam uhah a ciah kik ding a gen ciangin Orpah in “Tua ciangin amaute a kap kik uh hi. Orpah in a teeknu namin ciah a, ahih hangin Ruth in a teeknu beel hi (RUTH 1:14 TDB)” cih kimu thei hi. Tua mah bangin Ruht kiangah a gen ciangin “Tua ciangin amah in, “En in, na sanggamnu a mipihte le a pasian-te kiangah ciahkik khin hi. Na sanggamnu’ nungah nang zong ciah in,” a ci hi. Ahih hangin Ruth in, “Nang kong nusiat nading ahi a, nang zuihna panin ka ciahkik nading ahi zongin hong cici nawn kei in; bang hang hiam cih leh na paina-ah ka pai ding a, na giahna-ah ka giak ding hi. Na mite keima mite hi ding a, na Pasian keima Pasian hi ding hi (RUTH 1:15-16 TDB)” ci hi.

Tua manin a khuah mahmah khensatna tawh Ruth in a teeknu zui-in Israel gam ah pai ding khensatin Moab gam anusia hi.

6. A thumaan cihtakna

Ruth le Naomi tangthu ah a thumaan cihtakna in ei zong i cihtak leh, “Hi bangin piang ding hi” ci-in hong gen ahi hi. Tua banah Ruth nuntak ah itna, zahtakna, kiniamkhiatna cih bang gamtak hoihte kimu thei hi.

Ruth in Naomi leh Pasian a zahtak mah bangin eite in zong Pasian le Pasian’ nasemte tungah tua bangin hih leng kilawm ding hi. “Thudang khempeuh sangin Pasian’ ukna le ama deihna na zuih theih nading uh thupi ngaihsut masazaw un. Tua hileh hih na kisapna dangte khempeuh uh zong hong piathuah veve ding hi (MATTHAI 6:33 TDB).” ci-in Jesuh in zong tua mah bangin gen hi. Ruth in Pasian masak ahih manin Pasian in zong a kisapna khempeuh kicing takin a sik hi (Ruth 4).

7. Nuntakna sungah thupi pen

Ruth le Noamite kikal kizopna pen thupi mahmah hi. Adiakin mi le mi kikal sangin, Pasian mai ah a cihtak lam gen beh ding kulin um keng. Bethlehem a tung uh ciangin Pasian in Ruth pen pasal pia-in tanu tapa tawi sakin David kumpipa ii pupi, pipi mun naleng, Pasian in a pia hi. Ruth in Moab minam hi-in a kipampaih minam hi napi, Pasian in ama nuntakna tawh tangthu lumletin thupha pia hi.

Samuel Soe Lwin

(Samuel Soe Lwin ii Kawllai-a  a kamlet  “What can we learn from Ruth’s loyalty to Naomi?” pen Zolai-a a kilawm dingin a kilet sawn hi. )