Leitung ah a lamdang pen le leitung a kikhelsak  laibu pen Pasian’ kammal “Laisiangtho” ahi hi. Laisiangtho pen Laidal tungah a kigelh ahih hangin a sungah a kigelh thu nungta a, Laimal khat ciat in Pasian  lamlah, humop (inpiration) kammal ahihna I san theih ding le Lai Siangtho sunga Pasian kammal  sutvom khat zong mangthang ngeilo ding ahih lam  i theih ding kisam mahmah hi.

Laisiangtho pen leitung ah pau namkim tawh akilet (or) tei khia,  a kithohkhia tam pen le langdona, susiatna  a thuak pen Laibu hi cileng kikhial lo ding hi. Minam kim paunam kim in lai (literature) in zong zang hi. Laisiangtho in minam pau le lai zong hong puah hong zuun phatsak hi.1984 kumin Lai Siangtho Bu a tei (khet or thoh) sa khempeuh lei maitang pan ciangto hi leh leitung aa mual sang pen Mount Everest sangin sang zaw ding hi ci-in misiam te’n gen uh hi.

Laisiangtho bu sunga om Pasian thute pen apiangsa thute, tuhun ah i tuahkhak thute le hong piang lai ding Pasian hong lamlah thute ahih manin Laisiangtho pen i simsim ding, I sinsin (study) ding thupi mahmah hi. Laisiangtho  I sim/sin (study) ciangin ei deihna munteng  le  I sangdan tawh kituak munteng   bek sim ding, sin ding (study) hi lo hi. Pasian’ deihna bulpi bang hiam, Laisiangtho  in bang gennuam hiam  cih theihsawm  in thumaan thutak i muhkhiat ding hizaw hi.

Tuhun  thu-um mite sungah Pasian thu pen ei sandan bekin  kideihkiah thei hi. Pasian thu pen a kilekkim(balance) in I santheih kei leh, paikhialh theihna ding tam mahmah hi. Gentehna in Henpihna hangin Hotkhiatna thu  nasia takin kigen hi napi in  thu-um mite zuih ding bang hiam cihte kigen lo, bektham loin Pasian’ Deihna kikantel nawnlo zel hi.Thu-um mite nuntakna sungah upna le sepkhiatna pen thu khat a luangkhawm ding ahi hi. I kha ading in Gupkhiatna  pen a khawnkhongin hong kipia upna tawh  i ngah hi-a, mihingte’n na hoih i  sepna hang hi hetlo hi, cih pen i theihsa hi.

Tuamah bangin Thuciamthak bek bulphuh in nei in Thuciamlui a om Pasian thute kinawlkhin thei mawk hi. Thu-um mi pawlkhat in  Laisiangtho sunga kigelh kammalte bulphuh hi sam napi in Laisaingtho  mun dangte ah bangci kigelh hiam cih kan nawnloin kithupisim lo kha theizel hi.  Hoih i sakna le i deihnate  deihkaih in Laisiangtho taang dangte ah bangdan in gen hiam, cih ngaihsun loin ki-om kha thei hi. I sandan le i bulphuh Laisiangtho kammalte, Laisiangtho  mun dangte ah kibangci gelh hiam cih zong  i ngaihsut theih ding  kisam hi. Tuabang hileh, kuamah kipaikhial lo ding hi.

I tenna leitung ahih leh nisim naisim in kikhelkhel  himah leh, a kikhel ngei lo Jesuh pen bangci mutheih dinga,  a thu bang danin gen ding i hi hiam cih a thupi pen ahi hi. Pasian thu tawh kituakin i kalsuan theih nadingin Laisiangtho pen ahi  na bangbangin sang siamin a nuntak pih takpi kimciat dingin laisim mimal kim Topa in thupha hong piata hen, Amen.

Endik Pawl