Akai khawm: Rev. Gin Sawm Thang

“Khrih a kithokiksak lo hileh kote’ thuhilhna a mawkna hi ding a, note’ thu up zong a mawkna mah suak ding hi. Tua bek zong hi lo lai-in, misite a kihingkiksak lo ding hileh Pasian in Khrih hingkiksak hi, ci-in teci pang ka hih manun, mite kiangah Pasian’ thu a man lopi-in a gen ka suak ding uh hi.” (1Cor.15:14-15)

Hih leitungah biakna tampi om a, tua biakna nam lian zawdeuhte’n pasian nei tekin a pasiante uh vanglian thei mahmah uh hi. Ahi zongin ni khat ni ciang tua a pasiante si uh a, tuni’n a hanah a guh a tang le a pumpi uh kimu thei lai hi.

Khrih in sihna zoin thokik hi.

Tuma kum 2022 lai-in Jesuh a kici mi khat hih leitungah hong khangkhia a, cinate damsakin misite hingkiksak hi. Tuihualte, huihpite taii leh dai hi. Tui tungah paithei-in tuisik pen leenggah tui suaksak thei hi.

Ni khat Amah kilehhek ahih manin singlamteh tungah khasiat huai takin kithat hi. A sih ma-in hih pumpi na thah uh hangin nithum khit ciang thokik ding hi, ci ngei a hih manin a hankong suangtumpi tawh sinin seal khen a, ama pawlte’n a guk loh nadingin galkapte in muanhuai takin cingsak hi.

Zingsang khat vantungmi khat hong kumsukin han sitna suangpi hong liikkhia hi. A mel pen khuaphelep tawh kibangin a puan vuuk bangin paak hi. Hancingte lau lua uh ahih manin sibup uh hi. Tua vantungmi in Zeisu luang en ding a hong paite kiangah,.. a kithat Jesuh thokik zo hi..ci hi. Jesuh in sihna zo-in thokik hi, a han hawm hi! A thawhkik khit ciangin a nungzuite,  numeite le mi tampi tungah kilang hi.

Tua Jesuh a thawhkik ni zingsangin hangcingte kimkhat khua sungah lut uh a, siampite le upate tawh vaihawmin galkapte golhguk pia-in “Zan ka ihmut laitakun a nungzuite hong pai-in a luang hong gu uh hi,..ci sak hi. Hih thu hangin Judah mite’n Jesuh thokik peuhmah lo hi, ci-in tuni dongin Jesuh umlo uh hi.

Hancingte’n Jesuh’ han a hawm lam a muh uh ciangin Satan in amau mah zangin a galpa Jesuh thokik lo hi, cih zuathu kizel sak hi.” Numei’ suan in na lutang hong sunim ding”(Pian.3:15) a cih tangtung ahih manin za nuam hetlo uh hi.

Hancing galkapte pen a muanhuai mahmahte hi a, ka ihmut kal un… a cih pen a man lohna kitel pah hi. Hancing galakpte ihmu.. ci mai ni, ka ihmut kal un a nungzuite’n hong gu.. ci a hih leh ihmut kal a gu nungzuite ahih lam bangci theih hi ding hiam?

Jesuh thokik lo hi leh?

Zeisu thokik lo hi leh bang a ci zen tam? Sawltak Paul in…” Khrih thokik lo hi leh ka thuhilh uh a mawkna hi, no upna zong a mawkna hi” ci hi. Paul in lungdamna thu a hilhna hangin bangzah in genthei haim?Gimna, kahna, bawlsiatna, paun neih lohna,liamna,sihna dongin thuak hi.

Sawltak Paul in Jesuh thokik lo hi leh hih ka thaukna khempeuh a mawkna hi. Jesuh thokik lo hi leh I kikhopna, I thungetna, I sumpi piakna, Khrih a ding I gimna, I thuakna, I tawlna, vantung gam tung ding ci a, I khamuannate khempeuh a mawkna hi ding hi. A hi zongin Jesuh thokik hi!

Khrih thawhkikna hang bang na meet hiam?

Jesuh’ sihna zo-in thokik hi. Ahi zongin tua Jesuh tawh kizomin Amah na honpa le na Topa-in na san kei leh, a thokik lo mah bang lel ding hi. Jesuh thawhkikna in nang ading man hong neihna dingin Amah na HONPA dingin sang in. Amah a umte a sih hangin thokik ding a, zong si ngei nawnlo ding, ci hi.

• Dikna kingah:

Jesuh a han sungah kisial den hi leh ei ading bangmah hong sepsak thei lo ding hi. Ahi zongin hong thokik ahih manin eite khialhna hangin Amah kipia a, dikkisakna I ngah nadingin thokik hi. A mawhpi mah adik hong tangsak hi. ( Rom.4:25)

• Pasian mai-ah ei ading hong thumsak:

Jesuh pen hing kik ahih manin ei ading siampi hong sepsakin Sitni hong sepsak hi. Amah honpa le Topa dingin a sangte’n mawhna a bawl khak ciangin Pasian kiangah na thumsak a, A sisan tawh a sawpsiangsa mawhnate I Pa mai liah nawn lo hi. (Rom.8:34;Heb.7:25;1John.2:1)

• Kha Siangtho kingah thei:

Jesuh hingkikin vantungah kah khin a, a um khempeuh in hong khapsa Kha Siangtho ngah thei hi. Tua Kha Siangtho in hong nusai ngei nawn lo hi. (Jn.16:7;Sawl.1:8,2:4,32)

• Mawhna zawh nading vangliatna hong pia:

Jesuh tho kik ahih manin hinna thak kizui thei ta hi. Mihing ihih mah bangin mawhna kibawl kha thei zel hi. Hih mawhnate I zawh theihna dingin Jesuh a sih laitakin ei tawh si khawm a, a kivui laitak ei tawh kivui khawmin, hong thawhkik ciang ei zong hong thawhpih kik a, I pumlui khempeuh kivui khawmin I pum thak tawh hong thawhkik pih hi. Tua pen hinna thak I zuh theihna ding ahi hi. (Rom.6:1-4)

• I nuntakna ah gualzawhna hong pia hi:

Jesuh tho kik a hih manin I nuntakna sungah haksakna tampi om mah taleh a gualzo pente kisuak thei hi. A nungta Khrih in a nuntakna mahmah eite sungah hong thun a, A mahmah hong nungta ahih manin ei tha tawh hi nawnlo, Ama tha tawh na khempeuh kigualzo thei ta hi. ( Rom.8:31-39)

Jesuh tho kik ahih manin a tung a thuphate banah adang tampi zong kingah thei hi. Jesuh pen a honpa taktak a sangte tungah hih thupha in amau’ a, ahi hi. Ahi zongin tua Jesuh honpa in sang nuam lo a, Amah na up nop kei leh hih thuphate kingah thei lo ding hi.

Tua bek tham lo-in Pasian in Jesuh sihna pan a thawhkiksakna zong nang adingin man nei tuan lo ding hi.Tua ahih manin A thokik Zeisu na lungtang sungah sam in. Ama septheihnate mu dingin Amah sin lecin thupha tampi na ngah ding hi.

Reference:

Zangkong Awging Kum 23 cin Magazine bu sung pan Rev. Gin Za Lian’ thugenna kila hi.