Pasal pawl khat in  zi hong neih tak uh teh a zi ading in aki tuak mel lo  pasal pawl khat om thei a, tuate lak ah gankawi na tawh anak hauh mahmah Nabal pen a zi tawh aki tuak lo pasal khat ahi hi. Nabal i a zi pen Abigail hi-in  karmel mual kim  ah  tuu khawi-in  a teng uh ahi hi. Abigail’i thu pen Laisiangtho thuciamlui ah David Isreal kumpi asuah ma kumpi Saul in that dingin gamsungah  anung delhdelh hun laitak aki ciamtehna 1Samuel 25 sungah kimu thei hi.

Nabal’ zi pen melhoih in pil le tei a thuah  Abigail  ahi hi. Abigail pilin a tei dan pen  Laisiangtho athukkan khia Hertbert Lockyer in hih bangdanin na  gen hi . “Vantung pilna hi-in vantung thu theih telna nei in amah leh amah a ki-ukzo (self-control) ,thu  khentel theihna leh mailam thumuhkholh theihna nei-in mi zalian ukna thunei ulian khat  peuhpeuh i‘tungah  thumuamh zawhna  tei na nei-in numei thupi mahmah khat a hihna amah le amah in  akilak khia zo numei  hi” na ci hi. 1Samuel25:3

Ahi  zongin a pasal Nabal leuleu pen (V10)   siatpi a, a sia akhansia, akiliansak akihihsak, Kua mahmah a awlmawh lo ama thu  bek thupi akisa, amah le amah aki-ukzo lo mailam ah bang thu hong piang thei ding cihte khualna aneilo  zukham thipthep khawng nuam asa, a hehna khawngte apau khia liauliau mi khat na  hi citciat hi.

“Hih mun ah phawk ding thu khat, Nabal kihihsakna ahi hi( Paunak6:16-19 ). Pasian in akhah khong ngeiloh thu sagih acih om in tuate lakah ( V17 )na kihihsakna  ahi hi. Ki hih sakna cih pen ei le ei  midangte sangin asang zaw bangin kingaihsutna, midangte in hong pi bawl ding ut denna, le mi khat peuh tungah kampau khauh zanga pau giapgiapna, na asa  kha kei tam cihte khual selo a, kam pau liauliauna, akha theithei-in  midangte tungah dawn kik bakbakna cihte ahi hi. Nabal zong na kihihsak kha-in David tungah awlmawhlohna kammal a pauna hangin Pasian in ama tungah gimna sihna ciangdong na tung sak mawk hi. (Rom12:3) David’ bilkha ah amang theilo akha velval ding kammal pawl khat om a, tuate “David na cih uh Kua hi-a, Jessi Kua ahiam?”

1. Tuu a cinna gamsung pan hong paikhiat thingtheng lai-in Goliath mai ah a ding tiuteu laitak
2. Kumpi inn sung pan taikhia-in gamsung ah Sual in that dingin anung delhdelh laitak
3. Gamsungah  gilkial dangtakin An leh Tui Nabal kiangah huhna a nget laitak

David Kua hiam? Jessi kua hiam?    Aki cih denna pen ahi hi. A pa Jessi min a kilawhsak sialin David in nasa phadiak ngeungau leh kilawm hi. Banghang hiam cih leh, i naupan lai-in sanginn khawng panin ikhangualte’n mite lak ah i pate’ min khawng peuh tawh  maizum sakna dingin hong bawl theimawk uh a, i naupan lai ahihmanin kikhasia ngeungau-in  kimaizum peuhmah kha thei hi.

Karmel mual kim gamsungah  David le  a galkapte  a om laitak un,  azat ding ding an le tui ahi-a, sa ahi zongin huhna ngen dingin Nabal kiangah a galkap sawmte David in sawl hi. Ahang pen David in  gamsungah  Nabal’ tuucingte hoihtakin huu-in panpih ngei hi. Tua  hangin David in ama lungsim ah “huhna ngen leng, hong itsik ngam buang sam ke’n teh” cih lametna nei kha ding hi. Ahi zongin huhna ngen in apai David galkapte Nabal in huhna na  pia cih genloh, na thusimlo-in “David kua hiam? Jessi kua hiam ? Ka thei ngei kei hi”na cih san liuliau zaw sawp hi. Galkapte in athupiang teng David tungah a gen kik uh takteh, David in  Nabal tuucingte ahuhna amaute tungah adikna akhualnate  ngaihsun kikin asangnau peuhmah kha ding hi.  “David kua hiam ?Jessi Kua hiam?”Aki cih den pen ngai zo mahmah nawnlo hi ding hiven, ahehna  khamzo nawnlo-in Pasian deihna bang hiam cih na ngawn   phawk kha nawnlo liangin ( out of self control) tha khatin a namsau manin agalkap 400 te tawh kithawi-in Karmel ah Nabal vasim ding, thupia a, amah tawh aki zom mi khempeuh zong sumaimang ding, amah zong hawi vet lo ding, ci’n  hong kuan khia maita hi.

David hong kuankhiatna thu Nabal’ tuucingte khat in na thei kha ahihmanin, nawhsa takin hong tai vingvengin a Pi Abigail kiangah “Pi aw, ka Pu kiangah David in huhna hong ngensak a, na theih sa mah bangin ka Pu haina in David hehsak ahihmanin tu-in hong sumaimang dingin hong kuan khia uh hi. Amaute mi sia hi lo hi, gamsungah ka om lai un kote bangmah hong cih lo-in hoih takin hong limbawl mahmahte hi uh hi . Hih thu thei inla  nasep ding thei ta in, ci’n a gen khitlian teh,  api Abigail zong apasal Nabal’ thu ngaihsunmel lo-in agamtat siatnate thei lua lel ahihmanin amah  va hilh nawn se lo-in manlangtak kithawi tingtengin, anlum lum zanih, leenggahzu savun thawl nih, a han minsa tuu nga, ankan lawh nga, leenggahkeu bawk zakhat, le theimoh zanih la-in late tungah tuate guansak pahlian hi. Lamkal ah David a dawn tuah dingin kuan khia pah vingveng hi. Abigail in David a muh teh, a la (sabengtung/Mizo, donkey) tungpan tuakkhia-in leilak ah boksuk pahlianin David khephungah thum pah hi.

Laisiangtho sungah Abigail in David tawh akimuh ma-in  thungen phot hi, aki cihna lian a om loh hangin Abigail in thu ngen masa phot hi ding hi. Banghang hiam cihleh,  David kiangah a thumna azat kammalte panin  kimu thei hi. “Ka topa aw,  huhna hong ngenin nong paisak na mite  kei tawh na kimu khak loh manin ka pasal ahai kampau kha hi a, amah ahih leh amin mah sunin ahai gamtat ahi hi. Kei ma mawhna hi. Topa a nungta ahih mah bangin, nang zong na nungta hi. Hih ahai gamtatpa  siatnate, nang in siatna mah tawh thuk  kik kei in. 28 Na nasemnu’ khialhna hong maisak in, ci-in kong thum hi. Bang hang hiam cih leh nangmah in Topa’ galte do na hih manin Topa in na suanlekhakte kipsak paisuak ding a, na nuntak laiteng nang sungah siatna kimu lo ding hi. 29 Nangmah delhin hong that dingin mite hong kipat leh, nang pen Topa na Pasian’ kepna sung a hing mite lakah na om ding a, amah in suanglotna tawh lotkhiat bangin na galte lawnkhia ding hi. 30 Topa in nangmah tawh kisai thu a hoih a gente khempeuh tawh kizui-in hong hihin, Israel-te tungah ulianin nang hong koih khit ciangin, 31 thu om lopi-in mi thahna ahi a, nangmahmah in phulakna hangin ahi zongin, dah nading thu ahi a, lungsim nat nading thu ahi zongin na nei kei ding hi. Topa in limtakin nang hong bawl ciangin na nasemnu hong phawk in,” a ci hi.  Hih Abigail in David tungah agen khiat kammal bang tektek in Sual in David mai ah ki-apna (surrender)  aneih laitakin hih kammal  teng na pau khia takpi mawk hi . Tua ahihmanin Abigail pen  mailam thu muhkholh theihna aneih lam hih teng panin kimu thei hi.

Abigail’pilna le teina in David’ hehluat mahmah nateng beimangsak hiau-in tuisuak sak lian a, Pasian mai ah a khialh gamtat  dektakna teng  kiphawk khia sak lian mawk hi. Hih mun ah David in Pasian lungtang tuak hi, aki cihna  kilangh mahmah hi .Tua pen Pasian  tungah lungdam akoh masak pahlianna ahi hi. Ei thu ummite in i etteh ding a thupi mahmah in Topa tungah  lungdam kohna masak tangtang ding ahi hi.  “Tuni-in keimah a dawn dingin nang a hong sawl Israel-te’ Pasian, Topa in thupha ngah ta hen! . mi thahna le keima khut tawh phulak nading panin keimah hong kem nangma ngaihsutna in thupha ngah ta hen!” ci in Abigail’ thumna sang hi. David in a masa penpenin  Pasian min phat pahin thupha pia pahlian hi. Azom ah   Pasian’ mizatnu le a ngaihsut siamna pahtawi-in thupha pia leuleu hi . Hih tengah i phawk ding in ei thu ummite in zong i khialh nading panin hong len i Pasian min phawkin lungdam ako masa pah theite hi leng uthuai kasa a, a zomah i khialhna hong phawk khiasak thei mite tungah lungdam koh a masak pah theite hih ding zong i kisam hi.

NABAL IN A LIPKHAP HUAI MAHMAH SIHNA DING NA PHAWK KHA HIAU LO

Abigail inn lam zuanin ahong ciah kik takteh a inn ah apasal zukham dihdiah sa-in na om philphialin, thuman thutak bangmah bangmah kigenpih thei nawn ta lo hi. Ahi zongin Abigail in Nabal a pil kik hun ngak  hithiat phot zaw ahi tam, a zingsang ciang bekin azanni thupiang teng a pasal genpih pan hi. Hih mun ah i etteh ding Abigail in a pasal bang hun ah thu kuppih ding hiam?. Ei tapidaw nupite in e leh ? Bang hunin  i pasalte thu le la kikuppih ding ihiam? Paunak 15:28 Mihoihte in a kampau ding ngaihsun phot a, (paunak 21:23 ) kampau a ki-ipzote Lungkhamna tawh kipelh hi. Laisiangtho Pasian kammal tawh kituakin agamta siam tapidaw nupite ihih ding ikisam pha mahmah hi. Abigail in a pasal tungah athupiang banglian teng hong gen takteh Nabal nak pitakin lauh le lin, le heh  thuahin puksukin gawnggaw cip hi. Laisiangtho in suangtum suak hi, na ci liang hi. A tawp khakna ah Nabal ni sawm sungdong dam kik tuan lo ahih manin amah si hi. Nabal a sihna thu David in azak  tak ciangin (v39-40) hih bangin ci hi . “Nabal khut tung panin ka ngah zah kona hong thuk kik sak, mi thatin khut khial ka hih nading panin hong lenkik Topa in thupha ngah ta hen.”  ci in Topa mah na masak pah hamtang hi. David pen Pasian lungtang a tuakpa akicih ding mah na hi mawk hi! Sia Pum khaw Thang’ laphuah bang ngei-in “Nonglamto eklei panin” Zogam leitang kenlak guamlak leivui lak pan Zomite hong lamto  Zomite Pasian, Israalte Pasian in thupha ngah ta hen.   Hallelujah Amen!!

David  in amite sawlin Abigail ama zi dingin hel sak hi. Hih mun i et ciangin Nabal in ama nuntakna bek sih lawh hilo-in anung sangah  aneihsa teng le a zi na ngawn tan lawh hi. Abigail pen  Pasian nasep zia theihtelna anei numei pil khat hi, cih thei sam napi, Nabal in a zi Abigail bangmah kamkup pihna na nei hetlo mawk hi. Tuhun  tapidaw papite in e le i  zite  kamkuppihna inei ngei zel sam hiam? Ahi kei leh, sawltak Pual in Efesa khua pawlpite athu hilhna  Laisiangtho mun khat bek la-in (Efesa5:23-24) zite tungah kei  bek a thu nei pen hi ing,  ci kha den zaw i hiam?. Tua bang  tapidaw papi pawl khat om gige thei hi. Hih laisiangtho mun bang kip let peuhmah bilbelin a zite’ thu a don lo liuliau pasal pawlkhat  ki om kha mai mawkmawk  hi. Tua bangte man lo hi. Hih thu akitel khialh khak  hetloh nadingin nungzuipi Peter in limpha takin na gen hi.(1peter3:7)  “Na zite uh na zahtak bawl un, tua hileh na thu ngetna uh bangmah in hong nawngkai sak lo ding hi.” Tua teh tapidaw nupi  pawl khat  ta leuleu in apasalte uh athu uk zaw zong na om veve thei hi. Tua bangte zong na thuman tuanlo hi cih phawk ni .(1Timoti2:12)  12 Numeite in pasalte tungah aana nei-in thu a hilh ding ka phalkei hi. Sawltak Pual in ukna ki thu neihsak na cihte a om lohna dingin ( equal right a hi lo,  right position) eima mun tek ah  om theiding a deihna tawh teltakin ahong genna hi zaw hi. Pasalte mun a om mah bangin zite mun zong om a, eima muntek ah i om theihna pen  kilemna’ zungpi khat hi pah hi. Tua hi-in zite mun ah zi thuneihna akoih siam pasal pen pasal pil hi dinga, pasal  mun ah pasal thuneihna akoih siam zi zong zipil mah kici ding ahihmanin Pasian thupha piak innkuante suak pel mawh ding hi.

Theihsak na

hih  bang dan zi leh pasal kikal haksat na a nei khate in zum ngaihsut lo-in laisiangtho siam siapite ahih kei leh na muan uh Laisiangtho a siam khat sam unla ki gen khawm sak un. Khat bek in thulang ama lam bek gen cihte hih kei un.

 The Beauty and the Beast

Laisiangtho sunga Abigail leh Nabal te thu pen  movie minthang sim tham khat ahi  America ah a theilo a om lo phial ding The Beauty and the beast movie tawh  kibang hi ci in mipawl khat in na genteh uh hi. A pasal bel awlmawh mel neilo-in zu khamkham  ihmu mu, innsung buaina’ng tuamtuam bawl tawm den hi mahta  leh, a zi in nusia-in tai san ning ci peuhmah lo-in kiniamkhiatna lungduaina tawh innna sep ding akilawm teng citak takin apasal a dingin sep sak lel hi, ci uh hi . Hih mun ih et ciangin  nungzuipi Peter in tapidaw nupite omzia ding hong hilhna i phawk hi.(1peter3:1-2) Zite aw, na pasalte uh Pasian thu um lo ahihkhak leh, na gamtatna hangun Pasian thu a uptheih nadingun na pasalte uh thu na mang un. Kampau kul sese lo-in, 2 na gamtat hoihna uh a muh uh ciangin Pasian thu hong um ding uh hi. Tuhun Christiante lak ah thupiangte i et ciangin zite le pasal kikal buaina, tate le nulepate kikal buaina khang semsem hi, cih kimu khia hi. I langhpa in Pasian zahtakna abei semsem theihna dingin Christiante’ innkuan sung mah pan  suksiat kipat ding gel tawntung hi leh ki lawm hi. Tua ahih manin sawltak Pual in Krete gama a om pawlpi nupite kiangah hih bangin na vai khak hi. “ Tua mah bangin mite in Pasian’ thu a gensiatkhak loh nadingun numei khanghamte zong a gamtat a khuahek uh a zahtakhuai ahih nading, mi gensiate ahih loh nading, zunek kiphamawhte ahih loh nading, thuhoih thupha hilhin, 4 amaute sangin a nauzaw nupite in a pasalte uh le a tate uh a it nadingun a hilh ding, 5 thu ngaihsun thei, a gamtat siangtho, inn nasep a kizen, a migi, le a pasalte uh thu a mang thei mi ahih nadingun na gen un.” Acihna (Titus 2:3-4) sungah i muh theih mah bangin i hihna khempeuh ah lamlak makai lungsim pua-in Khrisht hong itna akilang khiasak mimal kim ihih zawhna ding hanciam semsem ni.

Lungdam kohna

ZAC Digest ah hici bangin  laisuah khat gelh theihna dingin

Hamphatna hong pia ZACY lai-atpinu Siannuam le ZAC Digest tanute khempeuh tungah ka Lungdam.

Hih lai asim kha mimal kim le no teng tungah Topa thupha hong om ta hen. Amen

References: The Measure of a Woman by Gene & Elaine A. Getz