Siannuam

National Institue on Drug Abuse te kaankhiatna tungtawn in, 2018 kum in khangno mimal 4633 bang khemtheih guihtheih vaalkaai lua zaihna hang in hong nusia uh hi. Khangno mi mal 100 ah 80% kiim in sangkahna sanginnte ah zateep zang, zudawn, le khamthei guihtheih tuamtuam a zang sangnaupang khat peelmawh thei hamtang uha, tua sung ah 50% bang in khatvei hamtang bang tua zatui/zahate ciam ngei uh hi, ci hi.

I teenna Kentucky State mahmah ah zong kumkhat in mimal 1,380 kiim bang khamtheih guihtheih hangin hong nusia den uh hi. ( National Center for Drug Abuse Statistic ) Kumtawm kumtam, civom cikang ci loin i teenna kongbiang khat khit kongbiang khat hong ban thei a lauhuai mahmah lungno nam khat hi. Abeisa kum 2019-2022 kum sung bekbekin zong kei theihpak ah khangno mahmah lai Kawlgam mi sitset mi 3 bangin hih natna hangin a nuntakna uh hong mualliap san uh hi. Hihte i ngaihsut ciangin khangnote, nulepate, le kipawlnate in i hih theih khat le nih beek om ding hi, cih ka mu a, thungetna banah hih banga pianna a hang/a thute kanin i kidalsiam ding kitangsam ka sa mahmah hi.

Khangnote le khamtheih guihtheih zatui  zat khialhna

Khangnote hih zatuite zat khialhna pan bang cih kikep ding? Khamtheih guihtheih zatkhialhna in na ta khanglaite’ nuntakna tampi sukha thei ding hi. Amaute in tua lampi a zuih khaklohna ding bang cih kep ding, bang cih dal ding, cih kikum khawm ni.

Amasa in khangno khat in khamtheih guihtheih zat hong kipat leh, a cidam tak le lungmuang takin a nuntak theihna ding panin tampi khaktan sak hi. Khangnote in hih lampi hong totkhak hetloh nadingun, guihtheih khamtheih zatna hangin kingah supnate le khensatna maan neih ding phatmawhnate kikuppih tangtang in.

Banghang in khangnote in khamtheih guihtheih zatui zangkhial uh hiam?

Khangno tampi in khamtheih guihtheih zatuite a zatna uh pen a hang tuamtuam om hi. A zang kipan cilte ahih uh leh, kiim le paam huzaapna lianpite hang hi. Khamtheih guihtheih zatui zahate ahi zu, za, vape cihte pen khangnote omna kiimlepaamte ah olno takin kingah baihna cihte hang hi.

Tuakhitzawh a zat suaksuakna uh pen khangnote amau le amau kicinglah kisakna, ahih kei leh kiimlepaam panin nawlkhin tuaknate hang zong hi thei hi. Khangnote in phiatzo ding ki-um nawnlohna tawh a nuntakna ah a suplawh ding uhte ngaihsut in nei nawn loin, tua in khamtheih guihtheih zatna tawh kisai a lipkhaphuai takin gamtat ding khensatsak hi.

Khamtheih guihtheih zate zatna hong kipansak thei pawlkhat:

• Khanggui kizom a khamtheih guihtheih lungno veina
• Lungsim/ gamtat luhekzia cidam lohna, Gentehna: lungkiat natna, lungsim patuahna, ADHD ( Limtak thungaihsut theihna bukim lo natna )
• Lungsim pumpi utna zui a gamtat biangbuangna
• Lungsim sungah liamna meimate, Gent: mawtaw accident tuakna, innpan in kidonlohna
• Ei le ei lungneu in kimuanlohna, kiimlepaam pan pampaihna thuak kisakna

Khamtheih Guihtheih zate zatna i hongpiak Suplawhnate

• Khamtheih guihtheih zate tungah kingatna : Khangno zatui/zaha a zangte a kum tam tektek uh ciangin khamtheih guihtheih zatna suk tektek thei hi.
• Thukhensatna kicinglah sakna : Khamtheih guihtheih tawh kisawhkhakna in mimal vai mipi tawh vaihawm na thukhensatna te ah kicinlahna piangsak hi.
• Nulepa tawh kisai thaangtatna : Khamtheih guihtheih zatna in nulepa tawh kisai thaangtatna khangsaka, cidamhuailo kizopnate le lametloh naupaainate pianna ding khang sak hi.
• Limtak mawtaw hawl theisak lo: Zatui/zaha zangkawm a mawtaw hawlna in pumpi khutlekhe zatnate zawngkhalsaka, mawtaw hawlte le a sunga a tuang mite nuntakna lauhuai dinmunah koih thei hi.
• Sanglai zawhlohna: Zatui/zaha zatna in sanglaite zawhlohna khangsak hi.

Zatui/zaha in Cidamna lam sukkhakna

Zatui/zaha zatna in khamtheih guihtheih zongsatna/ lungno veina, nasiatakin pumpi kisiatna, natna le sihna tampi piangsaka, tua teng lak ah:

• Cocaine — Lungtang ii sagaapte sungah a kisam sisan kizelh zawhlohna, khuak sungah a kisam sisan luanna zawl kikhakna, gonggaw/sibupna
• Ecstasy — Sin sung damlohna, lungtang damlohna
• Inhalants — Lungtang kisiatna, kaal, sin le tuapte kisiatna
• Marijuana — Ciaptehna khuak kisiatna, buainate vengsak nading thu ngaihsut theihna / khensat theihna le na khat limlim sinnopna lungsimte kiamsaka, lungsim venglohna hangin kiimlepaam tawh kisukkhakna ah amcipna, lungmangnate a piantheihna ding khangsak hi.
• Methamphetamine — Lungsim venglohna hangin kiimlepaam tawh kisukkhakna ah amcipna, lungmangnate a piantheihna ding khangsak hi
• Opioids — Huihdiikna tawh kisai lauhuaina, zatui khama sihna
• Electronic cigarettes (vaping) — Zateepna pan kingah thei ahi Pumpi ading lauhuainate, nicotine ( zongsat ding hoihlo za ) zongsatna khangsak

Na tate tawh holim in

Hih thute tawh kisai in na tate tawh holimna tampi neih ding thupi mahmah hi. Tua dan holimna na neih ding ciangin, na phonete koihphot inla kihona a kipelh tengtung loh hun ding teel in. Na heh laitak, na sin so laitak, cih hunte peel in.

Na holim uh ciang in:

• Na tate ii muhna / muhdan dong in. Thuhilhna hi zaw loin na tate in hih thu tawh kisai a muhzia uh le a ngaihsutna uh ngaihsak in. Na tate in a muhna maan le ngaihsutna maan hong genngam nading hanthawn in.
• Khamtheih guihtheih a zat huailohna a hang thupite kuppih in. Lausak in lingphawnggawp masa kei in. Hihte zatna hangin a nuntakna – Gent; kimawlna tuamtuamte, mawtaw hawlna, cidamna, le mel le sate sukha ding.
• Media te pan bang thuzakna nei uh hiam sittel pih in. Social media, TV etna, la ngaihna tuamtuamte in khamtheih guihtheih zate zatna tawh kisai a zat ding thapiakna / zatloh ding hilhciatna lakkhia uh hi. Tua hi-in khangnote in i  etding i zatding thu le la, liim le nate i teelsiam mahmah ding thupi hi.
• Lawm le gual ii huzaap a nial zawhna ding kuppih in. Na tate tawh kholhpih hoihlote in khamtheih guihtheih zat ding a zol/thapiak ciang bangdana nial kik ding cih kiginkholh pih in.
• Nang zong a zang ngei/ zang lai mikhat na hi leh, na tuahkhak thute hawmsawm in. Na tate in khamtheih guihtheih zate zatna tawh kizui in nang i zatna thu hong  dot leh, na dawng nadingte kiging khol in. Tuate na zat/zatlohna hangin na supna/hamphatnate amaute tungah hawmsawm in.

A dang kidaalkholh nading

Hih a nuai a te zong kidaalkholh theihna ding theih ding hoih hi:

• Na tate ii nisim a sep le bawlte theihpih in. Na tate bang hun laitakin koi munah om, cihte theih pih in. Uliante’ vaihawm activities tuamtuam a lunglut uh kan pih in.
• Zuih ding le zuihlohna thaman a thuakdingte koihsak in. Na tate in no innkuan thukhun tawh kituakin bang teng hih thei ding, bang teng hih theilo ding, cih limtak gen pih in, ahih dingte uh ahih loh ciang a thuakdingte tawh zui pah lianlian in. Gent; pawi a pai uh ciang zukham/zazang lawmte mawtaw ah tuang thei lo ding, cih a kipan
• Na tate ii kithuahpih zawdeuh lawmte theih pih in. Khamtheih guihtheih a zang lawm te tawh kithuah le amau zong zangzaw hamtang ding uh hi.
• Na innah zatui/zahate sitcian zel in.
• Thapiakna le panpihna tampi zang in. Na tate phatna, thapiakna, pahtawina kammalte gen zelzel inla, a lungdam hunin lungdam pihin, a dah hunin dahpih in. Nang le na ta kikaala na ki-itna khauhsak un. Tua in siatna tampi pan na tate na daalsaksak ding hi.
• Etteh hoihin om in. Nekna dawnna, silhna tenna a kipanin na tate etteh theih dingin om in. A val kaai-in nate na hih loh nading, nang mahmah kiseek in.

Sources:

Teenage drug use statistics [2022]: Data & Trends on abuse. NCDAS. (2022, April 6). Retrieved November 20, 2022, from https://drugabusestatistics.org/teen-drug-use/

Mayo Foundation for Medical Education and Research. (2022, October 4). What parents should know about teen drug abuse. Mayo Clinic. Retrieved November 20, 2022, from https://www.mayoclinic.org/healthy-lifestyle/tween-and-teen-health/in-depth/teen-drug-abuse/art-20045921

U.S. Department of Health and Human Services. (2022, November 1). Research topics. National Institutes of Health. Retrieved November 20, 2022, from https://nida.nih.gov/research-topics