Rev. Dr. Kam Khaw Thang, B.Th, D.D., (The first Tedim Bible translator)

Rev. Kam Khaw Thang pen Tuithang khua mi Pu Sim Tung Nung le Pi Ciin Za Dim te sung pan October 17, 1927 ni-in Tedim gamhuam Tuithang khua ah suak hi. Tua hun lai-in Tuithang khua ah sang om nailo ahih manin Tonzang ah 1937-1941 dong sangkah hi. 1946 kumin tan (6) zo a, 1947 ciangin tan (7) kah ding kimlai a pa le Rev. Vial Nang i deihsakna tawh sangkah khawlin, Laisiangtho sang Rev.F.O Nel Son tonu’ sangah 1947-1950 sung kah hi.

1952 kum ciangin Tedim pan Kam Khaw Thang, Hakha pan Lun Cung Nung, le Falam pan Lal Hnin te kiteelin, Insein ah Special Course kah ding acih pen Special course hilo-in Regular course kahsakin a lawm dangte in sangkah zom zolo-in khawl uh a, Kam Khaw Thang bekin sangkah zom suakin, 1956 kumin a tuam vilvelin B.Th degree kipia hi. (Tan 10 ongte bek Bachelor a kipia hi mah leh, amah pen tan 6 bek ahih hangin a lai zo ahih manin special a, a kipia, ci hi.)

March 19, 1957 ciangin Tedim Baptist Association (TBA)  Thuvanpi (General Secretary) semin, kum (2) sung a sep sungin Tedim Labu nih vei hong puah hi. 1960 kum ciangin Myanmar Bible Society te’ sehna tawh kizui-in Zolai Laisiangtho tei hong kipan a, Late, Isaiah, Piancil cih bangin hong sem toto hi. 1960 kiim pan kipanin Thuciam lui (OT) pen 1976 kum in zo a, Thuciam thak (NT) pen 1983 kumin zo leuleu hi.

A nu le pate pen thu-ummi ahih manin Tapidaw innkuan pan khangkhia hi a, Tonzang ah sangkah in a om sung Dec.15,1939 kum in Rev. Vial Nang in Tonzang gam Kongpi lui ah tuiphum hi. Frebuary 17,1959 kum TBA kumcin kikhoppi a (12) veina Phaiza khua panin Siampi za (Ordination) kipia hi. Pasian nasep leh lai lam nasep thuah in nasem toto a, 1980 kum ciangin Zomi Christian Literature Society (ZCLS) hong piangkhia-in tua laiah 1984 pan lai nasep semto suak leuleu hi.

Sangmangte’ nungzui-in Tedim kiim tengah Gospel pai kawikawi a, mangkam le manglai siam ahih manin Sangmangte’ kampau phen sak hi. Laibu zong nam (5) bang thoh khin ta hi. Zogam bek hi lo khamtung gambuppi Tuiphum Pawlpite’ thudotpi muanhuai khat hong suak hi.

1999 kum ciangin ama nasepna le service tungtawnin thupi le minam pawlpi ading a kipiakkhiatna le asepnate pahtawina in Yangon Evangical Bible Seminar (EBS) sangte in Doctor of Divinity (D.D) degree pia uh hi. Tuni ciang Zomi Pasian nasem Siate sungah akum tam pen khat hi-in Pasian nasepnate zong ahih theih zahin mapang lai hi. Yangon (TBC-Y) pawlpi ah memba in om a, kum 2010 in a zi Siamah Niang Khan Ciin in nusia hi.  Siapa inzong Yangon khuapi a a inn pan 30-March-2017 hong nusia hi.

A nuntak sungin Pasian in thupha tampi a piak lakah tapa 6 le tanu 2 nei hi. Pasian nasep sungin mimal (1235) tuiphum a, Nupa kop (letthat) kop (41) kitengsak hi.

Sia Thawngno’ ciapteh Sia Kam Khua Thang’ kammal pawl khat

1. I mawhnate im lo ding, mi tawh thu i neih leh maizum seelna peuhin pang tentan loin thumbawl zaw ding. I mawhnate im loin pulak zaw ding.
2. I zawh ngap lote langbawl se loin om hihiat ding.
3. Sum le paai, annek tuidawnte ah thang gamtat lo ding.
4. Kineihkhem se lo ding, a zawng ihih leh i zawnna im lo ding, a hai ihih leh i haina im lo ding. A zawngpi kihausak, a haipi kipilsak, cih bangte hoih lo hi.
5. Mi gensia se lo ding, midang khat peuh thu i gen leh zong tua i gente pen i gen mite zakin i gen ngam ding bek gen ding.
6. I siam lohnate ah a siam kineih se lo ding.
7. Kamciamna khat peuh i neih leh, tangtungsak ding, i tangtungsak zawh loh dingte kamciamna nei vetlo ding.
8. Mi simmawhin neu ngaihsut se lo ding. Tu hun a a neute ni dang ciangin a lian suak thei a, tu hun a a liante ni dang teh a neu suak thei zel hi. I simmawh bawlte i mai-et hun hong tung ciangin zumhuai mahmah hi.
9. Innkuan sumzekna ah ngeina kip nei ding, sumpi, sumkhol, zattawm ding a nam tuamtuam ciatin sehkhenin, ama sansanah a valin zat loh ding.
10. Leiba nei dingin sum zang lo ding, i ngahna tawh kituakin zang bek ding.
11. I tungsiah langpang huai lo hi. I paunakah “Lamsak le pute kizo ngei lo” na ci hi. I tungsiahte langpan lehang, eima gimna hi lel hi.
12. Zuau gen se lo ding. Ahi bangbangin gen den ding. Mi khat kiangah thu khat gen, a dang khat kiang ah a tuampi khatin gen zel cihte pawl hoih lo hi. Lungsim nam nih nei se lo ding, cihna hi.
13. Hun-awng omsak loin manlah den ding, na tampi septheih ding hanciam ding, a awng khong luate siatna tawh kizom thei hi.
14. I hat laitak, i liat laitak, vang i neih laitakin midangte’ na sak dingin gamta in nasem lo ding, a thuakte in a khantawnin mangngilh lo ding.
15. Thulian khensat ding a om leh, khensat pah loin, “Hong kikum phot nung,” ci-in a hun sotin limtakin ngaihsun ding.
16. Midangte’ ngaihsutna zui-in nasemin gamta lo ding, ei mahmahin maan i sak bang bekin nasem ding. Midangte’ ngaisutna zui-in i gamtat ciangin thu haksa khat hong om leh i siansakna ding siamna nei lo ihih manin zumhuai hi.
17. Ei le ei kiphat tawm se lo ding, midangte phat dingin i om leh lungdam huai hi. Ei le ei kiphatna pen zumhuai mahmah hi.
18. Khangno lai a siamna le theihnate kip ahi manin khangno lai-in pilna le siamna tampi i sin ding kisam hi. Khangham khit a sinte kimangngilh kik pahpah hi. Hih pen khangnote i a hun lai-in a pawk ding thupi hi.

Sources :

• Tedim gam (TBA) Siate’ Kipawlna Laibu (2004)
• Zogam Tuiphum Pawlpi tangthu (1999), Kam Khaw Thang gelh.
• Khamtung gam sangmang masa pen Dr.Carson tangthu bu (2003), Kam Thaw Thang gelh.
• Job Thawngno’ gelh, “Tedim Laisiangtho hong bawlsak Rev. Dir. Kam Khaw Thang’ pianzia le sepzia” cih laibu
• “Dr. Kam Khaw Thang tawh holimna” Youtube video 2013. https://www.youtube.com/watch?v=llfR0tbVRl0&list=PLqKOmFBxrpwl1lvGrpKnxaq97tkirvIAl