A masa penin itna le hehpihna a nei i biak, a nungta tawntung Pa Pasian min ka phat hi. Eite hong  itin tawntung sih nading pan hong tankhia Jesuh Khris in thupha ngah henla, phatna ngah tahen.  A nihna ah hici bangin teci pan theih nading lam hongin hong gel, hong vaihawmsak Agape Digest vaipuak nei Tanu khempeuhte tungah lungdam hong ko ing. Na gimna, tawlna, na hunbei uh le na tha bei khempeuh uh i biak Topa’n azah tampi-in hong thuk henla, a ma min tawh nasepna uh muibun takin hong zang tahen.

Kei ka min Cin Sian Muang hi-in, Pa Thawng Khen Thang le Nu kham Do Cingte sung panin a piang ka hi hi.U nau 8 pha-in, numei 2 le pasal 6 ka hi uh hi. Kei pen a u lam panin a 4 na ka hi hi. Saizang khua ah suakin, tuni dongin ka nu le kapate ka pianna khua mahah teng lai uh hi. 1999, December kha sungin Tuiphum pawlpi ah inn ka phiat uh hi. Tua masaih teng khempeuh lawki sungah ka om uh hi. Ka pa in tulpi sem hi. Saizang khua adingin lawki beina le tulpi beina zong hi pah hi. Kapa pen tulpi ahih manin a kithoih a om ciangin tulpite thaman ding Saphei meibang kipia hi.Tua thaman a pua  dingin ka pa ka zui zel hi. Lawki sungah  om ka hih manun kikhop cih bang nei ngei loin Pasian thu zong ka za ngei kei hi.

1996 kum panin ka sunglam panin Pasian thu dangtakna nei ka hih manin kei le kei in Pasian thu zak theih nading lampi zongin ka hanciam hi. Tua hunin ka lawmte Sandei Sikul (Sunday School) kah, kikhawmin om uh ahih manin kei zong ka lunggulh mahmah hi. Tua bangin amaute om uh a hih manun hampha kasa mahmah a, ka zui hi. Tua bangin amaute ka zuih ciangin ka nu le ka pa in hong phal loin hong kham hi. Ka nu le pa’ thu mang loin pai veve ka hih manin hong tai zelzel uh hi. Tua bangpi mah tawh Nipi ni hong tung ciangin ka zui khazel hi. Tua bangin ka om toto hi.

1997 kum ciangin ka kikhopna a hi EBC pawlpi ah Sia Gin En Cin makaihna tawh Crusade hong bawl hi. Tua sungah Topa lam honsakna tawh ka nu le pa in hong phalin ka kihel thei hi. Sun hunin Sia Mangsut in counselling (mei kimu telgenpihna) hong neih pih hi. Pasian in tungman tawh milim bawlin tua milim’ nak sungah a hu sangsuak a, nuntakna anei mihing hong piang hi. Amah in tua mipa’ nakguh khat lakhia-in numei a bawl hi. Pasian in mipa kiangah a zi dingin a pia hi. Pasian in amaute Eden huan ah a koih hi. Tua huan sungah a deihhuai, nek dinga a hoih singkung nam khempeuh posak a, huan laizangah nuntakna singkung, le a sia-le-pha khentheihna singkung zong a posak hi. Topa pasian in mipa thu pia a, “Na ututin huan sung singkuh gah khempeuh na ne thei ding hi. Ahih hangin a pha le a sai  theihna singkung gah pen na ne kei ding hi. Banghang hiam cihleh, na nek ni-in na si ding hi,” a ci hi. Ni khat amaute omna huan sungah Satan (Dawi  mangpa) ahi gulpi hong pai hi. Gulpi in numei kiangah Pasian in huan sung singgah khat peuhpeuh ne lo ding hong ci ahi hiam, ci-in a dong hi. Numei in gulpi kiangah “Ka ne thei ding uh hi. Ahi zongin huan laizang a, a sia a pha khentheihna singgah na ne kei ding uh hi, ci-in a dawng hi. Banghang hiam cihleh na nek ni-un na si ding uh hi,” hong ci hi, a ci hi. Gulpi in numei hong khem zo a, numei in singgah loin a ne hi. Amah in a nek khit ciangin a pasal zong kimkhat pia-in a nesak  hi. A nek khitphetin a maute in khua phawk uh a, guaktangin a om lam a kithei uh hi. Amaute in Theiteh khui-in puanin a bawl khit uh ciangin a silh uh hi A nitak ciangin huan sungah Topa Pasian hong pai hi. Ama hong paina  ging a zak uh ciangin amuh loh nadingin a bu uh hi. Topa Pasian in amaute hopihin koi ah om na hi uh hiam, a cih ciangin mipa in Nangma’ ginna huan sungah ka za a, ka lau hi, ci-in a dawng hi. Bang hang hiam cihleh, amaute guaktangin om uh ahih manun a bucip uh hi. Mihing in Pasian’ thu mang lo uh ahih manin sihna a hong piang ahi hi. Amaute in Pasian thu mang lo uh ahih manin, Amah in huansung panin a hawlkhia hi.  Tua ni a kipanin Pasian le mihingte hong kikhen ta uh hi, ci-in hong gen hi.

Adam panin mi mawh i hihna le tua mawhna hangin mi khempeuh Pasian tawh kikhenin tawntung sihna  Hell a kitung ahi hi, ci-in hong gen pih hi. Hell khuksung sa mahmah napi-in thante a sihlohna hong genpih hi. Tua hell pen bei hun cih nei ngei loin a tawntungin a om paisuak ahi hi, ci lai hi. Tua ciangin (Luka 16:19-31) sunga, sumhaupa le Lazaras thu hong gen hi. Sumhaupa si-in hell tung hi. Tua hell sungah mei sa mahmah ahih manin a dangtak mahmah a, khutme dawnah tui taak khat bekbek na ngawn a lunggulhna hong gen pih hi. Tua bangin hong gen ciangin  kei zong ka lau mahmah a, ka dipkua-in ka dah mahmah hi. Tua hell sungah mi khempeuh tung ding hi, hong ci hi.Tua leh,  a tawpna ah, (Joh 3;16) “Pasian in leitung mite hong it mahmah ahih manin ama Tapa a um mi khempeuh si nawn loin a hing tawntung theih nadingun a Tapa neihsun a hong piak dongin a hong itna a hong lak hi.” Hih Laisiangtho Pasian’ kammal tawh hilhcianna hong nei pih hi.

Pasian’ tapa Jesuh Khris in mi khempeuh mawhna tang dingin singlamteh tungah thahna hong thuak hi. Tua singlamteh tungah Jesuh sisan hong luangin a sihna thu a um mi khempeuh in nuntak tawntungna ngahin tawntung sihna hell tawh kipelh hi. Hih thu na up leh, na up ni a kipanin nuntak tawntungna a ngah na hi ta hi, hong cih ciangin kei zong sihna hell pen lau-in kihta mahmah ka hih manin kei tang dingin Jesuh hong sihna thu ka um hi. Jesuh in keimah Cin Sian Muang tan dingin vantung panin leitungah hong paina  thu telin ka um hi. Jesuh in kei a ding taktak hong pai hi. Kei thuak tang ding khempeuh singlamteh tungah aman hong thuaksak taktak hi, ci-in khamuanna ka ngah thei hi. Tua ahih manin kei pen tawngtung sihna tawh ki pelh ta ing. Tua ni-in “Jesuh ka Gumpa, ka Topa, ka honpa” in ka sang hi. Tu-in ka si zongin vantunggam tung taktak ning, ci-in khamuanna ka ngah hi. Ka naum mahmah a, ka lungdam mahmah hi. Tua ni sun a ka ngah kha muanna, lugdamna, lungnopna pen tuni dongin ka mang ngilh thei kei hi. Hih kha muanna, lungdamna, lungnopna ka ngah ni a kipanin ka inn kuanpihte a dingin ka dahsak mahmah a, amaute a dingin kha siangtho in veina hong guan pah hi. Tua ni a kipanin amaute a dingin thungetsak ka kipan pah hi. Zanin zong ka ihmut theih loh ciangin amaute a dingin tho-in thu ka ngen hi. Khitui, naptui tawh Topa tungah ka kiko hi. Tua bangin ka om ciangin ka nu ka gei ah hong pai-in ngap lo na hiam, Muang! ci-in hong dong thei zel hi. Kei zong “Nu aw, ngap mah ing, ka bangmah na lo hi,” ci-in ka dawng hi.

Bang hangin tua bangin om ka hiam, cih leh deihloh penin ka innkuanpihte khat peuh si zenzen leh, hell tung teitei  ding cih tel mahmah ka hih manin ka ihmut theihloh hun pen tam mahmah hi. Bang hang hiam cihleh ko innkuan sungah khuavak mu masa pen ka hih manin ka innkuanpihte vei-in ka lainat mahmah hi. Topa’n ka thungetna hong dawngin a hun a tun ciangin khuavak sungah amaute zong hong tunpih sak hi. Kei gupna ngah kitel pen 1997 kum hi-in, tua kumin kum 11 ka pha hi. Kum nih huam sung bang ka thungetna Topa’n hong dawngin 1999,December kha in ka khua uhah khua siansuah kibawl hi.

Nitak khat, hun bawlna sungah ka unau teng le ka nu tawh ka pai uh a, ka pa ahih leh amah bek inn ngakin a om hi. Tua nitakin ka pa in lupna tung panin “Aw” khat za a, “Inn na phiat kei leh na tate khat peuhmah si ding hi,” cih za hi. Amah zong lau-in, dah mahmah a, om thei nawnloin tua hun bawlna ah hong paipah hi. Tua hun pen nitak 9:30pm kiimpawl hi a, Saite khat kiangah genin tua Sia pa in thu ngetsak a, lau kawm, ling kawm sa-in thu hong gen hi. Denin “Aw” khat ka za a, “Inn na phiat kei leh na tate khat peuhmah si ding hi”, ci ahih main zingciangin Tuiphum pawlpi ah inn hong phiatsak un, hong ci ziau hi. Topa min thag tahen! Ka pa thugen ka zak ciangin lamdang ka sa mahmah hi. Abei sa hun tampi sungah lungdamna thu hong gen pawl khat in zong ko pawlpi ah hong suak un. Sum hong pia nung, antang hong pai nung, ci-in hong zol pen om thei zel hi. Amah pen ut peuhmah lo, a ngaihsun vet lo khat a hi hi. A zingciangin inn ka phiat pah uh hi. Topa’n ka thungetna hong dawng hi, ci-in ka nuam mahmah hi.

Ahi zongin inn phiat kihi pan bek a, Gupna ngah hi nai lo a hih manun, ka thunget ka zomsuak lai hi. Topa in hong hehpihin lungkia loin ka thungetna hong dawng a, 2004 kum ciang Ka Nu le Kapa in Jesuh Gumpa, Honpa le Topa in sangın hong kitel a, kha muanna hong ngah thei ahih manin Topa tung le ka Nu le Pa tungah ka nuam mahmah hi. Topa min thang tahen!

Hih lai a sim kha mimal tungah Topa’n a thakin ama’ itna hong phawksak tahen! Amen! Lungdam. A beisa, tu hun le a tawntungin Topa’n minthanna, vangliatna le ukzawhna nei tawngtung tahen. Amen!