Pian.4:1-17

 Thupatna:

Leitung ah mihing sungpan a piang masa pen mi in mawhna bawlin Pasian gal hong suak pah  hi. Mawhnei mi sungpan piang a hihmanin mawhna bawl nuamsa pah hi.

1. Anaupang hun ( Pian. 4: 1-5)
2. Naupang masa pente (v.1-2):1 Tu-in mipa in ama zi Eve luppih a, amah gai-in Kain nei a, “Topa’ huhna tawh mi khat ka ngah khin hi,” ci hi. 2 Tua ciangin a sanggampa Abel nei leuleu hi. Tu-in Abel, tuu kempa hi a, Kain, lo khopa ahi hi.

– Kain in, Leitung mi khempeuh lakah naupang masa pen, mihing sungpan a piang masa pen .

1. Biakpiakna masa(Pian. 4: 3-4):3 Tua hun sungin Kain in lei pana piang gah piakna Topa’ tungah paipih a,…

-Eden huansungah Pasian le mi kikhawl hi( Lawmta bang in).

-Kain le Abel hun ciangin Pasian Biakna hong om hi.

-Kain in silesa deihna hong phawksak hi.

-Pasian’ deihna dong lo a cilesa deih dandan a sem

-Kain zia in mihing te zia hong lak hi.

1. Muhdahna hazatna masa pen (v.5):

5 ahih hangin Kain le ama piakna thusim lo hi. Tua  ahih ciangin Kain heh mahmah a, a mai sia hi.

-Pasian zia, Pasian’ deihna koi cih zon tangtang ding kisam hi.

-Pasian zia(thu) mang ding ahi hi.

 

Jn.14:15; Zeisu it te in a thupiak te zui ding!

15Tua ciangin Jesuh in, “Kei na hong it uhleh ka thupiakte zong na zui ding uh hi.

– Pasian thu mang photphot ding!

2. Thupiangte (Pian. 4: 6-8)
3. Lungsim puak(v.6):

 6Topa in Kain tungah, “Bang hangin nang heh a, bang hangin na mai  sia ahi hiam?

– Pasian in Kain kiangah banghang heh na hiam, ci hi.

– Na thuman kei leh silesa deihna, hehna, thangpaihna in hong sulzuih ding hi. – Thuman lohna in dahna piangsak hi

– Thuman lohna in lungsim gimna piangsak hi.

– Thuman lohna in elna, muhdahna, hazatna piangsak hi.

 

1. Kisanna (acceptance) (Pian. 4: 7):

7Limtakin hih lecin, nang hong kisang lo ding ahi hiam?  Limtakin na hih kei leh nang hong hih nuamin mawhna in hong buk a, nang hong uk nuam  hi. Ahih hangin nang in tua mawhna na zawh ding ahi hi,” a ci hi.

– Mawhna I zawhna dingin Pasian’ deihna I zuih / I man kul hi.

– Pasian’ deihna a zuih kei leh mawhna in nang hong zo hi ta hi.

– Biakpiakna na piakna ah nang deihdan hi lo a, Pasian’ deihdan a hih ding kisam hi. -Limtakin na piak kei leh khemna, mawhna tuamtuamte’n nang hong uk ding hi

1Sam.15:23

23Bang hang hiam cih leh lehdona pen aisan mawhna bangmah hi a, lungkhauhna pen mawhna  le milim biakna mah a bang ahi hi. Nangmah in Topa’ thu nial khin na hih manin, amah in zong  kumpi hihna pan nang hong nolh khin hi,” a ci hi.

– Pasian deihna bangin na sep kei leh Pasian a lehdo na hi hi.

– Lehdona pen aisan mawhna mah tawh kibang hi.

– Lungkhauhna pen mawhna le milim biakna mah tawh ki bang hi.

1. Hehna (Pian. 4: 8):

8Kain in a sanggampa Abel kiangah, “Gamlakah vak ni,” ci hi. Amaute gamlakah a  om ciangin Kain in a sanggampa Abel a that hi.

– Kain hazatna in muhdahna le hehna piangsak

– A hehna in mithat sak

– Hazatna le hehna in Pasian’ gal hong suaksak hi.

– Innkuan sung, Pawlpi sung, Nupa kal, U le nau kikal ah kihazatna a om ciang khat le khat  galin hong kimusak hi.

James.1:19; Heh pahpah kei un.

19Sanggamte aw, note in na theih ding uh ka deih thu in: Thu kigen khempeuh hoihtakin ngai pahpah un. Ahi zongin pau pahpah kei unla, heh pakpak kei un.

– Na lungsim kem in, na khialkhak ciang, mi khat peuh in hong  cikhak ciang hehpahpah ke’n.

3. Tumanlohna (Pian. 4: 9-17)
4. Mawhna (Pian. 4: 9):

 Tua ciangin Topa in Kain tungah, “Na sanggampa Abel koi-ah om ahi  hiam?” a ci hi. Amah in, “Ka thei kei hi. Kei, ka sanggam a kempa ka hi hiam?” ci hi.

-Kain in a mawhna a sel zo ding kisa hi. Abel a that khinphet hi napi, a omna a theilo kineih hi.

-Mihingte’n Pasian’ mai ah mawhna a selzo ding kisa kha hi.

– Mawhna bawl khat in a bawl lo bangin kineihin om thei hi.

-Tua in Pasian muhna ah a muhdah huai pen mi hong suak sak hi.

– Lai Saingtho in I mawhna in eimah hong zongkhia ding hi, ci hi.

Gam.32:23 –

23Ahih hangin note tua bangin na gamtat kei uhleh, en un, Topa’ tungah a khial khin na hi uh hi. Na khialhna un note hong sulzuih ding theitel un.

• Pasian mai panin a kiselzo kuamah om lo hi.

Mang.20:11-15;

11Tua ciangin tokhom kang a lian khat le a tungah a tupa ka mu hi. Ama omna  panin lei le van lengkhiamang a, a tunna mel uh kithei lo hi. 12A lian a neu misite tua tokhom  mai-ah dingin laibute a kilem ka mu hi. Tua ciangin a nungta mite a kigelhna laibu a dang khat  zong a kilem ka mu hi. Amaute’ gamtatna tua laibute sungah a kigelhna tawh kizui-in misite  tungah thu a kikhen hi.13Tuipi sungah a om misite, tuipi in hong pusuah a, Sihna le Misite’ Gam  in zong amau sungah a om misite hong pusuah uh hi. Tua ciangin a vekpi-in amaute’

gamtatnasa tawh kizui-in thu a kikhen hi. 14Tua ciangin Sihna le Misite’ Gam, meiphualpi  sungah a kilawn hi. Hih meiphualpi pen sihna nihna ahi hi. 15A nungta mite a kigelhna laibu  sungah a min a omlo peuhmah meiphualpi sungah kilawn hi.

b.Maizumna (Pian. 4: 10);

10 Topa in, “Bang hangin hici gamtat na hi hiam?Na sanggampa’ sisan, leilak panin kei tungah  hong kiko hi.

-Abel’ sisan leitang panin kiko khia hi. Abel’ sihna in a tawntungin Kain lungsim lawng khaden ding hi.

-Mawhna bawl in thuum kiklohna in Pasian’mai ah maizumna hong pia den hi.

-Thuumkikna a omlohna munah kisuang den, maizum den ding cihna hi.

-Mimai ah maizum pen tawl khat hi ding a, Pasian’ maiah maizum pen A tawntung a om Pasian  ahih manin a tawntung maizumna na thuak ding hi.

-Pasian in na khempeuh a thei PA hi.

c.Dahna (Pian. 4: 11-12);

11Na sanggampa’ sisan a hup dingin a kam a ka leitang tungah tu-in nang  hong kisamsiat hi. 12Lo na khawh ciangin nang a dingin an hong piangsak nawn lo ding hi. Nang  pen a galtai, leitung a a vakvai na hi ding hi,” a ci hi.

-Thuman lohna leh Pasian thusim lohna in dahna piangsak hi.

 

⮚ Kain thuakna ngaihsun in…

1. Leitang kihamsiat:

-Kain adingin leitang panin gahpha gah lo.

-Kain a dingin leitang tungah  thupha cih omlo hi.

1. Kain cimawh ta hi:

-Mun khat pan mundang khat ah kituah kawikawi a, mun kip neilo hi.

-Lungsim nopna nei ngeilo hi.

-Migilote in a lungsim sungah nopna nei ngeilo uh hi.

Pau.11:21, Migilote in gim a thuak hamtang nading,

Pau.11:31; Mihoihte hih leitungah thaman kipia ahihleh migilo le mawhneite gimna kipiazaw  kan ding hi.

– Mawhnei te thauk ding lianzaw kan ding Topa in ci hi.

– Thuman a thukhen PASIAN hi.

d.Thuakna (Pian. 4: 13-15);

13Kain in Topa’ tungah, “Keimah gim hong kipiakna, ka thuak zawh ding hi  lo hi. 14En in, tuni-in nangmah in leitung panin kei nong hawlkhia a, nang kiang panin kei nong  notkhia hi. Kei pen a galtai, leitungah a vakvai ka hi ding a, kei hong mu peuhmah in hong that  ding hi,” a ci hi.

15Tua ciangin Topa in ama kiangah, “Tua bang hi lo ding hi. Khatpeuh in Kain a thah le tua pa  tungah a zah sagihin kithuk ding hi,” a ci hi. Amah a tuakpeuh in a thahkhak loh  nadingin Topa in Kain’ tungah ciaptehna khat a koih hi.

-Thuhkikna pen PASIAN’ nasep hi.

-Pasian in mawhneite danpia hangtang hi.

-Mihing khat le khat kithat cih pen Pasian in deih lo hi.

-Mi khat peuh in Kain a sukkhak lohna dingin ciaptehna bawl hi.

 

e.Kikhenna piang(Pian. 4: 16-17);

16Tua ciangin Topa’ omna panin Kain paikhia-in Eden nisuahna lam Nod gam sungah a teng hi.  17Kain in a zi luppih a, amah gai-in Enok a nei hi. Kain in khuapi khat sat a, tua khuapi min  dingin ama tapa’ min tamin Enok a phuak hi.

-Mawhna in Pasian tawh hong kikhensak hi.

-Pasian deih banga sep lohna pen mawhna a hihi.

-Kain kisikki hi, cihna kammal kimulo hi.

-Pasian tawh kikhen cihna hi.

-Mawhna thaman in sihna hi.

-Pasian ompihna ngah lo hi.

Rom.3:23; Mi khempeuh mawh ciat uh a, a hong honkhia Pasian tawh kigamla uh hi.

Ezk.18:4; Mi khempeuh keima a’ hi a, pate ahi a, tate ahi zongin keima-a’ ahi hi. A mawh mipa  bek si ding hi.

Thukhupna:

Thukhen ni ciangin mawhnei mite, a kisikkik nuamlote tungah Pasian in a lian mahmah  thukhenna pia ding hi. Tuahun ciang a maute in tawntung gimna thuak ding uh hi.

Rev. Gin Sawm Thang