Gimna Lianpi Hun Masa: Kum 3 ½         

  (The First Half of the Tribulation Period: 3 ½ Year)

Laigelh: Rev. Zam Sian Khai, Ph. D.

Rapture Khit Thupiang Dingte: Rapture ah misiangthote a kilaktoh khit ciangin nalamdang tampi hong piang to pah denden ding hi. Misiangthote om nawnlo ding ahih manin Khasiangtho nasepna zong kiciangtan mahmah ta ding hi. Pawlpi tungtawn in Kha Siangtho nasepna om nawnlo ding hi. Migilopa hong lang ta ding hi (II Thes 2:3, 7-8). Tua hangin siatna, gitlohna, bawlsiatna, kikhemna tampi om semsem ding hi. America gam sung thuummi tampi rapture ah paikhin ding ahih manin America gam sung buai in kisia in thazawm gawp ding hi. America gam in Israel hu zo nawnlo ding ahih manin, Russia leh Arab gamte kipawl in Israel hong do ding uhi (Ezekiel 38-39). Israel a kisuksiat ma in Pasian in tua galte susia maimang ding hi. Pasian in zinling sak ding hi (Ezk 38:19-20); Israel ado galte amau le amau kileh do in kithat (Ezk 38:21) ding uh hi. Misi aluang tamlua ding ahih manin pulnatna (Ezk 38:22) omin guahciin in keekkia ding hi. Kaat le meikuang in galte tampi that ding hi (Ezk 38:22; 39:6). Misiluang phum hun kha sagih sawt ding a, galvante suksiat hun kum sagih sawt ding hi (Ezk 39:11). Pasian in Israel galte a suksiatna hangin leitung bup in Pasian vangliatna mu in mi tampi in a nungta Pasian Israel Topa thei in kikhel ding uhi (Ezk 38:23, 39:7; 39:21-22). Israel in Pasian vangliatna hong phawkthak ding uh hi (Ezk 39:28-29).

-AntiKhazih: Pasian in Israel a do a galte a susia khit ciangin Russia le Arab gamte thanem khin ding a, Anti-khazih hong dawkkhia in thuneihna hong kipan ding hi. Leitung bup gamkhat kiukna (one world government) hong kipan in Anti-khazih in kumpi hong sem ding hi. Antikhazih in Israel tawh kum sagih kilemna hong bawl ding hi (Dan 9:27). Muslim gamte thanem gai ding ahih manin Israel in biakinnpi hong lam ding a, gangawh biakpiakna hong kipan kik ding hi. Antikhazih in Israel tawh kilemna hong bawl ciangin gimna lianpi kipatna lam hi ding hi. Antikhazih in Jewte bawlsia ding khat hi ding a, Jew mi sungpan hi lo ding hi (Mang 13:1; 17:15). Israel tawh kilemna bawl ding ahih manin Muslim gam pan hilo ding hi. Gentile mi hi ding a, hong ding kik Rom Empire kumpi hong hi ding hi (Dan 2:7). Kii neu khat (antikhazih) a kilang lo in hong kipan in hong thahat semsem in a omsa kii thumte (kumpi thum) hong suankhia ding hi. Hong dingkik Rom Empire hong uk in gimna lianpi laizang pawl in thahat mahmah ding hi. Israel tawh (a kineihkhem) kum 7 kiciamna hong palsat (Dan 9:27; Is 28:18) khit ciangin a nunung gimna lianpi (kum 3 ½)  hong kipan in suksia semsem ding hi. Antikhazih le numbat 666 thu mai lai hawmkik ciangin a kician zaw in zom beh ni.

Israel Gam le A Biakinnpi:  Hun nunung thupiang dingte hong tangtunna dingin a kisam masa pawlkhat om hi. Gangawh Biakpiakna kibawl kik theihna dingin Biakinnpi hong ding kik ding kisam hi. Biakinnpi hong ding kikna dingin Jew mite hong kituah kik ding kisam hi. Hong kituah kik theihna dingin a mun gam kisam hi. Ezekiel 36:10, 24 ah Pasian in gam tuamtuamte panin na gam uh ah kong kaituah ding a, na khuapite uh dimtak in kong pungsak ding hi, ci in na kamciam hi. May 14, 1948 in Israel in suahtakna ngah in a suakta gam khat in hong ding thei hi. Israel thupi takin thupha pia in neekledawn kicingin thupha pia ding cihna kamciam Ezekeil 36:30 ah kigelh hi. Antikhazih tawh kilemna bawlna dingin  gam khat in din kul in tua tangtung khin zo hi. Judah Biakinnpi lamkik dingin hong nungzuih ding hi (Matt 24:15-16; II Thes 2:4). AD 70 kum in Titus le Rom galkapte in Jerusalem Khuapi leh Biakinnpi susia in Israel gam le Judah biakpiakna ngeina teng kisia khin hi. 1948 pan in Israel gam hong suakthak kik in hong kipan kik thei ahi hi.

-Gimna Lianpi: Gimna Lianpi ngimna in Pasian umlote (Judah & Gentelte) thuhilhna le thukhenna ding ahi hi. Leitung ah Pasian’ hehna kibua in gimna tampi piang ding a, pawlkhat a dingin lungsim nemna le kisikkik in Pasian kiang zuatna hi ding hi. A dang pawlkhat a dingin lungsim khauh semsemna hi zaw ding hi (Dan 9:24). Gimna Lianpi hun sungin hong tung ding gimna in nasia mahmah ding hi. Leitung piancil pan akipan a omngei nailo gimna hong tung ding ahih manin Pasian in a teel mite a khualna in khiamlo ding hi leh, kuamah suakta zo lo ding hi ci-in Matt 24:21-22 ah kigelh hi. I Thes 5:3  ah “Mite in, “Thu khempeuh a hoih laitak hi a, bangmah patauh nading om lo hi,” a cih laitakin thakhatthu-in amaute tungah siatna hong tungvat ding hi. Nausuah natna bangin gimna thuak ding uh a, kuamah suakta 8lo ding uh hi” ci-in gimna lianpi sung  a lauhuaizia ding kigen hi. Topa Ni (the day of the Lord) zong kici hi. Israel tungah thuhilhna le Pasian langpangte tungah thukhenna hun hi ding hi. Gimna Lianpi kipat hun a kipan in thusia nam tampi hong kipan in hong suksia semsem ding hi. 1. Kei ‘khazih’ hi ing,’ akici khem mi tampi om ding (Matt 24:5) 2. Gal kidona tam mahmah ding (Matt 24:6-7) 3. Mun tuamtuam ah kialtunna om ding 4. Natna gilo tuamtuam nasia mahmah ding (Matt 24:7) 5. Zinlinna (Matt 24:7) 6. Upna hangin kibawlsiatna le kithahna tam mahmah ding (24:9) 7.Kitot-kiselna, kikhemna le kimuhdahna khang semsem ding (24:10) 8. Thumanlo kamsang tuamtuamte’ khemna tam ding (24:11), 9. Ki-itna kiam suk semsem ding (24:12) 10. Leitungbup lungdamna thu teci panna le tangkona (24:14) om dingin mi tampi kisik in Jesuh Khazih kiang zuan ding uh hi.

Ciaptehna Sagih Thukhennate (The seven seals judgments): Ciaptehnate khat khit khat kilakna John in mangmu hi (Mang Alian 6) 1. Ciaptehna khatna ah sakol kang tuangpa Antikhazih in galdo in leitung bup ukcip dingin kithawi in om kimu hi (vv.1-2). 2. Ciaptehna nihna ah sakol ausan tuangpa in namsau lian khat atawi kimu in leitung galkido ding limlak hi (vv. 3-4).3.Ciaptehna thumna ah sakol vom tuangpa in tawitehna tawi in kialtunna ding limlak hi (vv5-6) 4. Ciaptehna lina ah sakol puang tuangpa’ min in ‘Sihna’ hi in a nungah ‘Hell’ in zui hi. Leitung bup ¼ thahtheihna thu kipia hi (vv.7-8). 5. Ciaptehna ngana ah Pasian kammal le upna hangin thahna thuakte kilak hi (vv.9-11; Matt 24:9-10). 6. Ciaptehna gukna ah nakpi zinliinna, puanvom bang a vom ni, sisan bang san kha, aksite kia, vanpi kizial tum in mualte beitum mang uh cih kimu hi. Kumpi miliante le mineu tampite in mualte le suang lianpite kiangah ‘Kote hong vuk un, tokhom tunga tu Tuuno hehna pan hong dal un’ ci-in kikona om hi (vv. 12-16). Mualte le suangte tungah a kiko uh hangin hon zolo ding a, Jesuh Khazih Suangpi bek in hon zo ding hi. Hihte in gimna kipat cilna hi in a khauhpai zaw tampi kizom to lai ding hi (Matt 24:8).

–144, 000 Jew Evangelists: “Pasian’ ciaptehna tawh a taltang uhah a kiciamteh mi a vekpi-in 144,000 pha hi” (Mang 7:4). Pasian ciapteh evangelist 144, 000 te in gimna lianpi hun sungin Pasian in a tuam vilvel in lauhuaina pan keem in lungdamna thu tangko ding uh hi. Amau thugenna hangin minam tuamtuam le paunam tuamtuam mihon tampite in vangtung tung ding uhi (Mang 7:9-17).

Ciaptehna sagihna le Pengkul sagih thukhennate: Ciaptehna sagihna sungah pengkul sagih thukhenate kihel hi (Mang 8). Pengkul #1 a kitum ciangin  gialpi le mei, sisan tawh kihelin leitungah a kiasukin Leitung  le 1/3 lopa hing 1/3  kangtum hi (Mang 8:7). Pengkul #2  kitum ciangin a kuang zuazua mual lianpi abang khat tuipi sungah kilawnsuk hi. Tuipi 1/3 sisan suak, tuipi ganhingte 1/3 si in teembaw 1/3 kisia hi (Mang 8:8-9). Pengkul #3 kitum ciangin aksi lian khat amsa in kiasukin gunte le tuinakte 1/3 tung tu in tua tui khasak ahih manin a dawn mi tampi si uh hi (Mang 8:10-11). Pengkul #4 kitum ciangin ni, kha le aksite in a tanna uh 1/3 kiam ahih manin leitung hong zing hi (Mang 8:12; Luke 21:25-26). Pengkul #5 a ging ciangin a gilo mahmah dawi tampi taw-neilo kuahawm panin hong pusuak khia in kha 5 sung mihingte bawlsia gawp hi. A taltang uhah Pasian’ ciaptehna a om lo mite bek a gimsak nadingun thu kipia hi. Mite in mawhna a kisik uh sangin sinuam zaw uh hi; ahih hangin sithei tuanlo uh hi (Mang 9:1-12). Pengkul #6 kitum ciangin million 200 a pha galkapte in leitung mi 1/3 that uhi (Mang 9:16). A kipulaksa Sakol puang in mihing 1/3 that khin a, tun 1/3 kithat leh, leitung mi a om lai 1/3 bek hi ding hi. A silo mihingte in a mawhna uh kisiak tuanlo in milim le dawi bia in veve uhi (Mang 9:20). Kiim le pam, tunglam le nuailam pan in hehna kikhahkhia ziahziah ahih manin thuakhaksa mahmah ding hi. A tawpna le a sagihna pengkul kitum (Mang 10:7; 16:1-21) ciangin a luahuai zaw lai hehna hai sagihte buaksukna hun hi ta hi.

Pasian Kamsang Teci Nihte: Pasian Teci Nihte in ni 1, 260 (kum 3 ½) sung kamsan-thugenna nei ding hi. Pasian in vangliatna pia-in a bawlsia a om leh a mau kam panin meikuang tawh kanglumsak thei ding uh hi (Mang 11:3-6). Nalamdang a bawl dingte uh tawh a ki-etkaak ciangin, Moses le Elijah hi dingin ki-ummawh hi. Hi takpi thei, hi takpi lo thei ding hi. Tecipan nasep a man uh ciangin “kuahawm thukpi sung panin a hong paikhia ganhing in tua teci pangte simin zogawpin that ding” hi (Mang 11:7). Ni thum le alang (ni 3 ½) sung Jerusalem kongzingpi ah mi khempeuh in a luanghawm a et khit ciangin Pasian in thosak kikin vangtung ah thakhat in la to ding hi. Zinlingin mi tul tampi that ding a, mi khempeuh lauthawng in Pasian minphat ding uh hi (Mang 11:7-13).

Satan van pan kihawlkhia: Michael le ama vantungmite in Gulpi le ama vantungmite a do uh hi” (12:7). Gulpi (Dawimangpa le Satan kici pa, 12:9) pawlte in lel ahih manin gulpi vantung pan kilawm khia hi (12:8). Nakpit awging vantungah kiza a, “Tu-in Pasian in hong honkhia khinta a,… a sun a zanin eite’ Pasian’ mai-ah dingin i sanggamte a zahko tawntungpa, tu-in vantung panin kilawnkhia khinta hi” ci hi (12:10). Thuummite in “Tuuno sisan le thuman a genna uh tawh amah na zo uh a, a nuntakna nangawn uh na pia ngam uh hi” (12:11). Dawimangpa  in “hun tomno bek neilai ahihlam a kitheih manin leitung le tui tungah a omte a dingin lauhuai mahmah ding hi” (12:12) cih  awngaih mahmah vangtung ah kiza hi. Satan in ni 1260 (a nunung gimna kum 3 ½) bek nei lai ahih manin thuumte nakpi in bawlsia ding hi. A nunung kum 3 ½ sungin gimna lianpi hong thuakhak semsem ding hi. Thuumte in cilesa bawlsiatna a thuak hangin Satan in a kha uh susia zo hetlo hi. Ahangin Tuuno sisan le hangsan takin thuman teci a pan ngamna hangin Satan a zo khin uh ahi hi.                                     Ganhing liamna le Thawhkikna: Tuipi sung pan hong pusuak kii sawm le lutang sagih nei  ganhing in hong si in hong thokik pah hi (Mang 13:1-3, 15). Santan in thokiksak hi dingin upmawhna om hi. Leitung bup in a thawh kik vatna lamdangsa lua uh ahih manin a nung zong zui ngeeingai in hong bia uh hi. Hih ganhing in Pasian samsia in  misiangthote sim gawpin a zawh ding kiphal hi. Mi khempeuh tungah thunei in mi khempeuh in bia uh hi. Hih Antikhazih a bialote kithat ding hi. Ganhing numbat 666 ciaptehna a tal ahih kei a, a taklam khut tung ah a suanglote in vanlei le vanzuak bawl thei lo ding hi. Antikhazih in leitung bupah thuneihna tawh mun hong lakkhit ciangin Gimna masa hun sungin mipi deih mahmah amanlo biakpiakna amah in hong susia ding hi (Mang 13:8, 15). A nunung leitung biakpiakna in Antikhazih Bek Biakpiakna hi ding hi. Antikhazih in Israel tawh kiciamna hong palsat hun panin a nunung gimna lianpi (Dan 9:24-27) hong kipan ding hi.                                            Gimna Lianpi hun sung bangzah in lauhuai in thuakhak ding hiam, cih kigelh khin zolo ding hi. Jesuh pen ama Topa le Tanpa in a sanglote in hih hun sung nawkkha ding hi. Hih hun sungah Jesuh santheihna hunpha bel om veve ding hi. Ahi zongin thuumte nuntakzia haksa penpen hun hi ding hi. A upna a dinpih ngam hangin sihna thuak mi tampi om ding hi. Upna hangin cilesa supngam hun hi ding hi. Hih hun haksak le gimna lianpi nawkkhak lohna dingin Jesuh na Honpa leh na Tanpa in sang pak in. Jesuh hong pai ding kongbiang dong hong naita hi. Mi khat in hih leitung ah haksa-genthei thuakin a kha in hell tunlawh leh, bang phattuamna om ding hiam? Hih leitung ah nuamsa kisa pianin i kha in hell tung leh, bang phattuamna om ding ahiam? Jesuh in “… ‘Topa aw, Topa aw,’ hongci khempeuhte Vangtung Gam sungah tum thei kim lo ding uh hi. Vangtungah a om ka Pa’ deih bang a gamtate bek a tung ding uh hi” (Matt 7:21-23) ci hi. Kam tawh Pasian biabia in, kha in bubu in Jesuh tungah kilak khia in mawhmaina na nget kei leh, “Mi khempueh a mawh khin uha, Pasian maipha ngahna ding kisia khin zo hi” (Rom 3:23) ci hi. Mawhnei vive hitek i hih manin Jesuh’ vanglian sisan suang loin Pasian maipha kimu zolo ding hi. Jesuh in ama sisan tawh singlamteh tungah biakpiakna hong piaksak khinsa sang ziau lel in. “Topa, mawhnei mi ka hi hi. Ka mawhna hong maisak in, hong sawpsiang sak in. Topa Jesuh ka lungsung ah hong lutin hong teeng in. Ka nuntakna hong uk in. Ka pumpi in Jesuh min tawh kong ki-ap hi” ci in thungen in. Na lungsim takpi tawh na nget ahih leh, Topa in na mawhna hong maisak pah ding hi. Tua hi leh, Topa tawh kilemna na ngah thei ding hi. Pasian’ kilemna le lungdaihna thupha laisim ulenaute tungah hong tung ciat ta hen!

Ekkaak Laibute

(Mun kicin loh manin laibu tampi kilak theilo hi)

Aland, Kurt and Bruce M. Metzger. (1983) .The Greek New Testament. Stuttgart, Germany: German Bible Society.

Barton, B., Comfort, P., Osborne, G., Taylor, L. K., & Veerman, D. (2001). Life Application New Testament Commentary . Wheaton, IL: Tyndale.

Beale, Gregory K. The Book of Revelation: A Commentary on the Greek Text. (1999).Grand Rapids, MI: William B. Eerdmans Publishing Co.

Couch, Mal, ed. (2001). A Bible Handbook to Revelation. Grand Rapids, MI: Kregel Publications.

MacArthur, J., & Mayhue, R. (Eds.). (2017). Biblical Doctrine: A Systematic Summary of Bible Truth . Wheaton, IL: Crossway.

Johnson, Alan F. Revelation: The Expositor’s Bible Commentary. (1966). Grand Rapids, MI: Zondervan Publishing House.