Bowling Green Khua Kentucky State USA gam ah Zomi gambeel ongkibeh lap seemseem natawh kizui in Zopau tawh suakta tak a Pasian biak theihnading leh Naupang te Zolai tawh Pasian thu nungta hilh theihding kilung gulh mahmah ban ah, Democracy gam ahih natawh kizui in thu neituam, La neituam abawk alian deuh cih bang omlo in Mipi thuneihna tawh suakta tak a kimakaih Pawlpi khat neihding lunggulh na tawh kizui in March 29,2015 ni in Zomi Agape Pawlpi Inn 8 tawh kiphut a Pawlpi kimakaih zia ding Constitution & Bylaw kician tak in kinei hi.

Pawlpi min

Pawlpi minding tawh kisai in Zomi Emmanuel Chuch cihding leh Zomi Agape Church cihding namnih hoih kisa a, Vote kikhia in atamzaw thukimna tawh Zomi Agape Church kikipsak hi. Pawlpi mai ah Zomi akihel na ahang pen Zomi tengbek i pawlpi hiding cihna hilo zaw in Pawlp kipat cil in Pasian in minam nei in ongbawl ahihman in iminam min Zomi  ongkitheih semsem nading in Zomi akihel hia, Minam, Vun, Kampau kuamah kideidanlo in Pasian it in suata tak a Pasian aphatnuam mikhempeuh kigawmkhopna ahihi.

Pawlpi Founder

Zomi te sung ah ibuaipih mahmah theihthu khat ahi Founder cih pen Zomi Agape Pawlpi ah thulianlua in kingaihsunlo hi. Zomi Agape Pawlpi i founder taktak pen Zeisu hia, akipatcil a om inn-8 teng pen Zeisu in ama Pawlpi adin nading a azat masak thu ummi te ahihi. Tua ahihman in Zomi Agape Pawlpi ah member naluut nini a kipan in nagzong founder na hipah a  Pawlpi thukhun ombang hamphatna khempeuh ngah in innteek nahipah hi.

Zomi Agape Pawlpi sung alian tuam kuamah omlo

Zomi Agape Pawlpi icih pen Zeisu pawlpi hi icih mahbang in kuamah aliantuam athunei tuam onlo a, Khazih ading in iseptheihna ikivakna ciat ah na akisemciat ahihi. Tua ahihman in isepna khempeuh Khazih ading hi a aliantuam aneutuam omlo Khazih gaalkap te vive ihihi. Isepna munciat ah kei a neu deuh ee liandeuh ee cilo in Zeisu in Zomi Agape tungtawn kasepna khempeuh thupi sa a athukzaw azaizaw kasepding onglam en tawntung hi cihphawk kawmsa in ipanmun ciat ah Khazih ading in lawp mahmah natawh nasem khawmding hihang.

Pa Khawm Pau