Leitung tomno sung i nuntakna sungah i leitung pasian ahi i tunnu le zuapa thupit zia le nu khat I din mun, pa khat I din mun tawm en kawm ni.

1. Nu le Pate’ Mawhpuak :

I innkuan sung a nop theihna dingin i inn sungah pate bang zahtakin thupi hiam cih leh, pa i cih pen innkuan a dingin lutangpi khat ahih banah inn khuampi khat zong ahi hi. Inn sung papi in i innkuan sunga dingin lutangpi ihih mah bangin, bang khat peuhpeuhah i innkuanpihte’n bangmah i thei kei phial zongin ei hangin lungmuang mahmah uh hi, cih i phawkden ding kisam hi. Tua mah bangin nute’n zong i inn sungah ih mawkpuak i theih ding kisam mahmah hi. Kei numei khat hi leng ing, cih lungsim i neih khak loh ding zong thupi a, i inn sungah pate bek hilo in pate zah mah bangin ih mawkpuak lian mahmah ahih lam zong i kiphawk den ding kisam hi. Tua ahih mamin pilna, siamna, hauhna sum le paiite i nei kei phial zongin ka innkuan sungah Ka dinmun, ka mawhpuak bang hiam, cih i phawk/i theih ding thupi mahmah hi.

Pa in i innkuan a dingin lutangpi ihih mah bangin i gamtat kampau a kipan i innkuan pihte hong etteh takcing, hong angtangpih tak dingun, i nuntak theih ding kisam mahmah hi. I innkuanpihte adingin inn khuampi ihih mah bangin akip, akho khuampi ihih ding kisam hi.  A muanhuai akip akho inn khuampi ihih nak leh, bang zahtakin huihpi hong nungta leh zong, hong nawt zolo ding hi.  Tua mah bangin nu in i innkuanpihte adingin “Akpi” in a note a khanuai ah a koih a huai mah bangin bang zahtakin huihpi hong nungin tuihualte hong hat tase mahleh, i innkuante lungmuang takin a om theihna dingin i kep i huaisiam ding kisam mahmah hi. Ei bang mah i hih loh hangin i tate i innkuanpihte’n hong muang hong lamen mahmahin banglo khat bang tuak leng, ka nu ka pa mah hong ci ngaungau-in i maitang hong mu bek leh uhzong, a launa khat nangawn uh, hong pha pahlian mawk hi.

Tua ahih manin nu le pate in i innkuan sung adingin a etteh huai a muan huai kulhpi i hih zawh takpina dingin ei le ei ki-et phatphat, kikhinkhai phatphat ding kisam hi.

2. A Pahtawi, Ettehtaak Cing Nu le Pa Ka Hiam?:

Leitungah Nute Pate’ Ni ci-in ni thupi mahmah khatin a kiciapteh ni/a kikipsak ni-in nulepate kipah tawi zaihziahin, tate in nulepate tung lungdam kohna thupha ngetna in kizang hi. Hih munah ei nulepate’n i ngaihsut mahmah ding khat om ka sa hi. Tua in bang hiam cih leh, pawl khatte a dingin ni thupi ni ahih hangin, pawl khatte a dingin a maimial mahmah ni uh zong na hi thei hi. Bangzah takin tate’n hong pahtawi nop hangin pahtawi theih dinga i na om loh manin kuama theihlohin i tate na maimial thei hi.

Inn sung nupi papi khat in i mawkpuak i theih loh manin, i innkuan pihte khuapih tuipih a lawm a gual lakah dak ngamlo-in, maimial lawh uh hi. Tua ahih manin i innkuanpihte’ mai-ah ei mahmah abang kimah i cidam mahmah ding kisam hi. Ei ginatloh manin i nu i pa i pasal i zi i tate nangawn tawh nuam takin ankuang ki-um khawm theilo banah, innsungvai kihawm khawm thei nawnlo bek tham loin, sungkhatsuak nangawn ki-it kingaihna om loin, nisimin i inn sungah tualgal tung den thei mawk hi. Tate adinga gal lianpen zong kihi kha thei hi.

I tate adingin koi ci dan in a ngilh mawh uh tunnu, zuapa i hi kha diam kingaihsut phat huai mahmah kasa hi.

3. Nu Le Pate Thupitzia:

Nu le Pate bang zah takin thupi hiam cih leh, i innkuan sunga dingin i lutangpi, i suangpi, i lum, i tei ahi uh hi. Sum le paii, pilna siamna bang mah nei kei mah tase lehuh, a tate hong it, hong khual luat manun, a zuu a ham, a suk a to cih om loin vai hong dingsak banah maizum minsiat ding nangawn khual zo lo liangin, ei thuak tang ding hong thuaksakin gilvah takin zong ne man dawn man loin ahih theihna zahzah uh tawh hong pantah toin pilna siamna hong zong sakin mipil milian hong suah to uh hi.

Ai zong, tu hun ciangin tua i pil i siamnate kizang khialin, hih ciang dinmun i tun theihna dingin hong pantah a, a hun neih khempeuh uh, le a tha le ngal hatna khempeuh uh hong beilawh i tunnu le zuapa kimangngilhin, kisimmawhin, kinawlkhin kha thei mawk hi. Na tunnu le zuapa hong itna hong khualna nang bang tawh teh sawm na hi hiam?. Nang hanciamna zong om mah hi, ahi zongin tua na dinmun na tung theihna dingin tha tampi hun tampi hong beih lawh na tunnu le zuapa mangngilh ngei kei in maw.

Ka nu ka pa zu khamkham khat hi. Pilna zong nei lo hi, ci kha kei in. Tue bangpi mah na tun le zua in tu-a na dinmun ciang hong tungsak zo hiven. Na tate zong nang tun le zua hong tutna tan na tun’ zo ding hiam? Tua pilna nei lo na nulepa, zu khamkham na nulepa, na maizumpih ngamloh na nulepa hang mahin tu-a na tungna a tung na hih gige lam mangngilh kha kei in maw. A nai om lai-in pahtawi inla a hun om lai-in na it na ngaihna lakkhial in. Tui buasa kiluak kik thei lo hi.

Thukhupna:

I tun le zuate pen i pa Pasian in ei a dinga a hoih pen a manpha pen, a kituak pen dinga a hong piak i leitung pasian ahi uh hi. Laisiangtho sungah bang na ci hiam cih leh, “A nu a hi a, a pa ahi zongin a zahtak lo mipa in gimna ngah ta hen”(Thu hilhkikna 27:16) na ci hi. Tua bek tham loin “Ama pa hita leh ama nu hita leh a samsia mi peuh mah ki that ding hi” (Paikhiatna 21:17, Mark 7:10) na ci lai hi. Ei tawm khat hih theih na, pilna siam na, sum leh paii tawm neih man tawh ki hisak in ka nu ka pa “Gamh” hi kei, kei tha leh ngal hat na tawh ka zonsa hi peuh ci-in, nu leh pa thusimlo, sim mawh in, avua ngam, asat ngam, inn sung pan a hawl khia ngam nangawn ki om mawk hi. Ki ngaihsun pha mahmah dih ni maw.

I mabanah i innkuan sungah i khuasak a nop theihna ding le i daupai semsem theihna dingin, i tun le zua i thupit saka, amau hong itnate le hong khoi hong pattahnate uh, i phawk tawntung ding ahi hi. Paunak 20:20 ah “Na nu na pa na samsiat leh khuamial sunga meivak kisumit na bang ding hi” ci hi. I tunnu le zuapa mi a bang kei phial zongin i piankhiatna hi a, amau a om manin “Ei” a om, a piang ihi hi. Tua ahih manin I tun le zuate ei simmawh pampaih theih ngei dingte hi lo hi. I zahtak i thupit bawl ding ahi hi. Tua banga i gamtat ding Topa hong deihna hi a, tua bangin i gamtat leh i innsung khuasak hong nuam ding hi. Ei zong i sep i bawlna khat peuhpeuh ah i daupai-in i lungnuam ding hi.

Nu le pa a zaktak lote cikmah hunin daupai ngei lo hi. Leitungah tomno sung nuam a sa phial zongun, sauvei mang lo banah a khan sau zong kuamah om lo hi. “ Pasian in hong piak leitang tungah na khan uh sauin na nopsak theihna dingun, na nu le pa uh zahtak un” na ci lai hi. Nu le pa i zahtak a, i thupit bawl leh i khansau ding hi. Tua ahih manin nu le pa a zahtak, a thupi bawl, a lungkimsak tate ahi kim ciat dingin Topa’n mimal kim thupha hong pia tahen. Amen.

Hannah Dim Khan Vung