Thu masa

Kumthak zawh kha 2 sungin I tenna leitungah thulela tampi hong piang hi. Leitungbup in I buaipih Covid-19 zong veng mannai lo, gam tuamtuam hong kibuai-in gam le gam kidona ciang dong hong piang hi.  I lamet loh kal mahin vanman zong hong khang hiathiat hi.  Hun haksa kawmkal mah ah Pasian in hong ompihin March (Dota kha) sungah cidamtakin hong tonpih bek thamlo, Zomi Agape Pawlpi kum 7 cinna hun manpha mahmah hong zang theisak Topa tungah lungdam I ko hi.  I lo kuanna ciat panin zong i bawngpi nawi a gau pen laitak lah hi-in Anpal i kaihkhop hun zong hong hi hi.

Pawlpi i cih

“Pawlpi” i cih “CHURCH” kammal pen sanggam Mizote le Falam lamte in “kohhran,” na ci uh hi.   Greek kam in, “ekklesia,” hi a, akhiatna pen “Saptuam”, “Sapkhiat”, cihna hi-in Mikang kamin “Call out,” ahi kei leh, “assembly,” zong kici hi. Tua Greek kam “ekklesia,” I khiatna le deihna taktak in, “Saptuam,” mun khat panin mundang khat ah atuam vilvel dinga  kisam khia,” cihna ahi hi.  Leitung cilesa deihna panin Khasiangtho deihna ah Satan kiang pan Pasian kiangah, Leitung pan in Vantung ah  samkhia-in kituamkoih cihna ahi hi.

Thuciam Lui sungah Pawlpi (Church) cih omlo hi. Thuciam Thak sungah Pawlpi (Church) cih kammal azang masa pen Topa Jesuh ahi hi.  Mt.16: 18 na sungah “Hih suangpi tungah ka “Pawlpi,” (CHURCH) ka lam ding a… ci hi.  Jesuh in ka Pawlpi ci ahih manin Pawlpi pen ei neihsa hilo-in Topa Jesuh neihsa ahi hi.  Founder pen Jesuh hi-a, mihing hilo hi. Pawlpi pen Jesuh in ama sisan tawh a tatsa, aleisa hi a, Ama neihsa hi bekthamlo-in a kilamna Suangpi pen Amah (Jesuh) mahmah a hi hi.

Topa Jesuh asih zawh ni 3 ni-in tho kik a, leitungah ni 40 sung omin van a kah zawh ni 10 ni khit, ni 50 a cinni-in khasiangtho hong kibuasuk hi. Tua pentecost ni-a, Peter thugena tungtawn pan apiangthak, Khasingtho ngah mi 3000te tungtawnin Pawlpi hong piang hi. Peter in Aramic pau tawh thu a gen pen minam 16te in amau pauciatin za uha, Khasiangtho ngahciat uh hi. Tua ahih manin  Greek kam in “ ekklesia,” a kici Pawlpi pen a founder Jesuh  hi-in, Pawlpi mi(Church member) pen khasiangtho ngah thu ummite khempeuh ahi hi. Namkhat pan gen leng, Pawlpi pen “Khasiangtho hong tun man a, a piang hi,” zong kici thei hi.

Anpal piakna

Anpal  piakna  i etciangin Thuciam Lui sungah  anpal (gah masa) peuhmah Siampite khut sung na tungsak uh hi.  I pu I pate in lo pan a piang gah masa I min I tangte gitta le pute bek in ne masa uh hi, ci uh hi.  Lamphung le Pute kineh zo lo ci uh hi.  Pute zahtakna kuama nekma-in anpal peuhmah Pute kholh masa uh hi.  Tua mah bangin Pasian I theih teh anpal peuh mah Biakinn kitun masa hi.  Tua hi a, thupha hong kipiak manin   ankungte hong hoihin gah hong suanga lawhcing  himawk I hih manin tua thupha hong pia pen tungah  a piang masa, agah masa tawh lungdam ko  ihi hi.

ICor. 15: 20 na sungah I et ciangin Jesuh pen misite lak panin a tho masa anpal ahi hi. Topa min tawh anpal I piak ciangin zong Jesuh  misite lak pan a tho masa anpal bek hilo-in ama thawhkikna hangin ei thu-um mite khempeuh zong hong thawhpih lai ding ahihna I kipsakna biakpiakna zong ahi hi.  Anpal I piak ciangin mi tungah a pik kihi lo-in a thokik anpal masa Jesuh Pahtawina-in Pasian tungah kipia ahi hi.

Thukhupna

A tunga I gennate ommah bangin Pawlpi (Gk. Ekklesia) hong pianna a bulpi le Pawlpi anei pen Jesuh ahih mah bangin  Jesuh mahmah anpal, eite tangin Pasian tungah a kipia masa le athokik masa anpal hi a, anpal I piakciangin  amah(Jesuh) I pahtawina  ahi hi. Amah pen na khempeuh a kipatna le na khempeuh  a tawpna, Alpha le Omega ahi hi.

Endik pawl