Endikpawl

Tutung kikup ding ka ngaihsut uh ciangin, Zolai ah i muh mengmeng loh, Kawlte’n Kabia ci-in, Mikang kamin Poem a cih lai nam khat kong tel uh hi. Hun khat lai-in Mikang poem, Kawl kabiate ciingin a atte uh Siamsin Magazine ahi Ciimnuai Magazine-te ah hong suaksak zel uh hi. Zola cih dingin la danin kisa thei lo hi. Ei i Zolate pen la in kisa thei hi. Tua manin la-in a kisak theih loh hangin zo lakam malte a kihel theizah helin, kammal a thuk theithei le laimal/kammal a tawm thei pen tawh a thu a zai pen a ki-at a hih manin tu tadihin ei pau-in “Lakam” mah cih phot mai ni.

Amasa Lakam ah lakam tampi kihelin, a nuai ah a khiatna tawh kong suaksak uh hi. Lakam tampi kihel lakam cih ding hi. A thei nai lote ii tel ding cihna hi. Zolai tan 4 kah ngeite in bel a tamzaw thei khin tek dingin hong lamen ung.

Anihna Lakam ah lakam mal khat zong kihel lo hi. Ahi zongin Kawllai, Mikang lai pan a kabia/poemte ciing a ki-at hi-in, tuate tawh tehkak lenglah, lakam mal khat zong a kihel lo hangin lakam mah hi veve ding dan hi. Tehkak, etkak theih dingin a nihin kong suaksak uh hi. Anihna pen genbeh kul loin kitel thei pah ding hi.

1. KA HUN MAN PHA

Rev Paul Thuam Thang(1982)

Tungman ngiingei, nikhat ka sawk;

Tha sial pipi’n, zun a ka sawk;

Han lung ciam a, ka zunzun ciang;

Sinlai lungtup, mim bangin piang;

Tai khua val in, sul hei kik ing;

A keugaw sa’n, mel in mu ing;

Ka zun bangbang, sakmel pu in;

Puan bang khek theih, hi nawn lo;

Sen momno khat, anglai ka tawi,

Nisim naubang, tawi-in ka awi;

Lungdeih bang a, gia bang ka zun;

Momno’ sinlai, ka zun bang suun;

Lenkum vei-in, sul hei kik ing;

Honuam tongdam, nau bang sang ing;

Senlai sinthu, nun a a zil;

Puan bang khek lo, lunglai a gil.

((Zolai Sinna 2010 by ZAUS pan kila hi.))

Kammal (Word) le kammalpawl (Phrase)te’ a khiatna

1. Sen         = neu lai,
2. Momno   = khangno,
3. Lenkum  = nuntak kum
4. Sul          = bul, kipatna
5. Sul hei kik= a kipatna ah kilehkik
6. Tong        = thu, kampau
7. Tongdam = thu dam, thu hoih
8. Zil           = bawl, sem
9. Zun         = puah, bawl hoih, geel
10. Gia          = Tuk pak sawn kai dan, ak tal mei dan a a nel niknek a sau suk zil zial pen (aktal gia) «Gia»
11. Gia bang zun = Aktal <<gia>> pen hoih sa in a tang a man sitset ding a zun zun, vel vel, khoih khoih, puah puah
12. Gil            = na khat peuhpeuh ii a thupi/ ahioh/ penna mun, a laizang

((Zolai Sinna 2010 by ZAUS pan kila hi.))