Leitung bup a om Christian-te a dingin tukum April (Dopi) kha pen thupi mahmah hi. Ahang in Nisuh Nipi (Palm Sunday), Good Friday le Thawhkik ni (Easter Sunday) ni thupite tawh kituak hi. Hih ni thupi thumte leitung ah azang /bawl masa pen pawlpi pen Jerusalem pawlpite hi a, kum zalom 4 na abei madeuhin bawl na kipan uh hi. Topa Jesuh kumpi ahihna tawh Jerusalem khuapi alutzawh kum 300 khit ciang a kipan cih na ahi hi.

I tengna leitung ah Biakna tuamtuam Biakna 4000 – 4300 bang om hi. Tua Biaknate lak pan Khristian thuzui mi atam pen hi a, anihna Islam Biakna ahi hi. Leitung ah biakna atuam tuam amukhia le aphut kineitek hi. Tua biakna a tuamtuam sungpan  pasian ka hi, a kici mi tampi tak om uh a, tua mite bang zahtak a minthang in nungzui tampi a neih uh hang, hun khat ciang a nuntakna uh bei-in tuni ciang dong Topa Jesuh bangin sihna zo-in a hing kik kuamah omlo hi.

Jesuh’ thawhkikna pen kuamah theilo dingin a imcip sawm uh hangun hanhawh numeite’n thupiang teng na genkhia uh hi. Jesuh’ thawhkikna imcip sawmin siampi liante le makaite’n hancing galkapte golhguk pia uh hi. Zanin ka ihmut kal un anungzuite hong pai-in aluang gukhia uh hi, ci-in gensak hi. Tua thu pen tuni dongin Jewmite lak ah tu-a bang mahin kigengen lai hi ci-in Matthai in gen hi (Mt 28 :11-15).

Topa Jesuh thokik hi, cih kipsakna gen ding thu kician tampi lak pan : (1) Han kongkhakna suang tumpi kilikkhia, (2)  Jesuh ama’ pumpi mahmah tawh a kilatnate: Peter khiang ah, thu-ummi 500 te kiang ah, James kiang ah, Nungzui 12 te kiang ah, Emmau lampi ah lawmta 2 te khiang ah, Paul khiang ah. (3)Thuciamthak ah pawlpi phut (4) Thuciamthak Laisiangtho bu hong piang (5)Thawhkikna thu Apostle- te tangkona thu laigil (kerugma) te ahihi.

Sawltak Paul in, “Khrih a kithokiksak lo hileh kote’ thuhilhna a mawkna hi ding a, note’ thu up zong a mawkna mah suak ding hi. Tua bek zong hi lo lai-in, misite a kihingkiksak lo ding hileh Pasian in Khrih hingkiksak hi, ci-in teci pang ka hih manun, mite kiangah Pasian’ thu a man lopi-in a gen ka suak ding uh hi. Bang hang hiam cih leh misite a kihingkiksak lo ding hileh Khrih zong kihingkiksak lo ding hi. Khrih a kihingkiksak lo hileh note’ upna a mawkna hi ding a, na mawhna sung mah uhah note a omlai na suak ding uh hi” (1 KORIN MASA 15:14-17 TDB) na ci hi. Sawltak Paul in “….a thawhsakkikna hang in Pasian’ tapa ahihna thu Pasain in a kilangsak hi (Rom 1:4 TDB) na ci leuleu hi. I mawhna hangin kimatna thuak a, midik i tantheina dingin sihna thuak in kithokiksak hi. Pasian vangliatna dingin misite lak pan Khrih kihingkiksak hi.

Thawhkikna pen thu-umte adingin  lungdamna thu manpha hi a,  gualzawhna, hangsanna, thahatna hong neisak hi. Topa Jesuh thawhkikna in thu-ummi khempeuh ading in lametna hong nei sak hi.

Endik Pawl