Sun nai sawm le nih hun a kipanin nitak nai thum dong, nai thum sung, tua  gam sung khempeuhah khim a zing hi. Nitak nai thum hun pawl laitakin Jesuh nakpitakin kiko a, “Ka Pasian, ka  Pasian, bang hangin kei hong nusia na hi hiam?” a cihna ahi, “Eloi, Eloi, lama  sabakthani,” a ci hi. Matt. 27:45-46.

Tua ciangin Jesuh nakpitakin kiko kikin a si ta hi. Matt. 27:50.

KHRIH’ THUAK GIMNA NAM (10) 

“The Passion of Christ” movie sungah, Jesuh’ thuakna sangin, a taktak in nakpitak  bawlsiatna thuak zaw lai hi ci-in, Lai Siangtho siamte’n na gen uh hi.

Judah mite’n Jesuh thah un, ka mawh uh leh asi ko tungah hong ngen hen. Ko tung  bek hilo, ka ta, ka tute dongin thuak ta hen, ci lai uh hi. Tua hang mahin Hitler  hong khan ciang Jew minam million 6 bang hong that hi.

1. Matt. 26:37 Lungman’na a kipan hi.

“Piter leh Zebedi tate nih sam a, a lungdahna leh lungman’na a kipan hi.”

Khrih in Gethsemane huan sungah pumpi le kha gimthuaknate hong kipan hi. Luka.22:44 sungah a khua-ul in lei tungah sisan malgol bangin a kia hi. Nakpi-a  lunggimna hangin, sihui sunga sazangnote kitam a, khua-ul le si kihelin gimna  hong thuak hi.

2. Matt. 26:67 Phih…Tum…Beeng.

Zan-in kimanin a nungzuite in a taisan khit uh ciangin, Kaifas le Judah makaite’  kikhopna mai ah Jesuh kipaipih hi. A mai kituamsak a, tam veipi kizahpihin, cilphihin  a paang beeng uh hi.

3. Matt. 27:2 Pilat Mangpa kiangah a paipih uh hi.

Zingsangin kisatnim in agimgawp Jesuh, Pilat kiangah kipaipih hi. Barabbas (migilo,  mi suam pa) kikhah khia a, Jesuh kisat gawmpin khailup dingin pai khiatpih uh hi.

4. Matt. 27:26- Jesuh…a satsak khit uh ciangin.

Rom mite’ kisatna ah; A puan kisuahkhiat sakin, khuam tungah kizansak ahih kei leh  khuamtom tungah kunsakin, a khutte kihen hi. Rom galkapte’ khut sungah 39 vei  satna thuak hi.

Bawlsiatna vanzat pen letna a nei singtom, tua tungah sikthem ahih kei leh  saguhthem kithuah savun khautepte tampi kikhih hi.

Mi nih in a thuak dingpa’ nungzang sat uh a, khat in tuapa a pangkhat, adang khatin  a langah sat uh hi. Hi bang teng hangin mipa’ sa kisatkeh gawpin, sihuite, sazangte  le khatvei vei ciangin a sungkua nangawn dawk thei hi. Tua banga a kisat hun sung  mahin a thuakmite si thei zel uh hi.

Kisatna pen a lipkhaphuai mahmah bawlsiatna hi a, Jesuh in ama singlamteh a puak  zawh lohna ahang pen hih bangin nakpi-a bawlsiatna a thuakna hang ahi hi.

Isa. 53:4-7 sim in…

5. Matt. 27:28-29- Puansan khat…Ling tawh kigan lukhu.

Jesuh’ kihenna khau kisuutsak khitciangin, Rom galkap honte laizangah kikoih in,  galkapte in a liang tungah puan khat koihin, a khutah ciang khat tawisak uh a, a sau  lingzum kual khat a lu-ah nensuk uh hi.

Galkapte in amah zahpih uh a, a mai le a lu beengin a luvun ah lingte thukpi-in nen’  suk lai uh hi.

6. Matt. 27:31- Singlamteh tungah that dingin a paipih uh hi.

A gik singlamteh khuampi Jesuh’ liangko tungah puasak uh hi. Singlamteh khuampi’  gihna le a pumpi tha bei luatna hangin lei lakah thum vei tuksuk hi. Thoto ding  hanciam a, thozo nawnlo hi.

Tua ciang Khrih’ singlamteh a pau dingin zawh thawh thu tawh Simon Sairin mi khat  puasak uh hi. Singlamteh a gikna pen pound 300 (Kilo 136) bang gik dingin gen uh hi.

Golgotha lam zuanin damdamin pai pih uh hi. Golgotha pen Grik pau hi-in, “Lutang Guh” cihna hi a, (Latin) pau in “Kalvari” kici hi.

7. Matt. 27:35- Singlamteh tungah a khaikhit uh ciangin.

A lu tungah ” HIH PA, JEW MITE’ KUMPI JESUH AHI HI.” cih na lai suangsak in,  linglukhu kikhusak hi. Singlamteh tungah a khutte nih le a khete siktukilh tawh  kilhna hong thuak hi. Tui duh dangtakna hong thuak hi. Apang pan teipi tawh kisun  lai hi.

8. Matt. 27:40 A zahko uh hi.

Singlamteh tung pan nong kumsuh takpi leh nang pen Messiah in kongsang ding uh  hi, ci-in zahko lai uh hi. Singlamteh pen a umlote adingin haina le mai zumna hi a, a  umte adingin gupna, damna, le hauhna hi. Hallelujah!!!

9. Matt. 27:46- Bang dingin kei hong paisan na hi hiam?

Sun nai thum laitakin Jesuh in Hebrew pau- in, ” Eloi, Eloi, LAMA SABAKTHANI,”  ci-in nakpi-in kiko hi. Mawhneite’ tang dingin Pasian tawh kikhenna a thuakna lim  hong lak hi.

Hih in a thuak hak penpen dahna leh lunggimna a thuakna ahi hi. Mitampi tankhia  dingin amahmah hong kipia hi. Pasian in mawhna aneilo pa eite tang ding mawhna a  suaksak hi.

10. Matt. 27:50- Jesu…A kiko kik khit ciangin.

Khrist in a nunung pen in, ” A Zo Zo hi,” ci-in, nakpi-in a kikokhia hi. Hih kikona in  athuaknate le tatkhiatna nasep mansiang ta hi, cihna lim hong lak hi.

Eite’ mawhna leiba khempeuh a vekpi-in kipia khin a, gupkhiatna’ geelna kikipsakin  tangtung khin hi. Tua khit ciang bekin amah in, ” Pa aw, ka kha nangma khut sungah  kong ap hi,” ci-in a nunungpen thungen hi.

Hih lai asim kha mimal kim tungah eite taang dingin gimna hong thuak Jesuh Khrih’  hong Gupkhiatna, hong tatkhiatna thupha nang le na innkuan sungah hongtung ta  hen. Amen.

Lungdam.

Rev. Tuang Lian Khai @ Khaibawi