Leitung hun siat kipan khin ta a, a si thei, a na thei pumpi hong kepsakin hih bang tecipan theihna ding hunhoih hong gel sak i biak pa Pasian in minthanna, vangliatna, pahtawina tang tawntung ta hen. Topa’ misiangthote mai ah lai tawh tecipan theihna dingin hun lemtang hong gelsak sia/ siamahte ahi zong, upa makai, pawlpi mimal, le laisim mimal khempeuh na khut taklam len kawm sa-in lungdam kong ko hi. Topa in mi khempeuh tungah itna hong lakin kei nangawn ama mi ahi dingin hong teel a, a kicing a ma hehpihna,  le kei tung a hong sep a na lamdangte mi khempeuh tungah zong sem thei a hihna teci hong pang nuam, ka hihi.

Johan 1:16 – A kicing ama hong itna hangin eite khempeuh tungah thupha a banbanin hong pia hi. Amen . Laisingtho le Pasian in a kicing ci napi-in ken kicing salo-in beh laplapin hun sawtpi ka zang khin hi. Malaysia ah 2013, April sungin zu hoih lo a kici (methanol) akihel ciangin a zu khauhsak zawin, tui tampi hel thei uh ahih manin, zu dang sangin tawm man zawin zuak thei uhhi. Tua zute mah ka dawndawn kha a, lung kham simin zu bek mah dawn ding ka ngaihsun hi. Kei zu dawn mi khat a ding le papi sum zong khat ka hih hangin, a lem ciangin ka tam dawn a,  alem loh ciang ka tawm dawn hi.

Ka dawn zawh hong sawt pian khit ciangin ka tha zawin nak ding nangawn haksa ka sak ciangin, ka na sepna ka boss nu in clinic (ဆေးခန်း) ah hong paipih hi. Siavuan (Doctor) pa in zato na lum in, cih hong gen ciangin sum nei lo ka hih manin inn ciahin ka lum hi. Inn ka tun ciangin nakhak sa-in ka hu san ding haksa ka sa mahmah hi. Tu lah tu thei lo, lum lah lum thei lo-in kitom tomin zan tawntung ka om hi. Tua laitakin ka hawk (awk) hong suakin a lua dingin dailen buk ka pai hi. Ka hawk leh, si tampi tak ka lua hi. Tua ciangin kei a si ding hi ta ka hi ve maw, ci-in ka lupna zuan kikin zingsang khua ka vak tam maw ci-in ka ngaihsunsun hi.

Tua laitakin khang luite’n mi si ding a om ciang, veng ah laang kikhen (hankuang kibawl) -in ngeu kikai (Zawhngeu kipet) cihte om thei hi, a cihdan lianin ka lu khungah keima zakin hong om hi. Ka zi inzong thu na ngenin, Topa aw zingsang khua hong vak sak in, ci-in thu na ngen h. Topa’n a thunget dawngin zingsang khua hong vak hi.

Zingsang ciangin pawlpi upate’n hong vehin zato hong puak uhhi. Zato ka tun’ uh April 5, 2013 kum, nitak lampawl ciangin ka mit hong mangin khuamu thei nawnlo-in nak hak ka sakciang, husan khat le mit khuamuh theihna in nakpi takin manpha ahih lam ka tel san hi. Tua ciangin Siavuan (Doctor) te’n ICU hong puakin ka hun tung ta aive maw, hih mun ah kei a si ta ding ka hive maw, ci-in ka ngaihsun hi. Ka tate phawkin, kei a pa, pa gina lo, ka hihna ka phawk hi. Rom 6:23(a) na sungah “…mawhna in thaman hong piak pen sihna hi a,” a cih kammal ka sungah hong kilo-in mawhnei mi ka hihna ka phawk hi. Aw! Topa, ka mawhna hang, kei a si ding hi ta! ci-in ka kingaihsut ciangin a si ding nangawnin kilawm ka kisa kei hi. Banghang hiam cih leh, mawh het lo a,  Jesuh na si cih ka ngaihsut ciangin sihna nangawn tawh kilawm ka kisa kei hi.

Ahi zongin thu ka ngen a, Topa aw, ka zi ka tate na khualna-in ka nuntakna hong laksak ke’n la, na ut bangin hong sat in, ci-in thu ka ngen hi. Tua khit ciangin a zing a mial mong nei lo guam thukpi sung ah hong kikhia suk hi. Tua guamthuk sung ah sun thum le zan thum bang ka kiatsuk khit ciangin cihna ding theilo-in ka kim ka pam ka mai kawikawi hi. Ai zongin, let theih lawn theih ding bangmah om lo hi. A taw tungsukin suangphah peek bang na om henla, tua tawh kitatkham-in ka ci ka sa palhmangin, them len gawpin beimang leng ka ut mahmah hi. Ka ut hangin tua bang hi thei lo-in ka kiakia mai hi.

Ahi zongin i Topa Jesuh hong itna, le guihtheih khamtheih a zang, Satan’ hencipna sunga, a om mite ading thu nong ngetsaknate uh Topa’n hong dawngin nuntakna thak ka ngah kik theihna dingin ka lungsim sungah kei hong huh zo ding, kei hong panpih nuam ding, kei tawh a kipawl nuam ding, ka zon ciangin Jesuh lo buang a om lo ahih lam ka phawk hi. Rom 6:23(b) sungah “…a hi zongin i Topa Jesuh tawh i kipawl manin Pasian’ hong piakkhong pen nuntak tawntungna ahi hi” cih ka phawk hi. Haleluijah! Tua ciangin kei zong Topa Jesuh aw, Jesuh a kici PA aw, nong hotnop leh hong hon in, nong hot nop kei leh hong hon kei in, ci-in ka hihna khempeuh, ka lungsim khempeuh, le ka nuntaakna khempeuh tua lai ah ka kipia hi.

Tua khit ciangin ka gal, alam napi panin dumde cia bang apha khuavak a tang kieukiau khat ka mu hi. Tua khuavak in kei lam hong nehin hong tangpha semsem hi. Nakpi takin tua khuavak tang pha mahmahin kei kiang hong naih ciangin ka lau mahmah hi. Bang hang hiam cih leh, tua khuavak in liim nei lo-in na khempeuh pailetin tanglet mang ahih manin tua khuavak mai ah a kiselsim thei ding bangmah om lo ahih manin ka lau mahmah hi. Kibu nuamin ka om hangin buk theih nading om lo hi. Tua khuavak in ka pumpi hong kapin hong taan a, tua zawh minit nih khit bang ciangin ka kiang pan tua khuavak tai khia hi. Tua khitphetin khua ka phawk a, ka hu ka diik theih lam ka phawk hi. Topa in ka thungetna hong dawng ahih lam ka phawk kik a, lung dam ka ko hi. Tua ciangin ka sung ah lungdamna lian mahmah khat hong omin bang hiam cih ka thei zo tuan kei hi. Ka khuaphawk man hiam cileng lah hi lo. Ka huih diik theihna hang maw, ci leng lah hi lo-in ka lungdamna ka thei zo kei hi.

Tua hunsung tengin Malaysia, St.John’s Catholic biakinn a, a sem ka sunghpa Francis Kham in, tua zu hoih lote tawh a si mi nga, guk bang na gui khin ngei ahih manin, ka dam loh a zak ciangin zato ah hong delhpahin ka naunu bel meigong baih ding aive maw, ci-in inn lam thu na zasakm pah hi. Malaysia ah han zong tam man ahih teh ci-in RC han (Batuarang) hong na ngahsak hi. Tua ciangin zato ah Zomi makai ZAMte inzong hong vehin sum tha hat kei lehbel, gamdang ah hih zah a, a kibawl zo ding mi tam keimawk ni, kici uhhi. Tua zawh ni nih khit ciangin Siavuan (Doctor) te’n inn ciah thei ta hong cih uh ciangin ka sanggamte le hong it hong ngai teng in zato bill ding tampi tung ding ahih manin na buai mahmah uh hi. Kei bel tha bangmah nei lo ka hih manin ka khut nangawn ka tangsak zo kei hi. Ahi zongin Topa’n sem thei hi, cih lungmuanna khat ka nei hi. Tua leh, fon message hong lutin zato na kibawlna bill pen UN te’n hong piaksak gai hong kici-in ka nuam mahmah hi.

Tua leh ka lungdamna pen ka bill hong kipiaksakna hang maw, cih ka ngaihsut ciangin tua zong na hi lo lai hi. Tua ciang, thu ka nget leh zoto ka tuah ni ding zan ciangin ka lungsim sungah hong kigenin, na lungdamna taktak pen in vantung in mawhna deih lo-in leitung ah zong mawhna kideih lo a, sitni omin, thukhen om a, mawhna liante neusak, a neute beisak (ကြီးသောအမှူကို ငယ်အောင်၊ငယ်သော အမှူကို ပပျောက်အောင် ) cih zah dongin leitung inzong mawhna deih lo hi. Ahi zongin nang mawhna ahih leh, lei le van kikal, huih lak ah Jesuh in singlamteh tung ah na mawhna khempeuh hong puakkhiat sakin mawhna cihbang na nei kei hi. Diktanna in nang a ding a tawntung ahi hi, hong ci mawk hi. Haleluijah! Tua in ka lungdamna bulpi na hi mawk hi. Amen. Tua ni a kipanin a kicing a ma itna kei adinin hong kicingin i Topa Jesuh tawh ka kipawl manin Pasian hong piakkhong nuntakna pen kei le ka innkuan ading ahi ve maw, ci-in nakpi takin ka lungdam hi.

Khuavak ahi Topa Khasiangtho in tuni dongin lam hong makaihin 2013 April 5 ni-in Topa’ mi ahi dingin telna cih khamuanna ka nei hi. Tua zawh 2013 Oct 22 ni-in ka pawlpi siapa Isaac Pau (Rev. Suan Sian Pau) tungtawnin Khasiangtho’ nasepna tawh ka zi in pianthakna cih khamuanna hong nei thei hi. Haleluijah! Ka pawlpi uh pen Sentosa Zomi Innkuan hi’n ah Siate upate zong lungdam lua-in, vantung ahzong pawi kibawl ding ahih teh, ei zong pawi bawl ni, ci-in 2013 Nov 3 ni-in ka pawlpi uh Sentosa Zomi Innkuan bup in pawi ka bawl uh hi. Hunukpa in Luka 15:23-24, Isaiah 61: 1-10 hong simin, la TDM 360 sa-in lungdampawi ka khaam uh hi.

Jesuh le Zakkhias a kimuhna dingin Pasian in theithek kung na zang hi. Kei le Jesuh ka kimuhna ding zu zangin, ka zi le Jesuh a kimuhna ding ka siapa uh Pasian in hong zang mawk hi. Nang le Jesuh na kimuhna dingin Pasian inzong na khat peuhpeuh zang thei lua hi. Jesuh le Zakkhias a kimuh khit ciangin Jesuh a inn ah a taam mah bangin tuni-in Jesuh nang kiangah hong taam nuam hi. Jesuh in hih innkuan in hotkhiatna a ngah hi, a cih mah bangin na innkuan sungah Topa’n hotkhiatna hong pia khin hi. Amen.

Topa’n laisim mimal thupha hong pia ta hen. A men. Lungdam.

Pa Kam Mung (Indianapolis)