Numeite’ thugen pampaihna

Na thugen hong kithupi simsak kei leh, a thuak masa pen hi lo hi teh. A diakdiakin numei na hih manin mi lakah hong kineubawl, hong kithusim kei leh, a tuak masa pen hi zenzen lo hi teh.

Tua manin na kampua pen tam veipi hong kithusim lo-in lungkia-in, kha mangthangte ading Lungdamna thu na genna pan khawl dingin na khensat leh, mi tampi adingin supna lianpi hong suak ding hi. Tua ahih ciangin Pasian kammal tawh enkak kik ding kong hanthawn nuam hi.

Kei ka hih leh, nang kiang pan Pasian kammalte le ama bawl na lamdangte za nuam, mu nuamin, Jesuh ading nungzui hoih ka suak thei ding hi. Hun tawm na ngah leh, Luke sunga numei khat thu le ama hangin midangte in vantung, leitung thupha a ngahna thu en khawm ni.

Numeite’ thugen

Numeite’ thugen a thupitna pen Luke in nih vei bang na ciamteh hi. Tua manin thawhkikna thu a tangko tua numeite ii thugen pen bangzah takin thupi cih pen Luke’ lai-at sungah kimu thei hi.

A thokik i Topa

Khrih’ thawhkikni-in a hankhuk ah a pai nupite le vantungmi nih kimu-in Jesuh thokikkhin a hih lam a gen ciangin, Jesuh in ni thum khit ciangin ka thokik ding hi, cih a genna a phawk kik uh hi (Luke 24:1-9). Tua manin numeite in nungzui 11 te kiang pai-in Jesuh thokik khin hi, ci-in lungdam takin a gen hi. Ai zongin, tua bangin a gen ciangin ““Ahi zongin hih numeite’ thugen pen thu phuahtawm bangin ngaihsun uh a, um lo uh hi” ci hi (Luke 24:11).

Amau mit tawh a muh loh manin um lo uh

Nungzuite in a thokik Topa pen amau mit tawh mu lo ahih man un um zolo uh hi. Tua sang a sukzaw lai ah numei’ thugen ahih manin thutak hi lo ding hi, ci-in numeite’ kam pan a pusuak tua thawhkikna thu pen huih lakah mangthangsak uhhi. Numeite’ gen ahih zenzen hangin, Jesuh mahmah in ni thum ni ciang thokik ding cih pen a gengen sa thu ahi hi (Luke 9:22-27, 9: 43-35, 18: 31-43).

Tua bektham lo-in, Jew biakinn Sinagokte (Synagogue) ah a kikoih Hebrew Laisiangthote sungah zong thawhkikna thu a kigensa ahih hangin, nungzuite in thupisim lo-in um zo lo uh hi.

Thawhkikna lungdamna thu

Jesuh’ thawhkikna pen numeite in vangtungmite tawh han ah kimu-in a kicingin thei uh hi. Tua pen a gen kik uh ciangin nungzuipite in um lo-in, adiakin thu-ummi a kicite in numei’ thugen ahih manin um zo lo uh hi zen hi.

Tuate lak ah mi khat bek in hih thu man maw, man lo cih a theihna dingin han ah va tai pah hi. Ama bek va pai hi (Luke 24:12). A dang nungzuite ahih leh, a tutna uh pan zong ding khia beek lo uh hi.

Thupi ahih manin gim liangin tai-in a gen numeite’ thugen um lo bek hilo-in khutzepin amau tawh a kisai lo bang keek khatin a leh ngatsan hangun, tua thu ii manphatna bei tuanlo-in Pasian thawhkikna zong bei tuanlo hi. Ahi zong, amaute ii numei pasal kideidanna lungsim in thu, thupi mahmah khat a thusim lo suaksak hi.

Numeite in bangci bangin a lungsim sungah thuak ding uh hiam?

Pawlpi le biakna makaite ii umlohna le elpaunate hangin numeite in a lungsim sunguhah bong ci thuak ding, cih ka ngaihsut simin ka lung nop hetlo hi. Tuhun ah zong numeite pen a pasalte, a pate, a sanggam a u, a nau pasalte, le biakna pawlpi makaite in amau kampaute awlmawh lo, a thupisim loh ciangin bangci bangin a lungsim uhah thuakin nasa ding ahih uh hiam? Luke in Jesuh thawhkikna le lungdamna thu a at ciangin, hih bang kideidannate zatloh ding nakpi takin gen ahih manin numeite pen thupisim huai mahmah hi.

Peter a suahtakna

Pentecost ni-in thahna thuak dingin thong sungah Peter a om hi (Sawltak 12:1-17).

Peter a suahtakna dingin pawlpi mite in thungen den uh hi. Vantungmi’ huhna tawh lamdang takin hong suahta-in Mary’ inn ah kongkhak hong kiu hi. Kongkiuhna ging hangin inn sunga om numeino zong Peter’ aw a zakna hangin tho-in kong hong ding a pai ma-in midangte tungah a gen masa hi.

Tua numeino in kong a kiu pen Peter mah hi, cih um hi. Tua ciang, nuam luatna tawh Peter si lo-in kong mai ah om hi, cih a om pihte tung a va gen hi. Peter’ suahtakna ding a, thungen ngente in ““A hai hi teh!” na cihsan lel uh hi. Ahi zongin, amah in “Peter a om taktak mah hi,” a cih teitei ciangin amaute in, “Amah a cing vantungmi hi ding hi,” ci-in a dawng uh hi (Sawltak 12:15).”

Thunget ngahna

A nget bangun Pasian in a piak ciangin amaute in um zo lo uh hi. Tua ciangin numeino zong lungkia lo-in kong mai a, a ding pen Peter taktak hi, ci-in a gen teitei hangin nungzuite in numeino ii thugen pen thusimsak lo uh hi.

Peter’ suahtakna ding thu a nget uh hangin amau mahmah in a muh loh, a zak loh ciangun um zo lo uh hi. A diakin numei pasal deidanna nuai ah Pasian’ dawnna thupha pen kinelhsiah hi. Thunget a ngah uh hangin um lo bek hilo-in ciamnuih san uh hi.

Bang hang’ um lo

“Tua numeite” ii kam pen uphuai lo hi, ci kha thei ding uh hi. Tua mi mawkmawk numeite’ kam bang hangin um ding ihi hiam? Tua bang hoih lo hi. Hankhuk a om numeite pen Jesuh nungzuite ahi uhhi. Pasian nasepna ah a om den a huh dente hi-in Jesuh nasepna a kipat a kipan Singlamteh tung a nuntakna a piak dong amaute tawh a om khawm dente ahi uh hi. Mimawkmawk hi lo uh hi. (Luke 8:1-3). Numeite ii citak a a nasepna le kipiak khiatnate pen nungzuipite in a mit uh tawh a muh khitsa uh ahi hi.

Peter’ aw a za numeino pen Mary’ inn a thungetna inndawl ah a om ahi hi. Tua nu pen mi mawkmawk hi lo hi. Tua nu’ thu pen a theihkim sa uh ahi hi. Ahi zongin, a thupuak pen numei ahihna hangin Pasian nasepna hi ta mah leh,  tua thu um lo uh hi.  Numei ahih uh manin a thupi mahmah Jesuh thawhkikna le thong pan Peter suahtakna thute pen nungzuipite in nawlkhinin up sawm lo uh hi.

Numeite a nawlkhin ngeina

Numeite nawlkhinna pen a ngeina dan khat hong suak hi.  Jesuh hong thawhkikna le thong pan Peter hong suahtaknate pen numeite in mu masa, thei masa uh hi. Amau in zong a muh a zakte uh, um pah uh hi.

A muh a zak lungdam nading thute pen midangte kiangah gensawn hawmsawn nuam uh hi. Ahi zongin nungzuite in na um lo uh hi. A diakdiakin numeite pen lungmawl (mi hai) bangin na ciamteh uh hi. Hih pen a hi pak a kituak kha pak hi lo-in ngeina khat bangin a kho numei pasal kideidanna ahi hi.

Nawlkhinna pen lungdam huai hi lo hi

Thusim lohnate i muh ciangin a thusim lote pen bangzahin hai uh hiam cih kimu thei hi. Ei bang mahin amau (nungzui pasalte) zong numeite tungah nuih zak huai lopi, ciamnuih bawlsan uh hi. A diakdiakin, numeite amau le amau a kimuan luat uh ciangin zahpihin i nuihsan hi. Thu kan behlai leh i deihsak mah bangin, ei pasalte in zong tua bangmahin thu kanbeh lai ding a kilawm hi.

Tu hun a, a kimangngilh numeite

Tu hunin zong, numeite pen pawlpi in a kimanghilhte bangin i pampaih kha hiam? Biakpiakna ah numeite a mai ah pai-in teci pang ding, thu gen ding hong pai ciangin pasalte in a thei lo kineihin, a thei lo bangin a lu peisan uh hi. Amau tuah khak Pasian hoihnate a gen ciangin pasalte in amau mu lo, za lo ahih manin Pasian’ nasepnate um zolo uh hi. Pasal a tamzaw in amau upna tawh a om hithiat uh hangin, numeite in a upna uh nuntakpih uh hi. Numeite mangngilhna le zahpihna pen biakna sung ah a lungdam huai thu hi peuhmah lo hi.

Thuman thutak gen dinga Pasian zat numeite

A tunga thute i et ciangin Pasian in thuman thutak gen dingin numeite a zat lam kimu thei hi. Nungzuite in thu a zak uh ciangin paulap tuamtuam gen hi mah tase leh, a tawpna ah numeite pen Pasian in zang hi, cih pen siangtakin mu uh hi.

Numeite’ thugen a ngaihna uh hangin nungzuite in Pasian nasepna lianpite mu-in tangthu lumlet uh hi. Numeite pen Pasian sungah sanggam nu, naunute ahi hi. Pasian mahmah in numeite zangin a pawlpi lam ahih leh, eite in zong numeite ii hihnate i thupisimin zahtak ding pen hong thupi mahmah ding hi.

Jesuh sungah

Samuel Soe Lwin

Theih ding: http://redeemerbible.org pan “Women are Easter Heroes” pen a kitei kik hi.