Kha Khanlawhna Pupi Sia Khambawi

Kha Khanlawhna Pupi Sia Khambawi

B.A, B.R.E, M.Div, Th.M, D.Min (Candidate)

A kaikhawm – Daniel Mangpu

Rev. Dr. Hau Lian Kham pen Zogam adingin KHA KHANLAWHNA PUPI ahi hi. A naupa Rev. Gin Za Lian (Tulsa a laphuaksiam Sia Sian’ pa) tawh kithuahin Zogam khanlawhna dingin na mapang masa uh hi. 1700 kiim lai a, John leh Charles Wesley te England gam ading a kizat bangin Pasian in amau unau pen Zogam adingin 1970 kiim hun khanlawhna dingin nakpi takin hong zatsak hi. Sia pa in thu genin, anau in lasakna tawh mapang hi.

Sia Khambawi in Pasian nasepna sungah a kalsuanpih a thu bulletpi in,“ Hun tomno sungin Kha mangthang tampi Jesuh kiang tunpih ding” cih ahi hi.

Innkuan thu

Rev. Hau Lian Kham pen Pu Lian Za Go le Pi Hau Za Cing te sungpan in Ngennung khua ah November 24, 1944 in suak hi. Tapidaw innkuan sung pan khangkhia ahih manin ne le dawn, gamtat luhekna lam ah paubangna om lo zah dong dingin Pasian a zahtak mi ahi hi.

Dec 28, 1972 in Mary Hau Lun Cing tawh pumkhat suak uh a, Tanu 3 nei uh hi. A tanute Lia Cing Lam Dim Kham, Lia Man San Lun Kham, Lia Cing Lian Ciin Kham te ahi uh hi.

Pasian nasem kipatna – Tedim

April 23, 1961 in Rev. Cin Kho Gin Tuiphum hi. 1968 kumin BA ong a, 1968-1971 sungin Burma Divinity School, Yangon pan BRE ngah hi. 1971 Cope Memorial Baptist Church-Tedim ah Sia sem hi. February 25, 1973 Zozang khua TBA kikhopna ah Ordination ngah hi. 1973 kum April 30-May 6 Tedim khua ah Kawlgam bup Innpua a kibawl masa pen cialpi bawl hi. February 9, 1975 ni-in Tedim Tuiphum pawlpi panin kihawl khia hi.

March 9, 1975 ni a piangkhia Evangelical Baptist Church ah pawlpi Sia sem hi. April 13, 1977 ni-in Tedim a kipan khia Assembly of God Pawlpi adingin Founder leh Sia ahi hi. April 30, 1977 a kipan 1979 kum Evangel Bible College, Yangon ah Siapi sem ding apai dong Tedim pawlpi Sia leh Tedim Section Assemblies of God kipawlna ah Superintendent sem hi.

Pasian’ na a sepzia

Tedim gam pawlpi sung kha lam ah pukcip a hihna a muh ciangin thungetna tawh kipan hi. Lasak siamna, lim lah siamna le ahun tawh kituak a thugen theihna hangin mite’n a thugen zaknop sa uh hi. Zomite’ ngaihsutzia tawh kituak dingin thu gen thei hi. Thu hilh aman simin mite in khensatna a piak ding gen tawntung hi.

Siapa in Laisiangtho pen thunei pen (Final authority) a hihna bulphuhin, “Laisiangtho in ci hi,” cih tawh gen den hi. A kisel cip sa Laisiangtho thu bulpite hong hingsak kik hi. Hih thute hang mahin a sia sepna CMBC pan a kihawl khia ahi hi. Gupna thu buppite ahi, “Hehpihna hang bek in upna tawh gupna ki ngah”, “ Thu-um mi in upna tawh nungta”, “gupna dawl thum” “misiangtho lakna,” “thukhenna”, Gamtat hoih in hong gum lo, gamtat hoih ding a hong kigum”, “thu kham le hehpihna kilamdanna” “ sihna kigo zo”cihte khempeuh hong telsak hi. Thuhilhna leh thusinna (preaching & teaching) ton khawm sak den hi. Nau minphuah, suahnite na ngawn ah gupna thu a thupitna gen hamtang hi.

A Pasian’ na sepna ah khat vei beek phun ngei lo hi. An a kipia bangbang ne-in, a kibawl bangbang tungah lum hi. Kiniam khiat den hi. Amah le amah kipahtawi ngei lo hi. “ Zomite Pasian in hong zangh, ei le ei I kicih sang midang te’n hong ci zaw leh,” cih gen hi. Lai Siangtho sangkah ding mite hanthawn hi. Nungzui suahna taktak neih ding gen den hi.

Pasian nasepna- Yangon

1982 kumin Burma Evangelical Council of Churches ading ngeina kip bawl hi. 1983 kum ciangin District No.3 AG kipawlna ah Superintendent sem hi. February 26, 1984 ni in Evangel Bible College huang sungah Grace Assembly of God Pawlpi phuan hi. Tua kum August kha-in Singapore a kibawl AGAMA khawmpi ah Kawlgam tangin kah hi. 1987 kumin Kawlgam bup AG kipawlna ah General Secretary dingin kiteel hi.

Lai Siangtho sangkahna leh gamdang zinna

1987 kum bei ni in Philippines gam Baguio khua a Asia Pacific Theological Seminary (APTS) ah sangkah dingin a innkuan un pai hi. Hih sang pen Leitunga AG sangte lakah Asia lam ading AG sang thupi pen khat ahi hi. 1989 kum April leh May sung Philippines gam sungah Pasian thugenin pai kawikawi uh hi. 1989-1990 sung APTS ah sang naupang President dingin kiteel hi.

1990 kumin APTS Board thu kikupna ah kah hi. Tua kum April pan May dong a zi Mary Hau Lun Cing tawh England, Spain, West Germany, Australia, Yogoslavia leh Poland gamte ah zin uh hi. 1990-1991 sung Baguio khua International Praise Center ah pawlpi Sia sem hi. 1990 kum September 10-12 sung Malaysia gam Port Dickson khua a kibawl Agape Campus Ministry thu kikupna ah Kawlgam tangin kah hi. 1991 sungin Japan, Hongkong leh Singapore ah Pasian thu genin pai hi.

1991 April kha in APTS huangah Th.M (Pastoral Studies) sin a, a zi in Doctor of Education sin ding a Manila khuapi ah a pai ciangin tua kum June kha in Manila khua ah kikhin hi. 1991-1994 sungin Manila Myanmar Fellowship Dawn Prayer Fellowship, Manila phuan a, International Charismatic Center ah huhsia sem hi. 1992 kumin World Evangelical Fellowship thu kikupna ah Kawlgam tangmi in pai hi. 1993 kumin Kawlgam ah APTS tangmi, Extension Director dingin kiseh hi. March 24, 1994 ni in Th.M grade A tawh ong a, April kha ciangin Singapore le Thailand gam tawnin Kawlgam ah hong ciah hi.

Kawlgam ah Pasian nasem ding ciah kik

1994-1995 sung Grace Assembly of God pawlpi ah pawlpi Sia sem in, Evangel Bible College ah President zong sem hi. Tua sung mahin Myanmar Evangelical Christian Fellowship, Theological Commission ah Director le Myanmar AD 2000 & Beyond Movement ah Assistant Coordinator sem hi. 1995 kum January kha in Doctor of Ministry laivuanna ah mat sangpi (Flying colors) tawh ong hi. Tua kum mah May kha sungin Korea gam Seoul khua-ah ‘The Global Consultation on World Evangelization 1995’ ah kah hi.

Vanah hong ciah san

Dec 29, 1995 ni-in Vanah I pa Pasian kiang hong ciah san hi. Ama hong nusiat khit ciangin Grace AG le EBC Laisiangtho sangte pen a it a zi Dr. Mary Hau Lun Cing in ama nuntak sungteng sem suak hi. Tu laitakin Grace AG pen Sia Khambawi’ upa tapa Sia Dr. David Go Lian Suum te nupa in kem uh hi.

Ref: 1. Bethel AG-Tedim, Silver Jubilee laibu