Tu lai Zomi Khristiante sungah kha’ nasepna pen nidang sangin kisang thei zaw ta hi. Ahi zongin mu gige napi, a um nuam het lo zong ki-om lai veve hi. Laisiangtho sungah Pentekos Ni in Jesuh in a nungzuite tungah a kamciam mah bangin a Khasiangtho na buasuakin na pia hi (Sawltak 2). Thu-ummite tungah kha letsongte zong na pia lai hi (I Korin 12:8). Kha tawh a kidimte’ gah dingte zong na gen hi (Galati 5;22-23).
Joel 2: 28-29 – “Tua khit ciangin mi khempeuh tungah ka kha ka sung ding a, na puteekte un mang manin na tangvalte un maang mu ding uh hi. Tua hun ciangin nasem numei le nasem pasalte tung nangawnah ka kha ka sung ding hi.” Hih LST mun pen, Pentekos ni-in Khasiangtho a kibuak suk ciangin nungzuite in kamtuam pau tawh pau uh ahih manin mite in mihai zukham bangin a ko a nuihsan laitakin, Peter in a thugenna ah a zatkik Laisiangtho mun ahi hi. Hih Joel’ gen pen Pentekos ni in hong tung taktak hi. Kha siangtho a kibuak ciangin thu-ummite in kha letsongte le vangliatna (spiritual power) ngah uh hi.
Tua lakah a kilangh zawdeuhte le tulai Khristian tampi in a sangzawh lohte lakah kamtuam pau, kamsangna, le dawi hawlkhiatna hi pha diak hi. Amaute in kha letsongte ahi thuhilh siamna, lasiamna, laihilh siamna cihte sang zo napi-in kha nasepna le kha letsong mah ahi kamtuam pau, kamsangna, le dawi hawlkhiatna ciangin a leitung khuakun ngaihsun zo lo ahih manin na um zo lo uh hi. Nial bek hi lo-in tua letsong a ngahte zahpihin na ko lai uh hi. Dawi nei kau nei bangin pulpit tung panin kawk ziahziah uh hi.
Jesuh in na lamdang bawlna tawh kisai in “Ke’n aman takpi kong cihinah, kei hong um mi in ka bawl bang nate bawlin tua sangin a lianzaw a bawl ding hi…” (Johan 14:12). Kamtuam pau tawh kisai Paul in “…Pau lamdang tawh thu ka nget ciangin lungsim takpi tawh thungen ka hih tei hangin bang ngen ka hi hiam cih ka ngaihsun thei kei hi” ci hi. Hih mun ah Paul in kamtuam pau pen om lo hi, maan lo hi, a ci hi peuhmah lo hi. A khiatna gen theihna ding zong na ngen un, a ci bek ahi hi.
Kha letsong dangte mah bangin kamtuam pau, kamsangna, le dawi hawlkhiatna , na lamdang bawlnate zong sang a, up theih ding ahi hi. Pasian in hih letsongte a deih le a ngente tung ah pia hi. Tua manin Paul in kha letsongte na deihpha, na ngen un, ci-in hong hanthawn hi. Tu-in zong, Sawltakte hun Pentekos ni mah bangin eite tungah a thakin Topa in a khaguah hong ciin sak ta hen la, kha letsong le kha vangliatna tawh hong kidimsak ciat ta hen. Amen…