Agape Digest laihawm nasepna hih ciangdong hong tonpih Topa tungah lungdam i ko hi. Hih bang nasep thupi i sepkhiat theihna dingin avaihawm siate le makai khempeuh tungah zong Agape Digest tanute in lungdamna kong pulak uh hi.

Agape Digest I kipat tungin kha khat, khat veita hawm khia hi mah lehang, vai tuamtuam tawh kha nih ciang khat vei kihawmkhia kik hi. Tu-in Agape Digest No. 8 na I hawmkhiat theih banah kum khat cin dong hong mual suahpih I biak Pasian min I phat hi. Amen.

Kumkhat sung tawntung Topa’ hong tonpihna, le adiakdiak in Pasian zahtakna le Pawlpi itna tawh pilna, siamnate sit loin ma apang Agape Digest tanute tungah, thului, dotna le dawnna, teci panna, le thu manpha thu laigil hong hawmsawn, Khris sungah sanggamte tungah nakpi lungdamna kong ko uh hi.

Agape Digest a sim mi khempeuh tungah i Pa Pasian in kha lamah picinna, Ama’ thuthuk theihtel zawkna, pilna le cimna hong piak nading, le hih laibu tungtawnin Ama’ minthanna hong kilatsak nading i thungetna ahi hi.

Agape Digest’ Tupna le Ngimna nam thumte tawh kizui in laihawm nasepna zom toto lai ding i hih manin, akuamapeuh in tha i kipiak ding zong kong lamen uh hi. Hong tung ding kumthak January nipi masa 2023 ah lai maithak tawh kimu kik ni.