Tutung pen Laisiangtho nipi ahih mah bangin Kha thuthuk tawh kisai dot dingin Tedim a Bethel Bible College saang siapilui Dr. Thuam Khan Thang ka na teel uh hi. Amah pen Tulsa a Oral Robert University ah 1995-1997 kikal kahin Doctor of Ministry ngah hi. Thangnuai khuami hi-in, tu laitakin Tedim ah a zi a tate tawh teeng hi. AG District Council No.7 ah  Superintendent zong a sep laitak ahi hi. Hih banga hun hong pia Siapa tungah Agape Digest min tawh lungdamna thu i pulak hi.

AD = Agape Digest, Dr. T = Dr. Thuam

AD: A tamzaw in hong kithei khin ahih ciang, kimeihsetna nei nawn kei ni in, Tulsa ah na saangkah lai na tuahthute (experiences) pawl khat khangthakte theih dingin hong gen dih o, sia.

Dr. T : Subject khat ah laibu simding bu 4- 8 ciang hong piaden uh a, baih kasa het kei hi.  Laibawl dan lungkham a khitui luanhun tawm lo hi. Laisim le laikhet thuahin zanhak hun tam hi. Khat veivei lusuk kalin kompeuta kisukha a, laikhetsa teng beimang zeel hi. Zonkikdan kithei lo ahih manin, khetsa teng ka khen kikzeel hi. Tuabang hun tawm lo hi.

Kum li val sin ding kum nih a suah ka hi hi. Digri (degree) lak nang a kisam Applied Research Project ka gelh, Chapter 1-4 ka man ciangin Dean pa ka lak a, hoih hi, a omlaiteng zom in, hong ci hi. Dean hong kilaihin a thakpa ka lak leuleu ciangin hoih kei, a vekin gelh pha in, hong ci kik hi. Ka heh lah suak, ka thangpaai mahmahin, Dr digri kangah loh hangin Pasian na sem thei mawh keng, ciah lel ning, ci-in ka ngaihsun hi. Kal nih sung lai bawl non vet lo-in, TV en zeel, nasem kuan zeelin ka om hi. Dr. Do Kham in ‘hanciam in mitampi Dr. ngah lohna tua mun hi’  hong ci hi. Nitak khat ka lup thungetna pan, “Haksatna na tuah ciangin na lung a kiat leh a gina lo na hi hi” cih ka phawk hi. Hanciam kik ning, ka ci a, Topa in hong zawhpih hi.

Oral defence (Maitang kimu thudotna) ka bawl ciangin, kei mai ah US gammite nih lut masa-in  khitui luangsa-in hong pusuak uh hi. Lau-in ka dip kua mahmah hi. Thungen kawmin ka lut hi. Siate 4 na tu temtam hi. Ka laibawl teng hong dongdong uh a, nai khat bang khit ciangin ka laigelhna tawh kizomin, Kawlgam khanlawhna thu ka gen kha hi. Ka siate hong lunglut mahmah bilbel uh hi. Gospel painate, na lamdang piangte, khanlawhna piangte ka gen ciangin thudang hong dong nonlo-in, zaknopsa-in thangah uh a, hong ongsak hi.

Ka saangman ciangin ka siapipa in, ‘Na sangkahna vai na gen nop a om hiam,’ hong ci hi. ‘Ka hun in hong pia hileh, kumkhatna pan kipan kik nuam ing,’ ka ci hi. ‘Tua bang a cithei tam lo hi,’ hong ci hi.

1. Azusa Street khanlawhna tangthu le Pentekostel upna bulpite tawm nong gen thei dia? A dangte tawh a kilamdang zia ai zong?

Dr. T :  Pawlpi tangthu ah kum zalom (century) simin khanlawhna piang den hi. 1700-1900 kal sungin Khanlawhna nasiatakin piang zeel hi. Methodist pawlpi piangkhia hi. 1900 kuan ciangin pawlpite ihmu-in, khanlawhna kisam hi. Pasian nasem Charles Parham in Pasian nasemte in, kumpi nasep bangin sem bek a, khanlawh na kisam hi, cih mu ahih manin, Laisiangtho saang phuan-in , Pasian nasemte bek kahsak hi. Laisiangtho bu bek sim uh a, thungenin, ki-apna thupisak uh hi. 1900 kum bei Nizanin antang thunget nei uh hi. 1901 January 1 ni zingsangin Khasiangtho nasepna kipan hi. Khasiangtho sung kiphumna ngah uh a, cina damin, lim le na lamdang piang hi.

Mivom pastor W.J.Seymour in tua thu a zak ciangin, tua saangah va kikhawm hi. Parham’ thugente maan sa mahmahin, tha ngah mahmah hi. Gospel zin kawikawi-in hih khanlawhna thu tangko kawikawi hi. Khanlawhna piang kawikawi a, a sang theilo zong om kawikawi hi.

312 Azusa Street a, Methodist biakinn lui khat sap uh a, nisimin 10:00am pan kipan in 12:00 pm  ciangin kikhop zo uh hi. Kum thum sung khanlawh kizom hi. Khasiangtho nasepna kizom den a, lim le na lamdangte piang den hi. Gamsung, gamdangte pan a theinuam, kihel nuam, mawhna zong nuam mite pai den uh hi. Khanlawhna kizom-in kilawh kawikawi a, gamsung le gampua ah kizom hi. 1914 kum ciangin khanlawhna mei tawh kizomin Assembly of God pawlpi piang hi.

Pentekostel Upna bulpite:

• Pentekostel pawlpi in Protestant upna tawh kalsuan, Evangelical Upna bang a um, Pentetstal kalsuan zia tawh kalsuan pawlpi ahi hi.
• Protestant pawlpi dangte kilamdanna lianpen in Khasiangtho in Sawltak hun mah bangin tuhunin zong na sem lai hi, cih thu hi pen hi.
• Pianthakna ah Pasian neihsa i hihna Khasiangtho tawh hong ciamtehin (Seal), i nuntakna ah Khasiangtho in na hong sep ciangin kamtuam pauna tawh kilangkhia masa pen (Initial Evidence) hi cih ki-um hi. “Masa pen” cih ciangin, a dang zong om lai hi, cihna hi.
• Khasiangtho in Nasem ahih manin, khanlawhna piangsak a, lim le na lamdangte tawh Pasian min thangsak hi.
• Khasiangtho nasepnate pen Misiangtho lak hun ciangin kila kik ding hi.

1. Pawl khat in khasiangtho’ nasepnate ahih kei leh letsongte pen Sawltakte’ hun khit ciang a bei hi, ci cileng, Laisiangtho ah bang ci gen ahia?

Dr. T : Topa Jesu in A  ma om loh hun sungteng, thu umte, lamkal ding, makaih ding in hong piak dingin hong kamciam hi. A omloh hun icih in, Vankah leh hong paikik ding hun kaal ahi hi. Khasiangtho nasepnate, Topa Jesu kamciamna Pentecost ni in kipan a, hong paikik hun (Rapture) ciangin kila kik ding hi.

AD : Pentekos ni a kamtuampau (other tongue) le khasiangtho’ letsong sung a kamtuampau (Unknown tongue) a kilamdangna hong gencian ve.

Dr. T : Pentekos Other Tongue pen leitung pau nam tuamtuamte hi a, mipite in amau pianpih pau ciatin za uh hi (Sawl.2:8). Unknown tongue pen  Khasiangtho in i nget theih lohte Pasian tungah hong ngetsakna hi a, kua mahin thei lo ci hi. Khasiangtho tawh thungetna ahi hi (Rom.8:26).

AD: Kamtuampau pen khat vei ngah khin leng, ut hunhun a a kipau thei ahia? Ahih kei leh, khasiangtho hong pausak kik ding ngak/ nget kik ding ahia?

Dr. T : Kamtuampau pen i sung pan Khasiangtho pau ahi hi. Lungsim tak tawh Pasian hopih a, thu i nget ciangin Khasiangtho pau khia ahi hi (Rom.8:26).  Kamtuampau in paupak ni, Kamtuam choir sa ni cihte pawl pen upmawh upna ahi hi.

AD :  I piangthak ciang Pasian in ama Khasiangtho tawh seal hong tum cileng, khasiangtho pen mei bang ahi zong, tui bang guah bang ahi zong, hong kuang hong buaksuk ding nget a kul mah ahia? Ahih kei leh, i sunga omkhin cileng ama vangliatna zat ding hi zaw ahia?

Dr. T : Ih pianthak ciangin Pasian neihsa i hihna Khasiangtho tawh hong ciamteh (Sealed) hi (2Kor.1:22; Ef.1:13; 4:30). Khasiangtho pen I nisim nuntak nang hi a, dahthei, kiam thei, kinial thei, Khangthei,  mitthei ahih manin, thu-umte’ lunggulh na zui-in nasem ahi hi.

AD: Khasiangtho tawh a kidimna ding Peter le John in khut nga-in thungetsak ci cileng, khasiangtho tawh seal tupna khit ciang kha tawh kidimna ding ahih kei leh kibaptizna ding cih khasung ah level khat a om lai a kici thei dia? (Sawltak 8:15-17, 19:2)

Dr. T : Pianthakna, Khasiangtho tawh ciaptehna hi a, Khasiangtho toh kidimna/sung kiphumna  om lai cih Sawltak sungah livei hong hilh hi Kamtuampauna pen Khasiangtho naep kipatna masa pen (Initial evidence) ahi hi (Sawl. 2:8; 8:14-17; 9:1-17; 10:44-46; 19:6). Level dang hi lo-in, a kizom ahi hi.

AD: Kha tawh kidimna pen kiam thei khang thei cih ahi dia..Tua hi leh, a kiam lohna ding le a khang semsem na ding koi cih ding?

Dr. T : Khasiangtho nasepna pen khangthei, kiamthei, hat thei, tha nem thei, mit thei ahih manin, thu umte nisim nuntakna ah thumanna, ki-apna, khe khap zuihna cihte khiam lo a, neih den ding thupi hi.

1. Tu lai Zomi Khristiante sungah Kha nasepna a paizia na muh dan e leh?

Dr. T : Tulai ei mite lakah kha nasepna pen a tamzaw upmawh  sep ahi hi. Pasian kammal in kha khempuh umkei un, ci ahih manin, ei up ding pen Khasiangtho nasepna bek hi a, kha kici khempeuh hi lo hi.

1. Pilna laitan nei pian tata in kha nasepnate sang nuam pha lo-in kha letsongte zong pasal sangin numei le lai tannei lote in ngah zaw leh kilawm sa ing. Tua pen bang hang ai tam?

Dr. T : Tulai Laisiangtho digri neite, kha sang lo kici hi. Upmawh khate kisang lo mah a, Khasiangtho bek kisang hi. Numeite pen um baih, sang baih thei uh ahih manin, Khasiangtho nasepnate a kihilh ding kisam hi. Kihilh peuhleh sang theipah ding uh hi.

1. Khasiangtho tung amawhte kimai sak lo ding a cih pen bang lian ai tam? (Mark 3;29, Luke 10:12, Matthew 12:32)

Dr. T : Topa Jesuh hongpai na in a umte gumkhia ding ahi hi (Jn.3:16). Vah a kah ding ciangin tua nasep sem dingin Khasiangtho hong sawl ahi hi. Khasiangtho gensiatna in Jesuh gupna sang lohna ahi hi. Gupna sang lote mawhna a mai thei lo ding ahi hi (Hell).

1. A tawpna ah Kawlgam khanlawhna dingin US om Zomite in koi ci-in mapang leh hoih na sa hia?

Dr. T : Pasian maipha zonna, thu ngetnate in i gam khawmlawh nangin kisam pen hi, cih ka um hi.