THU MASA:

Topa’ hoihna teci pang theihna dingin cidamna le hunpha hong pia i Topa tungah lungdam ko nuam masa ing. Tua banah kei ading hun hong pia Agape Digest tawh kisai ah vaipuak neite tungah zong lungdam ko nuam ing.

Ka min Nu Ning Khan Lun hi-in, ka pianna khua Saizang ahi hi. June 13, 1987 kum in ka suak a, Nu Ning Ngaih Thang le Pa Cin Za Khai te sung panin unau giat lakah a u pen zom ka hi hi. Pasian hong hehpihna tawh 2012 kum December 17 ni-in ka it mahmah ka pasal Pa Cin Sian Muang tawh ka kiteng a, tanu khat le tapa thum Topa’n hong pia hi. Tulai tak Bowling Green, Kentucky ah nuam takin Topa’n hong khuasasak hi.

PIANTHAK MA THU:

Ka Pu ka Pa pek panun Laipian Pau Cin Hau pawlpi sungah thu ummi citak mahmahte ka hi uh a, ka kum sawm le guk (2002) kum dong Laipian pawlpi mah ah thuzui mi ka hi uh hi. Upna lam ah a kip, a khauh pai mahmahte zong ka hi uh hi. Laipian pawlpi abei ni, (ka tawpsan) ni leh leitung abei ni hi hen, ci in a tomlo ngamte ka hi uh hi. Tua hun lai-in zong gupkhiatna thu pen ka khua vuah a kigen gen mah hi in, ahi hang ka inn vuah a hong lut dingin zong a phal ngiat lote ka hi uhhi. Pu Pau Cin Hau pen Khamtung mite (Zomite) adingin Pasian kamsang dingin hong tuampiak ngiat hi a, Zeisu pen Mangkang (Mikang) te adingin a kipia ahih manin ei tawh kisai lo, ei gumpa hilo, cih ko upna ahi hi. Naupang khat ka hihhang, ka upna pen khauh pai mahmah a, Zeisu thuzui, thu-ummi a kici limlim pen dawi zah a, a tuat ka hi hi. Tua zah dongin Khristian a kici mite mudahin, zongh a gimneih ngiat ka hi mai hi. Paul mah bangin lungtang khauhin Zeisu thuzuite gal a nei, a en thei ngiat lo ka hihi.

Tua bang hita se leh, Johan 3:16~ a kigelh mah bang, Pasian in hong it lua ahih manin a hong vei ngiat ding le Pasian hong gupkhiatna thu ka zak theih na dingin a nasem pa Rev. Kham Suan Hang (Sia Hang) ka khua vuah hong puakin 2002 kum bei kuan, phalbi daikai nuai hita leh zingsang simin ka zing thawhma uh, inn bikhalap ah hong ngak ngiatin inn ka hon dong uh om tinten ni loh hi. A tawpna teh ka Pa in “Inn hong ni. Gal le sa hi lianglo a hih teh, lutsak lel ni. A gennop teng gensak lel ni. En i up loh ding thupi lel hi”, ci in tua pan kipan citak takin ka inn vuah nisimin hong tung niloh a, gupkhiatna thu bekbek hong gen pihpih hi. Tua hun lai-in Sia Hang pen FGA Pawlpi Saizang ah a phut kipat cil lam hi a, a pawlpi ah a lut dingin zong hong zol ni loh hi.

Tuabang teng tawh hong pai toto-in ka Pa pen hong lunglut pianpian hi. Kei pen Sia Hang hong pai nak leh inn ah om ngeilo, vaksan, singpuak san cih danin ka om hi. Tua hunlai pen leitungah ka muhdah penpen a hih leh Sia Hang a hi phial hi. 2003 Kum, February kha ciangin, ka Pa in bangbang hi leh Sia Hang kiangah pawllut ni hong ci-in,

kei pen tangtel sihtan bang lianin ka Pa kiangah “Na ut uh leh lut un, ken ka pawlpi nusia ngeilo ding hi’ng!” ka ci suk hi. Ka Pate pawllut ni ding hong tun ciangin, kei ka vak khia a, ka innvengte uh inn pan ka gal-et sim hi. Ka Pa in hong zong phangphangin hong muhloh teh a lungnop tuak hetlo hi. Khua hong mialin ihmu khin ta un teh, ci-in ka ciah leh Ka Pa na ihmu nai lo a, “Ning Khan Lun aw, lawmlawm teh pasal hi samlo na hi maw! Na Pa thu hong nial het ken maw! Ka thupha ngah het lo ding na hi!”, ci in ka mai tangah a khitui hong taak keuhkeuh hi. Ahih hangin, Ka Pa thu ka mangtuan kei a, kha nih sungbang ka pawlpi Laipian a ka kikhawm teitei hi. Upna kibanglo ki omkhawm ahih man in, ka innsung uhpen nuam ngei het lo hi.

KA PIANTHAKNA:

Bangzah takin, lungtang kikhauh sakin Zeisu deih hetlo hi mah ta le’ng, ama itna in hong zo hi. 2003, May kha hong tun ciangin, Sia Hang in camp khat neih ding hong gel a, khangno a piangthak nailo sawm kiim, kaal khat sung inn ciah vetlo a, gupkhiatna thugen ding, ci-in ka Pa in “Na pai loh phamawh! Na ut kei leh innpan hong hawlkhia ding hi’ng. Camp pai ding maw pailo ding?” cih teel ding hong piak ciangin, kei zong ut lo pipi-in camp ka pai hi. Kal khat sung vilvel Pasian itna thu, Zeisu hong gupkhiatna thu bekbek ka siapa un hong gen hi. A ni tawpni, ni sagih hong cin’ ciangin bangzah takin deihlo-in, khauh tentan nuam hi mah taleng, Zeisu’n hong itna Kha Siangtho in hong telcian sakin, mimawh ka hih lam hong kiphawk sak a, Zeisu ka kisap lam le gupkhiatna ka kisap lam tel takin hong thei ciansak hi. Kei zong thuak zo nawnlo-in tua ni lian mahin Zeisu ka gumpa le ka Topa in ka sang a, tua ni sung khempeuh khitui naptui tawh kidimin, ka sungah lungdamna le lungnopna a hong om hi. (Rom 10:9-10)

Tua ka kikhelni a kipanin Topa tungah ka lungdam lahna-in siam le siamloh kisai lo, khasum san le san loh kisai lo-in Topa a dingin ka kipumpiak a, 2012 kum ka pasal neih ni ciangdong ka kizattheihna munmun ah lawptak le lungdam takin kei hong it mahmah Topa a dingin a kipia khia ka hihi.

Efesa 2:8 ~ Pasian hehpihna hang bekbek tawh gupkhiatna a ngah ka hih lam ka tel mahmah a, ka lung zong a dam mahmah hi.

2 Korin 5:17 ~ Zeisu hang in, mithak ka suak a, amah tawh a thakin anung ta khawm ka hihi. Ka nuntakna hong khel a, ama hoihna tawh hong tuam tawntung Topa, a min kiphatin om den ta hen! Amen!

Hong simsak mimal kim tungah, Topa thupha hong tung kim ta hen! Amen.

Nu Ning Khan Lun