Ka neu tung pan kipanin nipi sang kahin, Sia/siamahte hong genna tungtawnin Jesuh khris hong tatkhiatna, Pasain hong itna thu ka thei hi. Kum (11) ka phak ciangin ka theihna bulphuhin (Johan 3:16) na tungtawnin Jesuh khris pen ka gumpa le ka Topa in sangin tui ka kiphum hi.

Tua bang in nungta toto-in leitung gualnopna sungah ka nuntaknate zangin ka om hi. 2015 Jun kha in U.S.A hong tungin pawlpi Upa khawng sem, Mission department khawng ah sem, cih bangin ka om a, Pulpit panin Siate in a piangthak khit tengin khut lam hong cih ciangin ka lam a, ahih hangin ka maizum hi.Tun si leng ka kha vantung gam tung taktak inteh ci a, khamuanna nei ing, a ci teng hong cih uh ciangin ka  kam in nei mah ing, ci-in ka lungsim tawngah luana tawh ka kidim hi.

Tua bang ka om a, kei zong Jesuh um ci a, mite bangin khamuan na kician  nei lo ka hih manin bang ci bangin khamuanna ngah thei ding ka hiam, ci-in tua khamuanna lunggulh mahmahin ka omom kawmkalin  kum (5) sung hong bei to hi. Dec 28- 31, 2020 sung Zomi Christian Church, Bowling green, Ketucky ah ( Evan Dai Khai ) Gupkhiatna thu hong genin tua laiah ka pai hi. Mawhna thu hong genin (Rom 5:8-9) na sungah mawhnei I hih laitakin eite adingin Khris hong si ahih manin Pasian in eite hong it mahmahna  thu hong lak khin hi. Amah sihna hangin tu-in Pasian tawh kipawl thei-in hong gen ciang in kei a ding in, la-in gup ngah ka kitel hi. Tua ahih manin (Efesa 1:13) Note in zong hotkhiatna a hong ngahsak thei lungdamna thu a man za-in Khris na up uh ciangin, Pasian in a hong ciamsa bangin ama mi na hihna uh a kilatna dingin note tungah Khasiangtho hong piakna tawh a hong ciamteh hi. Lungdamna thu amaan a hi Jesuh khris in sit nei lo-in amah hong kipiak manin kei mimawh penpen Pa Thang Sian Tuang hong itin ama sisan  tawh hong tatkhiat manin gupna ngahin Pasian in a hong ciamsa bangin Ama Kha siangtho  hong piakna tawh kei hong ciamteh  hi. (Galati 4;6) sungah amah bangin Pasian pen Pa aw, Pa aw, hong cisak hi. Mihingte in a theihtel zawhloh Pasian hong piak lungsim nopna in Khris Jesuh tawh na kipawlna uh hangin note hong lungnuamsak ding hi (Filippi 4:7).

Hih ka teci panna hong simsak khempeuhte tungah Damlote tungah damna, Suakta lote tungah suaktakna, Gupngah lote tungah Gupngahna, khamuanna a nei nai lote tungah khamuanna, Jesuh Khris min tawh hong tung tahen. Amen. Hih bang a teci pan theihna ding hong vaihawm Agape Digest ah mapang khempeuh Topa’n thupha hong pia hen. I hihna khempeuh Topa minthangna hi tahen. Amen.

Pa Thang Sian Tuang