Khangno lai na hihman na khangnona kepsiam in. Mi khempeuh in khangno hun kinei ciat hi. Tua na khangno hunsung bang ci zat ding na hiam?

Na khangno hunsung sawt lo ding a hihman, a manpha-in zang in. Khangno na hihmanin a pualam ah na sepnop, na hihnop, na sinnop hong tam mahmah ding hi. Khangno lai-in ngaihsutna khuak zong hat lai ahih manin na ngaihsut zong hong tam mahmah ding hi. Na ut na sep nop tuamtuam zong hong tam mahmah ding hi. Tua ahih manin na sep ding, sep huai maw, sep huai lo, Pasian’ zia tawh kituak maw, kituak lo, cih pen na khensiam ding hong kisam mahmah hi.

Mihing nam nih nun tak zia en ni.

1-Mihoih mipilte’ nuntakna

PAUNAK 13:20 “Mipil tawh kikhawl lecin na pil ding a, mihai tawh kikhawl lecin gimna na thuak ding hi.”  TDB

Hih lai siangtho mun i et ciangin mihing nam nih hong mu khiasak hi. Mipil nuntakna en le hang, PAUNAK 1:7 ah “Topa zahtakna in pilna kipatna hi a, mihaite in pilna le thuhilhna don lo uh hi.” Topa zahtakna in pilna kipatna hi, ci hi. TOPA zahtakin nungta hi. ROM 12:21 ah, “Tua ahih manin gitlohna kizosak kei unla, a pha gamtatna tawh gitlohnate a zo na hi ta un.”  Pilna neite in asia pen a hoih tawh zo theih uh a, gam tat siatna pen gamtat hoihna tawh laih thei hi.

Daniel nuntak na en leng, a mah zong khangno khat mah hi. Tu laitak ei dinmun tawh kibang mahmah hi. Ei zong Kawlgam panin peemta gambeelin US gam atung ihi hi. Daniel zong Babylon kumpipa in sal dingin amat ahi hi.  Kamphatna tawh kumpi inn sung hong tung tak ciangin  an lim nono, zu lim nono a mai ah kilui a, ahi zongin amah in tua siattheihnate, gamtat hoihna tawh hong do hi. ROM 12:21 a cih mah bangin hoih lohna, siat theihna pen hoihna tawh hong zo hi.

Nopsakna ding kumpi inn sung pan Topa mah bel tinten hi. Topa’ deihna bang hi a, Topa bang cih leng lungkim ding a hiam, cih bek ngaihsunin Topa zahtak takin hong nungta hi. Babylon kum pipa sangin Topa lau huai zaw, cih thei ahih manin kumpipa i an piaksa lim nono, zu lim nono sangin anteh meh bek hong tel mawk hi.

Tua bangin Topa zahtak a hong om tak ciangin Topa in midangte sang a zah 10 in a lamdang takin pilna pia hi. PAUNAK1:7 – Topa zahtakna in pilna kipatna hi. Topa zahtak theite mipil ahi hi.

2-Migilo, Mihaite’ Nuntakzia

“Mihai in a lungsim sungah, “Pasian om lo hi,” ci-in ngaihsun hi. Amaute sia uh hi. A kihhuai-in gamta uh a, a hoihin a gamta kuamah om lo hi.” (Late 53:1) Mihaite, migilote in Topa om lo hi. Kei suahtak, ka ut bang hih ning, ci uh hi. Ka lungsim sung a, suak bang hih ning, ka ut leh hehin mi tawh kitawng ning, cih bangin gitlohna kiuk sak uh hi. Tua bang nuntakna pen migilo, mikhel, mihaite’ ngaihshutna ahi hi.

Khangnote i lungsim ngaihsutna pen zuih khak het lo ding thupi hi. I lungsim i kepcing ding kisam hi.  Ka lawmte’ gem (game) kimawl, parti pai, kei zong kimawl ning, pai ning, cihna pen lungsim deihna zuihna ahi hi. Lawm hoih zongin na lawm ding teel in. Lawm hoih tawh na ki thuah leh na hoih ding a, a hoih lo tawh na ki thuah leh na sia ding hi. Mi gen siasia khat tawh na ki kholh leh mi gensia na suak ding a, zu ne khat tawh na kithuah leh zu na ne kha ding hi. Tua ahih manin migilo, mihoihlo i cihte in lungsim ngaihsutna uh zui-in a mau deihna bangin gamta-in Pasian om lo hi, ci ngam uh hi. A mau deihna a zuihna hangun a nuntakna uh siatlawh uh hi .

I la ngaih, i et muvite in zong i nuntakna hong siasak thei hi. Leitung lam zawllate ngai leng zong, leitung lam hong tunpah hi. A diakdiakin US bangah khangthak late kammal hoihlo (Bad word) tamin, tua late bang ngai leng i lungsim hong la se hi. Tuate in siatna lam hong kaikai  na hi gige hi. Tua panin siatna lam sinnopna, hihnopna i lungsim sungah hong lut a, tua in i khangno nuntakna hong nektum mang thei-in sihna hell khuk dongah hong puak thei na hi gige hi. Tua manin bang la ngai, bang muvi (movie) en i hiam? Topa in hong mu gige, cih phawk in.

Hih bangte na zongsat leh, Topa kiang thungen in. Lungsim takpi tawh kiko-in na nget nak leh, nang hong huh dingin Khasiangtho hong pai ding a, tuate khempeuh na nusia zo ding hi. Na hih zawh loh, nasepzawh lohte na sem zo ding a, na zuihzawh loh nate zuihzawhna thathak Topa’n hong guan ding hi.

PAUNAK 18:2 ah “Mihaite in thu a teltheih zawhna ding uh kin lo uh a, pil si, a kicih theih nading deihna bek tawh thu gen uh hi.” Mi kiphasakte, mihaite amau le amau kihisak hi, ci hi. PAUNAK 18:6 “Mihaite in kitotna ding a pat ciangin hong sat un, ci-in a ngenngen ahi hi.” Migilo, mihaite in kam hoihlo pau nuamsa-in mi gensiat zong nuamsa mahmah uh hi. Topa’ hoihna le ama gamzaina ding hi lo-in khat le khat kitot theihna, kigal bawlsakna, mi kimuhdah theihna ding bekbek a kam pan pusuak hi. Hih ci bang gamtat ngaihsutna pen mi hoihlo, mi gina lote’ gamtatna ahi hi. Tua ahih manin khangnote na khangno lai-in lungsim hoih neih theihna ding, thusia tam a lut ma-in na lungsim kembit in.

Thangnote ading dotna

Mi hoih le hoih lo bang ci khen theih ding i hiam cih leh, PAUNAK 10:23 “Mihaite in gamtatsiat ding nuamsa uh a, thungaihsun theite in pil gamtatna nuamsa uh hi.” Mi gilote in gamtatsiat ding bekbek ngaihsun uh hi. Leitung gualnop sakna sungah nuamsa-in, hih leitung nopsakna sung pan paikhiat ding ngaihsunin nei lo uh hi.

Mi hoih mi pilte in thu ngaihsun thei uh hi, ci hi. A hoih lam a zui theite pen mipil ahi hi. Nisim i nuntakna ah i sep i bawl i kam pau, mukpaute Laisiangtho tawh kituak maw, kituak lo, cih sitpha den ni.

Lawm le gual tawh kithuahna ah Laisiangtho bangin nungta-in Khrih lim lakin thu-ummi i hihna kilangkhiasak ding hi hang. Ei sang a niam zawte kai to-in ei sang a sang zaw a pil zawte tawh kikholhtheih sawm ding hi hang. Ei tawh pilna kikim pihte kiang zong lawm hoih hihna lak ding hi hang. Lawm hoih i deih leh ei lawm hoih hih masak kul hi. Na khangno lai etteh ding pen Jesuh hisak tawntung in.

 Nuntakna nam 4

1- Khuamial sungah om a, khuavak gamtatna nuam a sa mi.

2-Khuavak sungah om napi, khuamial gamtatna a gamta nuam mi.

3-Khuamial sungah om a, ut banga gamta, awlmawh nei lo mi.

4-Khuamial sungah om napi, khuamial gamtat nuam sa lo, khuavak a

lunggulh mi.

Kawi pen i hiam? Kisit pha ding hi hang!

Pa Kap Deih Khen