Taang bang damin, ka von pak bang ka tawitheihna

(Damna pan tanu ngahna dong ah)

Teci pang:Nu San Cing

A masa-in tu ni ciang, cidamna hong pia Topa tungah ka lungdam hi. Kei pen Kawlgam ka om laipek pan lung-am natna khat ka nei a, Zato tuamtuam ah ka kilaklak hang dam siangna ka ngah thei kei hi . 2018 July,8 ni-in Kawlgam pan hong pai lasiam Sia Sangpi’ thunget sakna tungtawngin tua ka natna Topa’n damsiangna hong pia hi.  2018 kum Bowling Green kong tun’vua kipan ka  kawng (ခါး) hong na-iin zato ka kilaklak a ka nuamtuam thei kei hi. 2021 May , 8 ni  ZAC nupite’ vaihawm siamna tawh Siamah Zamnu in  thu hong ngetsakna tungtawngin Topa’n tu ni dong kawngnatna pan damna hong pia hi. Topa min phatin om den ta hen.

2019 pan ta deihin, Women’s Health Specialist (Numei Cidamna lam Sipecialis) te kiangah ka kilak den hi. 2020 ciang kum nih sung pongmaan ka kilak hi. 2021 pan bangbang hi ta leh, leitung lam pan ka lungkim nang, ci-in Nashville Fertility Center ah ka ki-ap a, a bawl theih tawp un hoihtak hong bawl uh hi.  Kha 6 sung ka ki bawl hi. 2021 June kha, appointment lak kik ding ciangin ka lungsim ah “Kha 6 sung bang hong bawl khin uha, kilak nawn dahin thu ngen ning”, ka ci hi.  Leitung lam pan ka lametna bei ta, ci-in zato lam ka khawl bawl ta hi.

Thu i ngen toto a,  2021 November, 21 ni-in Sia Thang Deih Cin in ZAC pawlpi ah hun hong zang hi. Thunget ki-apna  hongg samin ka nupa un ka ki-ap uh hi. Siapa in “Naubu kihong ta hi”, cih a kam pan hongg pulak khia hi. Topa’n i thungetnate hongg dawngin 2021 December kha-in nau ka paii a, 2022 August 5 ni in Topa’n tanu Mang It Nuam @ It Nuam hongg pia hi. Topa’n minthangna khempeuh tang tahẹn.

A tawpna ah ko bang dan, nau nei hak a om sanggamte aw, “lungkia kei un”. Leitung lam pan lametna teng a bei teh, Topa’n na hong sem hi. Ko zong kum 5 sung bang thungen, leitung lam pan lungkim nang’n zato mun tampi na kilak hi ung. Topa’n mimal kim tungah damna kisamte, damna hong pia hen la, nau nei nailote lưngkia loin thu ngen ni. Topa’n a hun a cin teh, hong pia ding hi. Lung dam. Mimal kim Topa’n thu pha hong pia kimciat tahen. Amen.