Dimbawi tawh Dotna Dawnna

Tuteng pen lungsim le ngaihsutna cidamna lam tawh kisai-in ZIUSA khutnuai a Mental Health Project pan ZAC pawlpi mi ahi Lia Dimbawi tawh mipi theih ding kilawmte email pan dotna dawnna na bawl thei ung. Hih banga hun hong pia ama tungah Pasian in a gim a tawlnate hong thuksak ta he.

AD = Agape Digest, DB = Dimbawi

 

AD: Halo, Dimbawi, hih banga hun nong piak Agape Digest tangin lungdam hong ko masa ing. Nang le nang tawm nong kigen dia? Tu laitak na nasep, na sang kahna, le mailam na gelna cite, tua lo gennop dang a om leh zong?

Answer : Halo, kei ka Dimbawi hi-in kum 21 hing. Tulai tak full-time in nasemin, Cosmetology (Kizap Kipuahna lam) school (Saang/ sikul) ka sin laitak hi.

 

AD: Facebook pan Anxiety tawh kisai na video uh na mu kha ing. Thupi sa mahmah ing. Tua thu i gen ma-in Youth Development Research- Mental Health Project tawh kisai tawm nong gen thei dia? Ngimna ai zong,sepsa le sepsawmlaite cihdan..

DB: Lungdam ei! Hih mental health project pen Youth Development nuai a om research team khat hi. Ka ngimna uh ahileh lungsim lam tawh kisai awareness ka piak nopna bulpi hi. Ka vision bulpi uh pen Zomite’ lungsim cidamna lam ah i dinmun theihcian nopna  le lungsim damlohna tawh kisai kihuh theih nading lampi zonsak theih na’ng uh hi pipen hi. Tu laitak break ka lak laitak uh hi-in, mailam ah bel sepnop tampi om lai hi.

 

AD: Na survey result pan na muhkhiat uh, a tuampian thute (Special cases) nong gen dia? US gam bup survey/ research dangte tawh tehkakna-in eimite’ dinmun bangci na ngaihsut uh a? Gent; US gammi 8.4% bangin major depression thuak kha ngei ci (2020 National Survey on Drug Use and Health) cileng, eimite tawh tehkakna in ei bang ci zaw.. Tua pen bang hang ai tam?

DB: Special case ka muh khiat uh pen lungkhamna hi’n teh. Ka research tungtawn un US gammi le eimite tehkak thei nai lo, ahang in hih ka research vuah eimi khempeuh pa lo banah, a dawng sunsunte hileh, kum 16-21 kikalte in tam dawng pen ahih manin ki-etkak thei taktak lo hi.  Survey hong dawng sunsunte lak pan Stress, Anxiety le depression pen a tampen hi. Mi namdangte tawh tehkak ding hileng, US khawng bang Individualism thupi a sak mah bangun a causes (a hang) te pen ei a te tawh hong kilamdang pian pah hi. Gentehna, ei misung ah i buaipih pen innkuan sung thu cihdante hi a, amau a te pen tua hi masa pen den khol lo hi. Tua ban ah eimite pen refugee (Gambeel) tawh a tung cih dan le gamthak/mumthak ah a kipan vive i hihna hangin ei i thuakna zong amau a tawh kibang lo pah hi.

 

AD: Mipite’ tel dingin Anxiety nong tawh kisai a kicingin nong gen thei dia?

DB: Anxiety acih pen lunghimawh luatna le patauh luatna hi.

 

1. Hih mun ah mite’ bang cih muh, cih pautau denna zong hih anxiety ngahte’ omzia khat ah kihel cileng, eile-ei kizahtakna (self-respect), eile-ei kipisan’na (self-esteem), eile-ei manphakisakna (self-value) ai zong, eile-ei kimuanna (self-confidence) cite a neih ding kisam kha ding ai ve maw. Hihte tawh kisai tawm nong kup beh dia?

DB: Eile-ei kizahtakna (self-respect), eile-ei kipisan’na (self-esteem), eile-ei manphakisakna (self-value) leh, eile-ei kimuanna (self-confidence) cihte kisam mah ei. Thukhat pan en ding hileng tuate i neih zawh loh manin zong lungsim cidamna hong sukha zong, cih theih veve hi. Gennopna ah, fears of abandonment personality (Mite’ pampaih/ ngawlkhin ding launa) a neite bang midangte sang lungsim natna a thuakna chance (a piang theihna ding) tam zaw pah hi. Tuamah bangin lungsim cidam nangin eile-ei kizahtakna (self-respect), eile-ei kipisan’na (self-esteem), eile-ei manphakisakna (self-value) le, eile-ei kimuanna (self-confidence) cihte pen kinak sap mahmah hi. Hih i genciang i phawk tawntung ding pen “Ei le ei i lungsim dam nading masakna pen angsung theihna (selfish) na hi lo hi.” (Self-care isn’t selfish)

 

1. Depression zong a kicingin hong gen lai o.

DB:  Lungsim bei, lamet bei, lungkiatna le hawm kisakna natna aih kei leh, khakham vei pen depression hi.

 

AD: Depression tawh kisai a genna ah hih natna ngahna ahang lakah neulai Trauma ngahna pan zong hi ci.. Hih pen tawm nong gen beh thei dia? Bang hiam cih leh, hih dan a trauma hanga pawl khat in a beipak lo lungsim natna Emotional Pain ngahin, a gol a teek dong mah hih Pain in a nuntakna, a gamtat, a lungsim cidamna a kipan sukha nawgkaisak thei, ci-in lai ah sim khangei kaih cianga..

DB: Hi mah ei! Truma pen gentehna hoih mahmah dingin “Meima” dan hi. I neu lai a i thuakkhak thute pen meima dan a na om toto hi. Lungsim damlohna lam i kibawl kei leh, tua meimate pen hong gol toto-in hong puakkham thei bek loin meima pawn na suak thei veve hi. Tua truamate mah in i mizia ai zong, i thungaih sutziate na ngawng tawh hong kizomin tuate in mi tawh kizopna ah zong nawngkaisak thei hi. Tua truama-te hong kikhol toto-in lungsim damlohnate tawh hong kizom thei hi.

 

AD:Mental health le emotional health a kizopzia, a kilamdangna le a thupitnate ai zong nong gen beh thei dia?

DB: Emotional health i cih ciang i ngaihsutzia  (i feeling) lam genna hi zaw a, mental lam i genciang i khuak lam hong hi zaw hi. Mental pen emotional health tawh pumkhat a bang phial hi. Gentehna in, i lungsim mah hong dam leh i ngaihsut zia (emotional) hong cidam in i thukhensatzia zong hong cidam zaw hi.

 

AD: Stress zong a kicingin hong gencian o.

DB: Stress- lungkhamna leh lungbuai mahmah na, a dang Lungsim lam thute dan mah bangin Stress zong Zokam in a kammal lian om lo ahih manin “Lungkhamna/ lungbuaina” cih ciang natna tawh zong hong kibanglo kha mai thei hi. Ahi zong phawk ding ka deih pen hih lungsim lamte pen lungkham vat, cih dan hi loin a kizom paisuakin a tawmpen kal 2 sung bang lungbuai gawp, cih dan hi. Stress pen hong tamluatna pan a dang lungsim damlohna dangte tawh kizom to thei hi..

 

AD:Hih stress tawh kisai ah na genna uh khat ah, stress ngah pawlkhat pen kin nei mel lo, cinn (Nail) khawng pekpek cih khawng banah, ei pau in “khuisasa” “thuumthuum, tautau” cih khawng zong ai dia?

DB: He hi mah ei! Cinn pet khempeuh ahih kei leh a khuisasa khempeuh, lungsim damlohna thuak ahihpah sam loh hang, tuate pen a symptom hi thei maw. Gentehna, pumpi lam bang hi leh, sungpai le sungkhak cih dan, sungnim, lungvai aih kei leh nak siluang cih dan ciang zong bang hi thei lai hi.

 

 

AD: Anxiety, depression le Stress cih teng a kibatna, a kilamdangnate mipi tel dingin nong gen thei dia?

DB:  Hih Stress, depression le stress cihte pen Unau khat bang uh hi. A vekun bel lungsim damloh na sung ah om hi. Gentehna in, stress tam lua leh depression bang kingah thei. Anxiety lian pen patauhna, lungtang khawng kinawh sai gawp, worry gawp, cih lam hi zaw in,.. depression leleu ciang lungsim bei, hawm kisa gawp, mailam ah lamet na bei kisa gawp cih dan lam hi zaw.

 

 

AD.Hih natnate a sawt ciang, bangteng in sulzuih thei lai ding?

DB: Hih natnate a sawt ciang, pumpi lam natna tuamtuam, mi tawh kizopna tawm semsem, kuamah ho loh pi aw zakna le muh tuamtuam nei, mi tawh kizopna nawngkaisak thei cihte ban ah a lau huai penpen ah amau’ nuntaakna amau le amau kila ciang dong hi thei hi.

 

AD:Eimi sungah a tunga thum pan bang a tam pen tam?

DB: Data tawh kisai in stress tam penin kimu hi. A percentage lian in 74.2% bang hi.

 

AD: Zogam Zomite sangin US Zomite sungah hih natnate tam zaw a kici thei dia? Bangteng hang aitam?

DB: Zogam a om Zomite pen Covid ma le i gambuai ma lian tawh teh ding hi leng, US a te in tam ngah zawin um ing. Ahang in hih natnate pen gam kituahna, sang kituahna cih dante pan zong kingah hi. Tua ban ah khangnote lian bang hi leh, sangah minam tampi tawh ahih manun kisimmawhna pen tam mahmah lai-in social media pan ahi zong, bullying-te tam mahmah hi. A gol lamte zong pau le ham theih lohna ah mi hai bang lianin omin simmawhna thuakna tam mahmah ding, tua ban ah Zogam danin it le ngaih kiim lo ahih manin kisap hunin “support group” pen tawm mahmahna pan zong hi thei hi. Malay pan a paite bang Zogam a omte thuak loh ding palik launa, a tawntung a pautauh dennate ngahna tam ahih manin “Anxiety le adang natna” te ngah nang pen lampi tam mahmah dingin um ing. Ahi zong hih Covid le Galkapte’ thuneihna buluh khit pen Zogam a om Zomite thuak dan pen na sia mahmah kha ding h,i ci-in mu ing.

 

AD: Hih natnate i ngah lohna dingin bang ci bangin ei le ei kikem ding ihia leh?

DB: Lawmte tawh holim ding, I neih lam I theih leh therapy pai, siavuante kiang kilah ding hi a, zum huai a tuat ding hi lo hi.

 

AD: Tu laitak a neite in e, bang ci bang a eile-ei inn ah kibawl thei ding?

DB: Exercise la ding, huan khawngah pai, innkuan in hun zang khawm cihte in tampi tak hong huh mahmah ding hi. I muankhat peuh kiang i vai pulaakna, le ei lungsim hong nuamsak (a hoih aih nak leh) te sep huai hi.

 

AD:Huhna kisamte in koi lai ah ei pau tawh ngen thei ding uh?

DB:Ei pau tawh huhna ngah theih nading pen Gilead Counseling Center hi a, Tulsa ah om hi. Tua lai ah ei mi siavuan Sia Thang Kham om a, ei pau tawh hong huh thei ding hi. Sang naupangte bang sangah counselor tuamtuam a free ah om gai hi, i ngetziauh ding hi. Sang ah ut kei leh zong, i Medicaid tampite in zong hi dante cover hi. Siavuante kiang gen leng hong zongsak thei ding uh hi.

 

AD:Hih lungsim cidamna lam tawh kisai Zomite sungah na muhzia, a hang le kipuahphat dingte tawm hong gen pih lai o.

DB: Kei muhna ah, nidang sangin tu hun teh eimi sungah kithei zaw hi. Kipuah phatna dingah pen lungism natnate pen zangkhai loin thupit bawl ding kisam sa ing. A tuak kha I theih a om leh zong huhin, nusiat bawl lo ding hi hang. Lungsim damlohna pen pumpi damlohna i kinpih bangin kinpih huai sa mahmah ing.

 

AD:Dot khakloh genbehnop, behlapnop a om leh..

DB: Hih bang kong hawpsawn thei nading a hun nong piak man un lungdam mahmah ing. Last but not least lungsim cidam pen pumpi cidamna, kha damna cihte tawh hong kizom hi a khat a dam kei leh, a kibucing tuan lo ahih manin a dangte mah bangin kinbawl tangtang huai sa ing. A thuakkha i om leh “Pasian in na nuntakna man nei sa a hong bawl ahih manin a mannei na lungsimte cidam nang hanciam zaw ni.”