Lai-at: Rev. Zen Khan Kup

Acts 2: 1-13

Pentekos Pawipi pen Judah mite’ Pawi lianpite (3) lakah  a nihna hi-a, anlak zawh ahih kei leh an kaikhoppawi, lungdamkoh biakpiakna pawipi ahi hi. Mangbuh thak tawh a kibawl khomun tawh lungdamna le kipakna tawh a kibawl mangbuh pal pawipi zong kici hi. (Siam 23:16-17). Hih pawipi pen Judah mite’ anpal pawi zawh ni a kipan ni sawmnga  a cinni a kibawl pawipi ahih manin Pentecost “sawmnga” a kici ahi hi)

1. Paisan Pawi- Sinai Mual le Pentekos

Pasian pen limtak gelkholna tawh na khempeuh a kilem diamdiam dinga a bawl Pasian ahi hi. Israel mite’ saltanna Izipt gam panin Paisan pawi tuuno’ sisan tungtawnin suahtakna ngah uh hi. Tua Paisan pawi tuuno in leitung mite’ mawhna saltanna pan suahtakna hong pia Jesuh’ Sisan lim lahkholhna ahi hi. Izipt gamah amasa pen Paisan pawi a bawl khit ni sawmnga a cinni in Saini Mual tungah Pasian mahmah a mite tungah meikuang tawh kilangin Thukham Sawm pia hi.

Hih tawh kisai in (Paikhiatna 19, 20)      sungah teltakin kimu thei hi. Izipt pan a paikhiat khit zawh ni sawmnga (50) a cinni-in Sinai Mual tung pan Pasian a kilatna hi ci bang ahi hi. Israel mite Izipt gam pan kha masa ni (14) ni-in paikhia uh ahih manin tua kha masa sungah ni (16) khualzin uh cihna ahi hi. A kha nihna sung khempeuh ni (30) bit khualzin zom uh hi. Cih nopna ah Izipt pan a paikhiat zawh uh ni sawmli leh ni nguk (46) a cinni-in Sinai Mual bul tung uh hi (Pai 19: 1-2). Sinai Mual bul pan Pasian kiangah Moses pai to a… (Pai 19:3) ci ahi man in Moses mual tung a kahto ni (1) tawh gawm leng ni (47) ahi hi. “Topa in Moses kiangah, Mite kiangah pai in la tuni le zingciang sung teng amaute singthosak in”… (Pai 19:10) ci ahi man in Moses Mual tungpan hong kumsuk kik ni le  a kisiansuah ni  gawm ni nih (2) behlap leng Ni sawmli leh ni kua (49) ahi hi. Pasian in “a ni thum ni-in a baihsa-in om in; bang hong hiam cih leh a ni thum ni-in Sinai Mual tungah mite khempeuh’ muhna ah Topa hong paisuk ding hi” (Pai 19:11) ci hi. Hih “a ni thum ni” pen Israel mite Izipt pan a paikhia zawh uh ni sawmnga (50) a cing ni ahi hi. (14+16+1+2= 49) amkhat pan Pentekos pawipi pen nipi kal sagih; (7×7 = 49) a cin khit a ni masa ni ci-in zong kiciamteh hi. Hihte khempeuh i lungngaih ciangin Pasian Kammal a kiciat dan, a muanhuai dan, le a uptaakdan hong telsak semsem hi.

2. Paisan’ Tuuno Jesuh le Pentekos

Leitung mite’ mawhna saltanna pan suahtakna  ngahna dingin Paisan’ Tuuno Jesuh Khris in Nipi zawh ninga ni (Good Friday) nai 12:00 pan 3:00 dong singlamteh tungah leitung mi khempeuh tang dingin a nuntakna hong pia hi.  A zingciang pen (Saturday) Sabbath ni ahi manin nitum ma-in Jesuh Khris luanghawm han sungah kivui hi. A sih zawh a ni thum ni (Sunday) Nipi zingsang phalvakin Jesuh’ sihna pan a thawhkik ni pen Judah mite’ ni ciaptehna ah gah masa tawh biakpiakna a neih hunsung ahi hi. Judah mite in mangbuh anpal gah masa tawh Pasian kiang ah biakpiakna a lui uh mah bangin, sihna zo a a thokik  Jesuh Khris in Pa Pasian tungah a kilui a lianpen “Gah Masa” ahi hi.

Ni sawml

Sawl 2:4 Amaute khempeuh Kha Siangtho tawh kidim uh a, tua Kha in minam dangte’ pau tawh amaute a pau theisak hi. (Tedim Lai Singatho). “And they were all filled with the Holy Ghost, and began to speak with other tongues, as the Spirit gave them utterance. (KJV)

Tua in Pasian hong kamciam a tangtunna hi-a thu-um mite “Kha Singtho sungah kiphumna” a masa pen ahi hi. “Baptism of Holy Spirit”

3. Kha Siangtho Sungah Kiphumna tawh kisai Kamciamte

i (40) leitungah a om sungin nungzuite tungah Thuciam Thak tawh kisai kamciam ahi “nihvei suahkikna” pia hi.(Johan 20:22) “Tua ciangin amaute tungah “mut a,” Kha Siangtho na sang ta un…”ci hi.  Hih “mut” cih kammal pen Greek pau-in empbusaõ  hi-a Pasian in Adam a humopna: Pian 2:27 leh Ezk37:9 sunga “hin’ theihna hu” cihte ah zong hih kammalte kizang hi. Cihnopna ah Jesuh Khris Gumpa le Topa a, a sang nungzuite tungah Pentekos Nipi Kha Siangtho kibuaksuk ma pekin “Pianthakna-Nihvei Suahkikna” tawh kisai Kha Singtho kipia khin ahih lam teltakin kimu thei hi. Jesuh Khris vantung a kah zawh  ni sawm a cinni pen Israel mite’ Pentekos pawipi ni ahih banah Jesuh’ sihna pan a thawhkik zawh Nipi kal sagih (7) a cin khit a masa pen Nipi ni ahi manin tua ni pen “Pentekos Nipi” ci-in kiciamteh hi. Tua ni-in Jesuh’ sisan tawh sawpsiangna a ngah khin sa thu-ummite (120)   tungah Khasiangtho kibuasuk ahih manin amaute khempeuh Khasiangtho tawh kidim uh a, Khasiangtho in thu a piak bangin Kam tuamtuam tawh thu a hilh uh hi ci-in Lai Siangtho in gen hi.

Kamsangpa Joel: Joel 2: 28-29

28 “Tua khit ciangin mi khempeuh tungah ka kha ka sung ding a, na puteekte un mang manin
na tangvalte un maang mu ding uh hi. 29 Tua hun ciangin nasem numei leh nasem pasalte tung nangawnah ka kha ka sung ding hi.”

Tuiphumpa John: Mtt.3:11

“11 Na kisikkik khitna uh a kilatna dingin tui sungah note ka hong phum a, ahi zongin kei nungah a hong paipa in Khasiangtho le mei sungah note hong phum ding hi.

Jesuh Khris:             Luke 24:49

“Ka Pa’ hong ciamsa thu, note tungah ka hong pia ding hi. Ahi zongin vantung panin tua vangliatna na ngah mateng uh hih Jerusalem khuapi-ah na ngak un,” a ci hi.

Sinai Mual le Pentekos Etkakna

Siangtho Nuntakna:

Sinai Mual tungah Pasian a kumsu ma-in mite kisiansuah sak masa hi. Tua mah bangin ei thu-umte zong Jesuh Khris’ sisan tawh sawpsiangna a ngah ihih mahbangin i nisim nuntakna ah singtho nuntakna tawh i nuntak ding Pasian in deih hi. Siangtho nuntakna tawh a nunta nuam mite Kha Siangtho in huh-in thapia hi. Tua ahih manin Piangthak (nihvei suahkikna) a ngah thu-um mite’ tungah Pentekos ni a, a kibuasuk “Khasiangtho” sungah hong phum dingin Jesuh Khris in hong kamciam ahi hi.

Siangtho Nuntakna tawh kisai George O. Wood’ genna

AG pawlpi sungah Pasian nasem a pukkikte le a kitawpsakte sazian kikaihkhopna 1982 kum a kipan kinei toto a, kum nga khat vei etkakna kinei hi. Kum nga cinsial mimal tawmta khang to zel hi. Kum simin 0.5% sangin a tawm zaw Pasian nasepte pawlkhat kitawpsak hi. Tua bangin 0.3% tangding khalna kipia hi. 1987 kumpen a siahuai mahmah kum khat in kiciamteh a, tua kum in Pasian nasem 0.78% te a nasepna panun kitawpsak hi. pawlkhat pen khalna pan suakta kik zo nailo uh hi. Wood genna ah “AG Pasian nasemte le a dang a minthang Khristian kipawlna tuamtuamte tawh enkak le hang, AG Pasian nasep a kitawp sak le Khalna a kipia mimal phazah pen a dang kipawlna liampite sang tampitakin tawm zaw lai hi. AG Pasian nasepte a mawh khak uh teh, kithei diak le minsia diak se uh hi. Bangbang ahi zongin hihci banga AG – Pasian nasepte a puk, a khial kha mimal phazah pen a dangdang Pawlpi lian, pawlpi minthangte sang a tawm zawk theihna pen Assemblies of God pawlpi mite’n (Baptism of Holy Spirit)- Khasiangtho sungah kiphumna hangin Khasingtho tawh i kidimna thupha a kilat khiatna lianpi khat ahi hi,” ci-in gen hi. (General Superintendent’s Newsletter, January 2004: by George O. Wood)

4. A Kikhen Leii: Babel Tausangpi le Pentekos

Babel mun a kampau a tuamtuam kikhenna in hamsiatna khat ahi hi. Pian 11:7 –

7 Hong pai un, amaute khatlekhat’ thugen a kitheih lohna dingun eite paisukin amau’ kampau va kitukalhsak ni,” a ci hi.

Pentekos ni Khasiangtho tawh a kidim thu-um mite kampau, thuhilhte, amau kampau ciatin za uh hi.

Sawl 2: 8 Tua hinapi-in bang hangin amaute’ thugen pen eima pau ciatin za ihi hiam?

Jerusalem khuapi a om Pentekos Pawikham mi tampite in Khasiangtho tawh a kidim nungzuite’ thugente amau pianpih kam tekin za uh hi. Pasian in Babel a kampau a kitukalhsak hangin Khasiangtho’ piak ahi kamtuam, kamtak tawh Jesuh Khris sungah pumkhat a suahkik sakna ahi hi.

Babel – Kampau kiktukalh (Pian11: 1-11) Kampau kitukalhsak cih pen Pasian’ hamsiatna lim khat ahi hi. Kiphatsakna, kithagum-muanna pen Satan tungpan a i luahsuk siattatna ahi hi.

• Eite i kikhenthang gawp lohna dingin ei’ adingin khuapi khat bawlin…
• Vantung a ban ding tausang pi khat lamin …
• Eite’ min ding khat bawl ni.

Hih mite ngimna le gelna in Pasian’ deihna tawh kilehbulh ahi manin Pasian in kikhentangna piangsak hi.

Jerusalem – kilemna, daihna khuapi… om khawm uh hi. (Sawl 2: 1-12)

• Pau kibang lo gam tuamtuam (15) panin Jerusalem khuapi ah om uh hi.
• Hih huging a zak uh ciangin mihon tampi tak hong kikhawm uh a, hih Jesuh a um mite’ thugen pen amau’ pau ciatin za uh ahih manin lamdang a sa mahmah uh hi

Kamtuam pau in khat le khat kitukalh nading le kikhenthang nading hi lo in, Jesuh’ lim sutna le kilamna a khantoh semsem nading a,  hong kipia a manpha mahmah Pasian thupha ahi hi.

Nuntakpih pah ding thu

• Pasian’ hong kamciam Khasiangtho tawh kidimna (Baptism of Holy Spirit) na sang nai hiam?

“Note mihoihlo hinapi-in na tate uh tungah a hoih piakding theithei na hih uh leh, vantunga om na Pa un a ngente tungah Khasiangtho piazaw kan ding hilo ahi hiam?” a ci hi.” (Luke 11: 13)

• Na lungsim puakzia le na nuntakna Babel lungsim puakzia ahi kha hiam?

Kisikkikna tawh Pasian kiang zuan kik ni. Pasian hong deihsak lungsim puak i neih theihna dingin Khasiangtho in hong huh ding hi.

• Na kampaute in khat le khat kikhenna kitukalhna a piangsak kha hiam?

(Lai-at Siapa pen Yan Nyein Pawlpi le Ministry of Reconciliation a phuanpa le pawlpi kemsia hi. AG District Council 3 na, Section (1), Yangon ah zong Superintendent a sep laitak ahi hi. Hong nusia sa Sia Khaisuan’ naupa ahi hi.)

Etkak Laibute

1. Full life Bible Study
2. Brown’ Dictionary of Bible Characters by Dr. John Brown of Haddington
3. Have You Received the Holy Spirit Since You Believed? By Lloyd E. Singley
4. The Complete Pentecostal by Mark Wootton