Sia JK Kam pen a facebook ah a gen mah bangin la-at lasa in minthangin kithei zaw ahih hangin Zoom pan  Pasian thugen pen ama nasep hi. La zong phuakphuak lai -in saang zong kahkah lai hi. Tangval lai hi-in nungakte’n amat leh zi neihsawm, ci hi. Pilna sang, laphuak siam, lasa siam, Pasian a it ngiat Siapa in hih bang a email dotna bawl theina ding hun hong pia ahih manin Pasian in azah tampi in thupha hong piaksak semsem ta hen.

 

AD: Sia, nang le nang nong kimeihset dia.

JK: Khua lui Langzang, suahna le khankhiatna Pyidawtha. 2004 in Yangon University pan M.A (History). 1999 pan studio la khum kipan, 2005 in ITNA LEIBA single album bawl ing.

 

AD: Tu laitak nasep le na sangkahna hong gen ve.

JK: 2008 in Norway tung, Norway lai le pau ka siam theihna ding Norwegian pau tawh university kah, 2017 Bachelor in Pedagogy, 2020 in Bachelor in Leadership & Theology ngah, 2019 in Lillehammer Baptist Church (Norway pawlpi) ah pastor in hong kila.

 

AD: Na zoom ministry na kipatzia, na ngimna, le hong lutnuamte ading theih huaite hong gen ve.

JK:Covid-19 hangin biakinn ah kikhawm theilo, Zoom tawh hileh leitungbup pan kikhawm kihel ki-en thei, hih pen Pasian na tangzaitak a septheihna ding lampi hoih mahmah khat hi.

 

AD: Ei mi sungah Zoom ministry a sem pen kitam lo lak ah nang zong hih technology zanga Pasian na sepna ah hih a ngeina biakinn ah maitang kimu a sep tawh a kilamdangna, haksakna, a nopna cihte nong hawm sawn dia.

JK: Pawlpi khat danin a kiding hilo ahih manin vaihawmnate ah akpi in phiat tawm ne, a cih danin naseppih ding mi zot tawm den kul. A nopna ah bel –  lamsap bei lo a ei inn tek pan kikhop theih hi-in lem, kitheihpih ngeisa sang kitheih pih ngei nailoh hong join tam zaw in lawm thak kihau tuam ..

 

AD: Na piangthakna tawm teci hong pang o.

JK: Dr. Rev. Gin Khan Khual tungtawn in 1990 Pyidawtha crusade pan Jesuh Gumpa le Topa in sangin, bang hunhunin bang danin ka si zong vantung gam tung ding cih kician sinsen khamuang sinsen ing.

 

AD: Nidang sangin Pasian lam ah kipia zaw-in hong mu ing. Tua pen bang hang hi pipen ahia?

JK: 1) Pasian in Jesuh Khrih tungtawn a hong piak dinga hong kamciamte ei thu ummi mimal ading ahihna lunglut ..

2) Khasiangtho tungtawnin lungnopna, daihna, itna cihte ken ka nei hiam, cih ka kisit ciang a nei mello ka hihlam mu, (ahangin, kei tunga hong khialte a na zaw a, thuk nopna om, mawhmaisakna taktak nei mello)

3) Piangthak born agian hi napi ing, banghanga Khasiangtho ii hong piak dingte ken ngahlo? Koidan a ngah thei ding cih lunglut in Pasian neh ..

4) Pasian tawh hunla (taking time with God), Pasian tawh kimu (encountering with God, Pasian’ ompihna (The presence of God) cihte za ngei-in ciam kha taktak nailo, ciamkha nuam..

5) “Pasian in na khempeuh mu, ci napi hangin mite’ muhna bekah gamtat sia kidawmin, a simtham a i gamtat pen hong mu Pasian zahtak lohna hi,” cih kei le kei thu kihilh (discipline) in, “Mite’ mai a ka gamtat nopte bek kei bek ka om ciang zong gamta ding” cih discipline kipan..

6) Nidangin Laisiangtho pen sermon nop le vai om ciang bek kei deihna mun(verse) teng sim ziauziau in a ban tak a Piancilna (Genesis) to Mangmuhna (Revelaton) sim ngeilo, a banbanin pongmaan tak a Laisiangtho ka simna tungtawn in Pasian’ hilhcianna (revelation) a thakthak nisimin ngah ziahziah, ka gen ding hong phul ziahziah, tua in ka kha tha hong hatsak hong lawpsak semsem, 2015 pan tu (2022) dong nipi sim a tawmpen khat veita sermon tatsat lo, ka gen thu kithuap nailo ..

7) 2014 kum a kipan “No Bible No Breakfast, No Bible No Bed” (LST simlo in zingan nelo ding, LST sim loin lupna zuan lo ding) cih thukham kiguan, tu’n ka zongsat khat hong suak ta. A nungta Pasian kammal (Laisiangtho kammal)  in hong hopih thei, a kicih ke’n ciamkha ta .. Halelujah! Amen!

 

AD: Norway ah nang ai zong, Zomite’ nuntakzia tawm hong gen ve.

JK: Norway gam ah Zomi 200 val deuh bek om, Norway pau sin kul ahih manin khangham khinsate in pau siam zolo-in nasep hoih ngah ding baih lo, khangham sa lak pan zong sang a kah man a lai a siam man te’n nasep hoih zaw deuh, nasep neilote zong Nasep neilote huhna (Unemployment benefit) in nuntak khopna ding khop kicing (cover) veve, Pasian’ hehpihna tawh Norway om Zomite sungah nulepa ii thuhilh zawhloh a kisia a phengtat gawp cih omlo, khangnote sangkah a pilna zon hanciam kim thei mahmah ..

 

AD: US zong hong pai ngei cileng, no kiang tawh tehna-in US pen bangci sa na hia? Zomite’ dinmun e leh?

JK: A phualphual ah Zomi kilom om thei in vai khat peuhpeuh ah lem, driving license baih mahmahin mikim in mawtaw hawl thei (Norway ah sum tampi bei kul, driving test pass ding baih paklo, tan 10 laivuan mah tawh kibang ☺ ), US pen nasepna gam ahih mah bangin nasep kihanciam tekin sum nei kim, Pasian thu kilunggulh sa mahmah ing, tua manin khangno a kisia zong tam kei pah sa ing ..

 

AD: Hih Covid pulnatna sunga na omzia uh le covid khit nuntak a kilamdang zia tawm hong hawmsawn o.

JK: Covid hong tun tungin Pasian’ dantatna ding danin ka ngaihsut hi-in, Pasian’ zat pastor tampi hong sih mawk ciang, “Covid pen mawhna thaman Pasian’ daan nam hi het kei” ci ing. Sihna le nuntakna pen Pasian khutsungah om a, i nuntak sung cidamna ding pen ei mimal kikep siam ding zong kisam ahihna a thakin hong phawk sak. Kha gal, lungsim gal, pumpi taksa gal nam thum omin amau mun tekah i do zawh ding kisam ..

 

AD: Sia, nang tangval lai cileng, zi a neih sawm lai mah na hia? A sawm nawn lo na hia? Hong dawp kha tam, ci a, a kilamen nungakte ading a kician vet ding e.

JK: Val lai mah ing, aihang sawt vei val nawn in ki-um keng .. hehe ☺

 

AD: Na khempeuh Pasian’ khut sung hi mah leh, zi nei hak na kisa hia? Hun panpan na ci hia? Banghang tu dong na neih lohna thu pawlkhat…

JK: Kei upmawh tampi a om hang Pasian hong sehsak pen tawh kituak kha nailo ☺

 

AD: Kei theih ciang hileh, Kawlgam ah Master man, tu zong kah lai cileng, pilna lam na nakzon luat hanga zi/ lawmngaih hun ding om lo ahi zaw dia?

JK: Tua bel hi kei, vai lem taang khin lian theilo hi zaw .. ☺

 

AD: Khangthakte ading pilna zonga sangkah le innkuan vai koi cih khinkhai (balance) sak thei ding cih tawm hong hawmsawn ve.

JK: Pilna sang sin ding thupi, aizong i uk i siam i kivak khat sep khak ding zong thupi sa ing. Innkuan vai bel zineih kawm zong sang kikah thei veve lel in, kilungtuak ding thupi sa pen lel ing. Pilna pen higher education pan bek a kingah hilo, “A hun le a vai zui-in ngaihsut khinkhai tawm theihna pen pilna hi” a ci pawl hi ing ..

 

AD: Lasiam laphuak khat na hihna tawh tu lai khangthak Praise & Worship paizia na muhna tawm?

JK: Pasian nasem, Praise & Worship leader a siam cihte thupi a kisak hun hi-in, tua mun a om ding pen khangnote ki-ut tekin mu ing. Aizong popularity zonna-in a zang zong om leh kilawm. Pasian pen lungtang bek a en Pasian ahih mah bangin, a ukna a siamna le a kizat theihna uh Pasian tungah ki-ap pha-in, Pasian zat theih taktak ding dongin “Pasian adingin lungsim maan taktak ka nei mah hiam?” (Do I really have a right motive for God?) cih kidong denin kisit denden ding thupi sa ing (kei a kipan)…

 

AD: Hun khat lai i gam le Zomi sungah tu a la tomno i cihte tawh kha khanlawhna nakpi hong kipanin, tu’n a hih leh, hillsong stai praise & worship tawh a paizia khat hg kilaih to…tua kawmkal ah Sia Pum Kho Thang’ late, Lenla i cihte  in damdamin mun hong la toto ci leng….hih pen a kha paizia hi ding ahi..aih kei leh la makaite’ a kiluanmoe (influence) na lamlam ah a kipai hi ding ahi..na muhna tawm..

JK: Kha pai zia cih sangin Pasian in a mizatte pen a mihingte’ neih talent tawh a zang a hih cianga, tua talent in mite lawng (inspired) danin mu zaw ing. Modern muzik nam dang nei het kei lehang zong khuang le zam sialki tawh kiseidei thei veve dingin um ing. Muzik stai bel worship adingin vanzat (instrument) khat hi in, a taktak pen a mihing ii lungsim (motive) hi zaw ..cihdan in a mu pawl hi ing.

 

AD: Pasian biakna phatna ah Muzik stai tuamtuam kizang thei hi mah leh, pawl khatte (Metal, Punk..) pen a kilawm kei tam? Laisiangtho tawh ai zong, mimal muhna ai zong, pawl tuamtuam san’ dan hong hawnsawn ve.

JK: Muzik stai in identity (Ciaptehna) a nei ding danin ngaihsun keng. A mihingte ii tum ahih cianga, a mihingte ii motive & attitude tungah kinga khin dingin mu zaw ing .. Satanic la khempeuh Metal gawp dingin Gospel Spiritual la khempeuh Slow Go Go tawh pai hamtang ding, cihna zong om tuan sa keng. Classical muzik & Modern muzik in zong thu a khen tuanin mu keng .. bang ih sem a bang i gen zong i mihing lungsim le Pasian ii kizopna mah a thupi pen (main point) in mu ing ..muzik pen vanzat nam khatin mu zaw ing.

 

AD: Pasian la phuak khat in zawl la a phuak ding a kilawm mah hia? A hi thei mah ding ai tam? Gentehna: Sia Sangpi le nang cih dan…

JK:  Kilawm le kilawm lo cih bel midangte’ mit tawh i ki-etna hi-in, Pasian le ei i ki-et i kimuhna (dimension) mit tawh ki-et masak ding thupi pen sa ing. Kei bang zawlla ka sak ka phuak ding “kilawm a kisa lo” hi keng in, ka sung pan tua dan pusuak nawn lo. Khatvei ka la deih mahmah “I’ll Be There For You” Bon Jovi’ la a sa dinga ka kithawi kik a leh, nidang a ka sak lai danin feeling ngah nawnlo, “puan sia sathau tawh kang a nek tawh kibang” .. a limna om vetlo! Tua hizawin mu ing. Midangte’ muhna bel a nihna ah pai pan sa ing.

 

AD: Khangthak Zomite ading la lam tawh kisai na gen nop a om hia?

JK: La i phuak ciang la khat a cin theihna ding, cih hi kei henla, i sung pan a phul i gen khiatnop thu limci khat a phuang khia hi lehang, i lamal in mi lawng kha hamtang. Muzik le meludi aw lam zong international level a la minthangte tampipi ngai ding in “ke’n a tum a sa hileng koi dan in ka sa tam?” Hih la a hoih sak a point pen bang hiding a le?” (what makes this song beautiful) cih kan kawmin la ngai lehang, i la ngaihna tung pan ei le ei in pilna thusim tampi kingah thei. Kihop kihilh nam hilo a, ei le ei self study tawh own muzik level khangto sak penpen sa ing. Lasa laphuak sawm khempeuh in solfa le muzik instrument nam khat hamtang siam sawm lehang hoih sa ing. Adiakin guitar or piano… Ahang in la dawng khat tawh a minthang pak kha phial zong a dawn dong a tun dingin tua muzik siamnate in tawsawn bek ding ..skills produce good products.

 

AD: US om Zomi khangno  ading biakna lam ah na hanthawnnop a om leh?

JK: «Pasian hehpihna hang bek tawh kei gam nuam ah a om kha hi ing. I gam ah om lai hi leng, bang ka suak tam?» cih ei le ei kidot zelzel ding thupi sa ing. Tua hileh ei hangin Pasian’ hoihna kimu zaw semsem ding, innkuan nulepa sanggam, pawlpi, le gamle minam in hong angtang zo ding. Biakinn a kikhop ding pen ut le pai ut kei leh pailo (option) danin koih loin, thu ummi Khristian Khangno khat ii a seploh a phamawh (compulsory) in kituat thei leh, i omna na pan i kimlepam mite adingin missionary a kisem thei lua hi. Gam lian gam thahat pen ah om i hih manin chance a tampen na mun hi-in, Pasian itin zahtak tinten lehang, Pasian in hong muan tantan i khut sungah vai lianpi hong ap ding hi. Amen!

 

AD: Tua lo kong dot khakloh uh gennop dang a om leh?

JK: Hih ministry ah interview a kei thu le kei gente ki publish dingin mi tampi in sim kha ding cih ka ngaihsut ciang, Pasian ading platform khat pan ma a pang kha thei suak ing. Hong phawk kha vaihawm nasem makaite tung le Pasian tungah ka lungdam. Pasian’ maipha ngah kisa mahmah ing. Hih lai a sim khate Khasiangtho in lawngin Pasian a thakin a muhna ahih ding ka lunggulhna lian pen hi. Ka lungdam.