ZBC a phut khia Tualsuak Sangmang Rev. S.T. Hau Go

Zomite ading a thupi mahmah kipawlna ahi Zomi Baptist Convention hong phuatkhiatsak pen S.T. Hau Go hi. Amah pen Kawlgam Zomi sung pan Master ngah masa pen le US ah sangkah masa pen hi kha ding hi. A pil bek hi loin Zomite le khamtung a vei ngiat ahih lam zong ama nuntakna en leng, kimu thei hi. Za le mun, le huahna nusia-in Zomite ading a kipia khia masa pen Tualsuak Sangmang (Native Missionary) khat ahi hi. Tua manin Sangmang Hau Go zong kici hi. Amah pen Khamtung khanlawhna makai Rev. Hau Lian Kham’ pano zong ahi hi.

S.T. Hau Go pen 1920 October 30 ni-in, a pa Tual Hang le a nu Awn Niang te sungpan Lailui khau ah suak hi. Pianpih unau numei 1, pasal 4 lak pan a neu pen ahi hi. Tonzang, Tedim, Falam sangte ah tan 9 dong kahin tan 10 pen Sagaing ah kahin 1938 kumin zo hi. Yangon Judson college ah Philosophy le Psycolody kigawm kum 4 sung a kah khit ciangin Japan gal tung ahih manin zom thei lo-in 1942 in Western Chin Levy ah panmun tuamtuam ah sem hi. Tua panin Madras Christian College ah a sangkah zomin 1946 in BA honors tawh man hi.

A sang man ciangin, Kawlgam mualtunggam (Chin Hills, Kachin Hills, le Federated Shan States) tawh kisai zum (Frontier  Area Service) ah sem dingin Mikang uliante’n a kut hangin Pasian’ na sem nuam zaw ahih manin sang lo hi. Tedim Sangmang Rev. Nelson le Johnson tawh sem khawmin amah in Falam gam teng tavuan la-in Pasian thugenin zin kawikawi hi.

Yangon a, Burma Baptist Convention ah sem dingin zong a kikut hangin ka mi ka sate lak mahah sem nuam ing, ci ngiat a kipia khiatna thupi sa lua-in, Cope Tonu in ama aituam sum panin $600 kum simin Hau Go ading piakhia kamciam pah hi. Khamtung a ding Ordination ngah masa pen Sia Vial Nang mahmah in zong thupi a sakna le a lungdamna kitui luang kawmsa-in gen hi, ci-in Hau Go tangthu laibu sungah kiciamteh hi.

1948 ciangin US ah Master of Religious Education kum 2 va kahin 1950 in hong ciah kik hi. Yangon ah American Baptist Mission zum makai Rev. Sowards kikupna panin kipawlna lianpi khat neih masak ding cih gelna a neih mah bangin 1952 pan Zogam teng zin kawikawi-in Tedim Baptist Association, Falam B.A, le Haka B.A te phuanpih masa hi. 1953 kum Khuasak Sivuai panin hih kipawlna 3 tawh Zomi Baptist Convention na phut khia hi. ZBC pen Zomite adingin i minam min a kikipsakna lah hi, biakna lam ah kipawlna lianpen lah ahi hi. Chin Baptist Convention in a min kilaih hangin, Zomite’ phutsa, zunsa mah ahi hi. Hih kipawlna hangin nasepna tampi tangzai-in Kumpi lam pan zong Khristiante nopneh lo zawdeuh tuam hi. CCOC cihte ZBC mah ii sepkhiatna ahi hi.  Chin tawh a kilaih hangin tuni dongmah kipawlna lianpen khatin Chin State ah ding lai hi.

Dam lohna hangin Khamtungah om ding lem lo ahih manin Madalay ah omin, tua kawmin X’ristian Labu adingin la tei kawm, Maladay College ah sia sem kawm, cih bangin nungta hi. Laisiantho tei ding a lunggulh a hih mahbangin tua dingin Yangon ah Mikang lai sin behin Master digri la kik hi. A cidamna hoih lo tetekin a tawpna ah a pumbupin zaw cipin a khuak bek hoih lai hi. Kum tampi sung tua bangin nungta in 1993 kumin Van a Pa kiang hong ciahsan hi.

A nuntak sungin a dam hun a tawm mahmah hangin tua hun tomno sungin ZBC (1953) kipat pihin, Zo Education Board (1946-48, le 1951-56 ah makai sem hi. Zomi Baptist Bible School (Tu’n ah Zomi Baptist College, Falam) kipat cil laiin zong siapi principal kum tampi sem hi. La dawng 504 kihel X’ristian Labu a cih 1987 kumin hawmkhia zo hi. Khangthakte ading a etteh huai mahmah Zomite’ mipil masa penpen khat ahi hi.