Pau.3:3-4

Thumanna le cihtakna khahsuah ngei kei inla, na ngawngah tuate okin, na lungtang tungah gelh in. 4Tua hileh, Pasian’ mai le mite’ mai-ah maipha ngahin na maa vang ding hi.

Thupatna

Paunak LST pen vial 10 val tham kasim a, ahi zongin tutung kasim ciang a lian 8 ( Ch.8) ka tun ciang, Zeisu amah le amah hong kipulakna kammal a thakin ka mu hi. V.22 pan simsuk le hang, Piangsak masa pen a hihna, bawlmasak pen a hihna, a suak masa pen Pa Pasian in a bawl masak pen, a piansak masa pen lak ah Zeisu in kei amasa pen ka hihi cih hong kipulak hi. Hih kammal kasim khak ciangin Ch 3 na sungah Thumanna le Cihtakna khuahsuah ngeikei in cih pen Zeisu kamsung pan a pusuak kammal ( aw ) khat bangin ka sungah zakna khat ka nei hi. Hi thu pen naupangte thu hilhna dingin kiza den a, ahi zongin nupi, papite nuntakpih ding na hi zaw hi. Ahang in USA a naupangte Thuman in Citak mahmah uh hi. A beisa kum 2 lai khawngin ka tapa kum 3 khawng a phakciangin nipi sumpi dingin $ 1 ka piak pen hun tawlkhat hong pai ciang, $ 5 ka piak leh deih lo hi. Ama ngaihsutna ah 1 cih pen (1^st, a hat pen, a pil pen) cih danin na tuat a hih manin Pasian a dingin a hoih pen a pil pen a khatna a pia nuam na hi hi. Sumpi $ 5 ta khiat ding khensatna ka neih uh ciang a thu-in genpih kul phot hi. USA ah THUMANNA leh CIHTAKNA pen NU leh PAte a dingin kisam mahmah cih a thakin ka phawk a, tuni-in tua thu mah gen dingin  kong sawm hi.

LST I et ciangin Thumanna leh Cihtakna a omlohna munah kisiatna, supna, haksatna om hi, cih kimu hi.

• Eden huanah Pasian thupiak tungah thumaan lohna le cihtak lohman in mawhna hong piang a, Pasian gal kisuak a, na khempeuh kicingna mun EDEN huan pan hawlkhiatna hong om hi.
• Cain in Biakpiakna cihtakna tawh hong sep loh ciangin Pasian a ma tungah heh hi.
• Eygpt pan kum 20 tungsiah mimal teng 6 sungah Thumanna leh Cihtakna hong omloh manin Canaan gamah teng 6 lakpan mi 2 bek tung uhhi.
• Jericho khua simna pan Akhan Thumaanloh manin a mah le a innkuan in sihlawh uh hi.
• Ananias leh Sapfira-te nupa A thumaan loh manun a nupa un sihlawh uh hi.

Kua Tungah Thuman le Citak ding

1. PASIAN TUNGAH THUMANIN CITAK IN

Thu Hilhkikna. 5:7-9

7“‘Keimah longal pasian dang na nei kei ding uh hi.
8“‘A kiseek milim hitaleh, tunga vantung hitaleh, nuai-a leitung hitaleh, leinuai-a om tui sung hitaleh ah a om na khat peuhpeuh a sun khat peuhpeuh note a dingin na bawl kei ding uh hi. 9Amaute’ mai-ah kun loin, amau’ na na sem kei ding uh hi; bang hang hiam cih leh keimah Topa note’ Pasian, a aam Pasian ka hi a, kei hong mudahte’ tungah a pate’ mawhna a tate’ tungah khang thum khang lina dongin thuk-in,.

Pasian pen a aam Pasian hi, a mah pen ikisap pen, ilunggulh pen ahi ding a ut Pasian hi. Biakinn pai ding sangin na dang, thu dang thupi na masak zawk leh, Pasian nasep ding sangin thudang sep ding thupi a, na ngaihsutzawk leh, tua na thupisak nate nang adingin na pasian hi. Amai ah nakun loh hangin Vangliat Pasian sang thupi sazaw, kin ngaihsut zaw na hihmanin tuate pen nang a dingin na pasian ahi hi. Pasian in Isreal mite a thuman ding uh le a cihtak dinguh deihlua a himanin, hi ci bangin na vai khak hi. Thu Hilhkikna, 6:7-9; 7Na tate uh tungah limtakin na hilh ding uh a, na innsung uhah na tut uh ciang, lampi-ah na pai uh ciang, na lup ciang uh le na thawh ciangun tua thute na gengen ding uh hi. 8Na khut tung uhah lim dingin tuate na hen ding uh a, na mitte uh kikalah tuate pen talsuante bang hi ding hi. 9Na inn kongkhak khuam tung uh le na kongpi uh tungah tuate na gelh ding uh hi.

Nu le Pate khatvei hong zawn kik ing. Topa tungah Thuman tawh citak kik ni. Zogam kenkawm pan hong paikhiatpih a, Leitungah a min thang penpen gam USA gam hong puak Topa khut ahi hi. Pilna tawh a tungte I hi kei hi. Sum le pai tampi neih man a tungte I hi kei hi. Topa hang bekbek ahi hi. Tua a hihmanin Pasian sangin a bawlsa nate a lianzaw a thupi zawin koihkha kei ni. Pasian le ama gam, a deihna zong masa in Pasian tungah thumanna le cihtakna tawh nungta ni. Biakinn ah na pumpi pai napi, na lungsim biakinn sungah om lo thei hi. Na pumpi pai napi, 1/10 in hong zui lo thei hi. I buppi in Pasian tungah Thumanna le Cihtakna tawh zuan kik ni.

I Pasian pen a aam Pasian hi.

2. NA KI-AP NA PAWLPI TUNGAH THUMANIN CITAK IN

Eph.1:23
22Pasian in Khrih’ khenuai-ah na khempeuh koih a, thu khempeuhah pawlpi’ lutang dingin Khrih a bawl hi.  23Tua pawlpi pen Khrih’ pumpi hi a, tua pawlpi a dingin amahmah kipia-in, mun khempeuha om pawlpite, thu khempeuhah a cingtaaksak hi.

LST in Pawlpi pen “Khrih Pumpi” hi, na ci hi. A zungpi taktak ngaihsun kei leng, kipawlna khat danin kituat khamaithei ding hi. A zungpi I ngaihsut ciangin Zeisu pumpi a na hihi. Zeisu pumpi ( pawlpi) bang hang nuak thei ding, banghang don lo-in om thei ding, Zeisu aw ke’n hong it ing, ci napi  a pumpi pawlpi na it kei leh, Zeisu it a hi thei diam? Mi khat I it le a pumpi zong a ki-it a hi. Amin bek it cih hi lo a, a pumpi bup zong a ki-it ahi hi. Tua ahih manin Pawlpi tungah thuman inla citak ding hihang. Khrish Zeisu pumpi puah khawm ni. Zun khawm ni. Cidam sak ni. Khangto sak ni. Tua hi leh, I Topa lungdam mahmah ding hi.

• Zeisu pumpi pawlpi gensia kha ke’n.
• Zeisu pumpi pawlpi ko khake’n.
• Zeisu pumpi pawlpi nuak khake’n.
• Zeisu pumpi pawlpi simmawh khake’n, zahpih khake’n.

A zenzenin nasep dan, kimakaih dan LST tawh a kituah kei leh, gen inla thunget sak in.  A kikhel kei leh, tua pawlpi pan kihemkhia in. Zeisu thusangin thu dang a kitamgen zawkna pawlpi, LST tawh ki makaih lohna pawlpi ahi leh, tua pawlpi belh huai lo hi.

3. NA ZI TUNGAH, NA PASAL TUNGAH THUMANIN CITAK IN

US gamsungah nupa kikhenna a tamzaw pen nupa thumanna omlo, cihtakna omloh man ahi hi. Nupa a nasem ciah, utna tengah bang kawikawi, ut teng sem, ut bang gamta, tua khit teh inn zuan. Tua bang hong om ciangin innkuan sung, nupa kal buaina hong piangin tate lam gei tung a, ganhing bangin mihing khat that ngam lel, cihte hong piang ahi hi. Agape pawlpi sungah om, thu um nu le pate aw,  nupa kal ah thumanin citak ni. Ei nupa hangin I tenna gam, I tenna khuapi buaisak kei ni.

1Cor. 7:4
4Zi in ama pumpi a ut bangin zangthei nawn loin a pasal’ zat ding hi a, tua mah bangin a pasal in zong ama pumpi a ut bangin zangthei nawn loin a zi’ zat ding ahi hi.

Nupi te’n na ngai un,

• Pasalte omlohna munah pasal dangte kamsiam duaiduai selo ding
• Midang khawng vamit hekhek se lo ding
• Pasalte omlohna munah pasal dangte va hoho se lo ding
• Paina ding na neih leh, na pasal kiangah gen ding, hong phal leh pai ding
• Na genna mun mah ah pai pah ding. Genna a tuam, paina a tuam, cih bang hilo ding
• Na pasal theihlohin na simsep lo ding, thu simtham lo ding

Pasal te’n na ngai un.

• Zite omlohna munah numei dangte va neh thupthup se lo ding
• Numei dang khawng ngekbawl duaiduai selo ding. Na ngek bawldingin na zi bek a hihi.
• Na zi thu kuppih ding, thu dong ding, na gelnate na zi tung gen zel ding
• Nang ut thu bek, nang thu bek zang lo ding
• Paina ding na neih leh, na zi tung gen ding, bang vai, bang thu

Nupa kal thumanna leh cihtakna hong om ciangin a cidam innkuan, a nuamsa innkuan hong suak ding a, tua mun pan a piang tate in thupha sangin gualzo ding uh hi.

4. NASEPPIHTE TUNGAH THUMANIN CITAK IN

USA ah mi’ khut nuai ah khantawn  nasem dingte I hih kei hi. Zogamah I omlai-in ei logamte mah I kho a, I sepdingdan ei mah in I gel hi. USA ah zong ei leitang tungah, ei lo gam tungah, eima company sungah thuvai hawm ding, a sem dingin Topa in hong deih hi. Tua bang a pian’theihna dingin mi (lawmta) 4 le 5 bang kipawlin nasem khawm ding hi hang, Building lian pipi lamin tuate mi sapsak ding, Gas station khawng kipan ding hihang. Khat kia bel din’zawh nang haksa ding a, kipawlin sem khawmg leng, piang thei lua ding hi. Company, Building lian pipi, Gas station-te I neih zawhna dingin Thumanna leh Cihtakna tawh sepkhop ding ahi hi. Tua ahi manin na partner tungah citakin, thuman in.

• Joseph in galkap mangpa inn sungah simtat lo hi, thuman in citak hi, mawhna taisan hi.
• Modekai in a kumpi pa tungah ( partner) tungah thuman in citak a, a hun ciangin a lian penpen kumpipa’ pahtawina ngah hi.

Thukhupna

Thumanna leh Cihtakna in,

• Pasian mai le mite maiah MAIPHA hong ngahsak hi.
• MAA VAN’NA hong ngahsak hi.
• DAUPAINA hong ngahsak hi.
• Pasian in nasuan le khak tul tampite tungah ITNA KIP hong lak ding hi
• Thuman in sihna dingpan hong hu ding hi ( Pau.11:4)
• Thumanna in a nuamzaw nuntakna hong ngahsak ding hi. (Pau11:5)
• Thumanna in gimna tuamtuam tawh hong kipelhsak ding hi ( Pau.11:6)

Thuman mite omna khuapi, pawlpi lian semsem ding hi (Pau.11:11)

Rev. Gin Sawm Thang

(January 6, 2022 ni ZAC Bowling Green, KY ah hunpi sermon a kila kik hi.)