Pasian hehpihna tawh i magazine zong kum khat (Issue 8) hong cingin, a kum nihna issue masa pen hong hawmkhiasak zo i biak Pasian tungah lungdamna i ko masa hi.

Leitung buainate i et ciangin Lai Siangtho sunga a gen Hun Nunung sungah om ihih lam lam kua mah nial zawh ding, hi lo hi. Tua manin tu kum sungin laisim mite’ phattuamna ding lunggulhna tawh Hun Nunung Thuluite  (Entime Series) cih Laktohna (Rapture) pan Tokhom Kang Thukhenna (The Last Judgement) dong khenpi 6 suahin issue simin hong kisuaksak ding hi. Hih adingin a pil a theihnate itsik loin hun, le tha le ngal bei-in hong atsak Dr. Zam Sian Khai le a innkuanpihte tungah zong lungdamna i ko hi.

A beisa kum khat sung, laisimte’ phattuam nadingin deihsakna tak tawh lai hong atsak siate le lai-at a kuamah peuh tungah zong lungdamna kong ko nuam uh hi. I laihawm theih nading leikha bangin hong pankhia Rev. Sawm Thang le Sia Thangno ahi zong, sum le paai tawh hong panpih Zomi Agape Church le makai upa a kua mahpeuh ahi zong, le pawlpi mi khempeuh tungah zong lungdamna kong ko uh hi.

Bektham loin, laisim ding om kei leh, kote’ sepna in a mawkna hi ding ahih manin laisim mi khempeuh tungah zong lungdam ung. A gim a tawl, a bawl khempeuh le Agape Digest tanute, le laisim mi khempeuh tungah Pa Pasian in ama Kha Siangtho tawh kipawl Pilna (Wisdom), Theihna (Knowledge), le Khentel Theihna (Discernment) hong pia khawm ta hen.

Endik pawl