(Kawlgam tangthu tomno)

Endikpawl

Suahtakna i cih ciang mimal suahtakna, le gam le leitang suahtakna cih nam nih a gen nuam ka hi hi. Tua lo, kha, lungsim, pumpi suahtakna cih a tuamtuam zong om ding hi. Hih lai ah suahtakna tawh kisai ei nuntakna sungah i tuahkhak thute tawh Kawlgam tangthu tawm tom gen to ni.

Tu kha ni 4 ni pen Kawlgam in British Empire pan suahtakna (Independence) i ngahni ahi hi. A hun lian pen ahih leh zingsang nai 4:20 am lian ahi hi. Banghang hiam cih leh, gamukmangpi masa U Nu pen Kawl biakna le dawi phuisam vai a um mahmah khat hi-in ama thudok siapite cih zui a phalvak ma zingsang nai 4 le minit 20 lianin suahtakna la nung ci-in Mikang kumpi tung a nget ahi hi. Mikang uliante in bel kum simin Januray ni 4 nisimin na ihmut cim lo ding ai ve, cih san uh, kici hi.

Mikangte hong lut cil lai-in i pu i pate in a hihtheih zahin na do uh hi. Japante hong lutin na do leuleu uh hi. 1947 kum Febraury 12 ni-in Mualtungmite in Kawlte tawh, Panlong khua ah Kawlgam tawh suahtakna lakhawm ding cih thukimna na bawl uh a, tua pen tangthu le Naingnganzyi sungah Panlong Ngyilakhan/ Sachouch ci-in a thang vangvang hi. Tua tawh kizui-in Maymyo Enquiry 1947 kibawlin Kawlgam tawh kipawl takpi nuam mah na hi uh hiam, na kipawl nop uh leh, bang ci bangin kipawl nuam na hi uh hiam cih dotnate kidong hi. Hih Enquiry pan a muhkhiatte uh 1947 gamthukhunpi ah etkakin kizang hi. Zomite in Kawlgam tawh a kipawl nopna ahang thupi pen in tua hun lai-in Kawlgam bek pan ideihzah i ngah mehlak a kikhah “Ci” na hi zen hi. Ci om lo, sa lim lo ci sam hive hang made!

Mikang kumpi kiang pan suahtakna tawh kizui-in ei gam ah zong ukpi thuneihna/ siahtuang siahphei pan suahtakna zong mipi thukimna tawh Falam ah kikhensatin tua ni pen Zomi Nam Ni i ci hi. Mikangte hun lai ah ei ukpi tawh a ki-uk Falam, Haka le Tedim gam teng pen Chin Special Division cih min tawh gamke khat in ahi ciang khat ei le ei ki-uk theihna i ngah hi. Gambup kumpi pan hong kia Gamkhen budget pen zang bei zo loin ap kik uh kici liang hi. A sum a tam lua maw, a mawl maw, a thumaan lua zaw…No tek in na ngaihsun un. 1958 ciangin tua ei le ei ki-uk theihna hong bei-in U Nu in gamukna teng galkapte tung va ap hi. 1947 gamthukhunpi sungah kum 10 khit ciangin gamkete in Kawlgam pan suahtakna ngen thei ding hi, cih thukhun na kihel ahih manin tua kum 10 a cin kum 1958 sungteng pen galkap in len leh, hih thu veng lel ding hi, cih upna tawh a va ap ahi hi. 1959 ciangin Kachinte in kumpi langpan hong kipan hi. Karente in bel 1949 pan Kawl kumpi na do pahin Kawlgambup aamu khut sungah a tung dektak ahi hi. Hih thu hangin Kawlgam commander-in-chief Lieutenant Smith Dun (Karente) tawpin Ne Win in galkapmang lianpen angah ahi hi.

1960 ciangin kiteelna om kikin U Nute pawl in Buddhist biakna pen Kawlgambup Kumpi biakna ka suaksak ding hi, cih tawh mee zong hi. Zo takpi-in, Buddhist biakna pen Kawlgambup biakna a suaksak ding uh ciangin parlimen ah Khristiante le Zomi/Chin MP teng mah in zong a thukim lam ah mee pia uh hi. Hih thu hangin biakna dangte sungah lungkim lohna tampi hong om hi. 1962 March kha ni 2 ni ciangin  General Ne Win in gam kitamkham ding hi, cih thulu tawh thuneihna khempeuh hong buluhin susialis gam phut hong kipan hi. Mipi’ neihsate laksakin tangpi tangta neihsa suaksak hi.

Hih thu hangin 1964 pawlin Zomite’n zong hiamtawi hong kipanin tua lakah Lamzang khuami Bo Thualzen hong minthangin tua gal pen Thualzen gal kici hi. Suangkua Kikhohna (Suangkua khua ah Kawl palai Col Vankulh leh Pu Son Khua Lian, Chin Special Gamkhen komisiana, le Gen. Thual Zente kimu-in a kikhohna nei uh hi.)  tawh gal veng hong suak hi.  1964 ciangin Lansin Parti min tawh parti khat in thuneihna khempeuh hong la leuleu hi.

1974 kum ciangin Susiallis gam thukhunpi hong bawl thakin tua tawh kizui-in i gam in Chin state gamke a kingah pan ahi hi. Chin Special Gamkhen (Division) lai-in ‌a kihel lo Paletwa zong Chin gamke sungah hong kihel hi. Tua masiah pen Arakan Hills Tract (Rakhine gamke) sungah 1974 kum dong om hi. Mikang hun lai pan kipan 1964 dong Khamtung gam ii khuapi, kumpi zum lianpen omna pen Falam ahi hi. 1964 ciangin Hakha ah thukhun tawh kizui ahi loin a kikhin sim pen kikhelkik nawn lo ahih manin i khuapi pen Hakha hong suak hi.

1988 buaina hong om ciangin Lansin Parti phiatin galkap ki-ukna kitung kik leuleu hi. Mun khempeuh ah lungphona kinei hi. Tedim bangah mi tam lua ahih manin, a mai lam a te gen za lo uh ahih manin, a nung lam pawl in “Mai a te cih bangbang, Mai ate cih bangbang” ci-in a khut uh huih lakah lawng ziahziah uh hi. Galkapte’n zong a cihna ding thei loin kiteel hong bawl piangpuang uh hi. 1990 kum kiteelna ah NLD in zo cip hi. Galkapte in aana ap nuam lo-in gamthukhunpi bawl masa ding ci-in kum 18 sung bawl uh hi. Hih hun sungin mualtunggam parti ahi SNLD, ZNC, le adang thum le li khawng bek thukhun tawh kizui-in ding thei lai bek uh hi. Pu Cin Sian Thang bang thong lut zel, pai khia zel cih hi mai hi. Biakinn pawl khat bangin Pu Thang aw, hong kikhawm dah mai in, a kici zah dongin Naingnganzyi cih pen a kilipkhap hun ahi hi.

2008 kumin Nagis Thukhunpi kipsakin tua tawh kizui-in 2010 in kiteelna kinei hi. 2015 kiteel kik ciangin NLD in hong ngah hi. NLD uk sung (2005-2010) Chin gamke NLD kumpi pen golguk tam ane penin kiciamteh hi. 2020 kiteelna pen thumaan lo hi, cih paulap tawh galkapte in gam thuneihna hong buluhin 2021 Spring Rivulusian  ciang dong Kahbia Dimukrisi tawh kum 10 sung suahtakna laklawh khat i ciam keukha hi. 2021 Febuary ni 1 ni panin sisan naisan kisuahin buaina sungah i kia suk leuleu hi. Ei le ei kithakin i lungkim lohnate thudam tawh hi lo-in, ngongtatna tawh ngongtatnate thuk kikin lungkim lohnate puakkham gawp hi.

I gam i minam tangthu en leng, ukna buluhte le namdangte’ khut sungah i om cip khin hi. Ei le ei i minam vai le i gam vai, vaihawm theihna i ngah ngei nai kei hi. Mikangte pai khiat khit ciangin Kawlte in vai khempeuh hawm uh hi. Tuni ciang dong ahi hi. Mimal suaktakna (Individual Freedom) ding na  ngawn hoih takin i ngah zo ngei nai kei hi (1948-1958 kikal lobuang). A tunga i gen khempeuh pen suahtakna ding hanciamna vive ahi hi. Launa tawh a ki-uk gam ah suahtakna a om ngei lo mah bangin, ngongtatna (Terror) tawh suahtakna (Freedom) a ngah gam zong om ngei lo hi.