Khristian innkuan sung khat panin a khangkhia ka hi hi. Neutung a kipan Sunday School, BYG (Baptist Young Group- Friday) nitak kikhop le Nipi kikhopte lawp takin a pai den khat ka hi hi. Ka khangno hun gualnopna tungtawnin zulesa tawh mimal nopsak nading bekbek ka zong, ka kidiah hi. Kum tampi sung zulesa tawh ka om khitteh, Zu dawn Pa hi nawn loin, Zu in kei hong dawn kik hi. Sun le zan ci lo, mi lak sa lak zong ut nawn loin, kei guakin Zu in hong lehdawn taktak ciangin, kei mimal mahmah deihtak ngaihsunin, kei ma hanciamna tawh zu le sa Ngolh/ Zat nawnlo/ Zang nawnlo ding ka hanciam hi. Ahih hangin ni khat, kal khat, kha khat sung bebek zong ka om zo kei hi.

Ni khat ngaihsunin zulesa dawndawnin si mawkleng, ka Kha koi lai ah pai mawk ding a hiam, cih ka lungngai kha hi. 2021 August kha in Sia Nangno hopihin, “Sia aw ong kimu nuam ing,” cih ka gen leh, hong pai vo, hong ci pah hi. Nino ni khat, kaa zi tawh Jenks a, a inn vuah ka pai pah uh hi. Inn sung ka lut pah uh leh, Siamah Lam in ka minpi hong lo gega-in, ka nu le ka pa tawh a kinaktheih lam uh hong gen hi. Kiho-in, ka ka lunggulh thu ahi ka kha le ka pumpi mahmah a piangthak nading lunggulh luatna uh ka gen uh hi. Na Camp ah hong omsak ung, ka cih leh nang ma lunggulhna a thupi hi, hong ci hi. Tua leh, nai bangzah om kul ding hiam, ka cih leh, Kal-2 pan 4 bang hi leh hoih mahmah ni teh, ci-in hong dawng hi. Kei zong, Part time danin a kingah diam, ci-in ka dek leuleu leh, na nasep khawl inla Topa hoihna zong masa photphot ni. I kha le pumpi pen sum le paai sang thupi zaw hi, hong ci na pi-in tel thei loin, Vacation Kal-4 lak ding lem lo, i kha le umpi pen nasep sangin a thupit zawk lam thei nai lo ka hih manin Siapa cih pen ka mang zo kei hi.

Ahi zongin, parttime danin ka nasep ka kuan loh niteng om ding ka kigen uh hi. Nino ni le Nipi ni tawm vei sung ka pai zel hi. Nasep silbawl tawh om suak thei loin, inn ciah kikin, nasep maban ka zom hi. A zu a sa khawl tuan loin kha 7 bang hong phak kik ciangin ka pumpi in thuak lah mahmah ta hi. Kha ading tatak kha muanna ka neih loh lam ka kitel tektek hi. Tua teng tawh Topa Pasian in ka Kha beek hong sang zo ding hiam, cih ka ngaih sutsut teh, Ka nasep silbawl teng nusia in New Life Rehab Camp ah om ding ka khensat hi.

Ka khentat na ah “ Nasep mun 2 mun 3 semin sum tampi ka neih hangin, ka kha in Gupna ngah loin si leng, koi ah pai ding” cih tawh Pasian Maipha zongin, ka leitung vai khempeuh nusia-in ka Kha ading le ka pumpi ading lunggulhna takpi tawh Topa zongin Ni-100 sung om ding ka khensat hi.  Kum-11 sung ka nasepna kompani pan kei le kei khawlin suaikai (Sign thuh) in, New Life Camp ah haksatna tampi kawmkal pan ka lut hi.

Hi bang teng tawh camp omin,  a ngeina danin zingsang ki-apna (Morning Devotion), LST mun lotngah dingin Late 91 sim zel, sun thusinna le nitak kikhop teng ah ka kihel den hi. May kha 12, zan ka mangin Thai gam a ka thong kiat a ka thuaknate, kum -5 ka phak a na ka sak mahmah thute khawng ka mangmat kik hi.

A zingsang ciang, a ngeina dan mahin, Late 91 mun sim, Morning Devotion bawl, kiallap ne, zingsang hun Sia Lalpu in hong zang hi. A hun tawpna dingin Siapa in “na mitsi pak vo, limtak ngaih sun un. Tu lian laitak a si hileng, van gam ka ngah diam, a ngah ngap teng in na khut uh ong lam vo,” hong cih ciangin a tung lian ding a ci mi-10 le a kingap peuhmah lo -2 ka pha uh hi. Aman zong Gupkhiatna thu deihtak hong genpih pah hi.

Siapa’ thugen laitak mahin Pasian’ itna tel semsemin, ka dipngek na lua-in, ka khitui luang ding hong kithawi hi. Topa hong itna tel lua ta, Jesuh’ sisan in hong tatkhiat lam tel lua mahmah ta ka hih manin, kap loh theih loh, ki-ip zo nawn loin, ka tha hong zaw vatin ka kap khiat hi. Mi mai ah kap ding ci thadah, zannitak a ka mang a ka mat kik bangin, ka sanggampa hong nusiat a zong kap peuhmah loin ka khitui bek a luan hi. Thai gamah palikte’ mat le hen thuakin ka bil taklam in khua za nawnlo zah dong dingin vuak le saat ka thuak hangin  kap peuhmah loin ka khitui bek a taak hi. Tu-in ahih leh, Pasian’ itna in suang banga sak, lungtangte zong sat nemin khitui naptui tawh Ama kiang hong sam kik hi. Tua leh, Siapa’ omna lam pai-in, “Sia aw thu ong ngetsak un, lungdam lua ing,” ci-in, Kum-40 val sung ka khitui a taam pak lo pa pen, khitui hong taak ziahziah mawk hi.

Tua khit ah sun an nek khit ciangin Sia Nangno in kei le ka lawmpa, ko tegel bek genpihna (counseling)  a tuamin hong neih pih hi. Siapa in hong kuppih zel, Laisiangtho sim khawm zelin

May 13, 2022 nitak nai-4:30 PM in Topa Jesuh pen Honpa le Gumpa in ka sang hi. Tua hun tua ni a kipan Vantung Tuuno laibupi sungah ka min a kigelhkhit lam siangtakin thei-in, tu mahmahin si leng Vantung Pa Pasian kiang ka tung ding lam thei-in ka lung muang mahmah hi.

Tutung New Life Camp ka lutin anteh na ciing uh hi. A ekleicite ka et teh Kanza teh eklei ahih lam ka thei hi. Ka lungsim ah ka phawk vat khat ah, hih eklei aw Kanza ci na hi a, tua eklei mah ah a khaici dang a kivawh teh anteh theipuan limci takin a kiciing theih lam ka phawk san hi. Kei zong May 13 nitak nai-4:30 PM ma in Kanza ciingna lei ka hi zen a maw… Tua ni khit a kipan ka pumpi tung ah anteh ci hoih limtak kisuanin limtak a ki-et nak leh, hih tak a anteh limcite bangin, mite’ etteh taak ka suah nading ka hanciam ding hi. Pawlpi makai Siapa le sia khempeuh, upa khempeuh, pawlpi mi khempeuh, makaina tawh New Life Camp na huhna hang un, Kei Kam Sian Mung in Nuntak Tawntungna ka ngah hi. Leitung buppi sang kha khat a it zaw Topa’ deihna bang a sem a bawl tatak Sia Nangnote Innkuan, Far East Pawlpi le laisim mi khempeuh tungah lungdamna kong ko hi.

Pa Kam Sian Mung

(Pa Kam Sian Mung pen Tulsa ah a zi a ta tawh teng hi.)