Kei ka min Cing San Lun( Lunnu) hi a, Rev. Kai Go Mang le Nu Ning Ngaih Mangte sung panin ka piang hi. Tu laitakin ka pasal tawh Pasian in tapa khat hong pia ỉn Nashville ah ka teeng laitak uh ahi hi. Hih Agape media ah Tetti pan theih nadingin hunpha ka ngah manin ka lungdam mahmah hi.

Kei pen ka neutung a kipanin Khristian biakna sung nuam a sa innkuan panin a khangkhia  mikhat ka hi.  Tua bang mahin kei mahmah inzong biakna sung nuam ka sa mahmah hi. Biakinn a kikhop biakpiakna, Sunday school kahna, pawlpi nasepna cihte ka pelh ngei hetkei a, ka lawp mahmah den hi.

Neutung a kipanin khamtheih guihtheihte zong ka zang kei a, tua bangteng ka nuntakna in keilekei a piangthak ka kisa kha hi. Ahi zongin khamuanna taktak ka neih loh lam, bangin hong langsak hiam cih leh, mihing ihih manin khat veivei nulepa thusawlna khawng ka manpak loh ciang ahih keileh sangkahna ah lawmte khatpeuh tawh kam ka nial khak ciangin, tua bang hun laitak laktohna om leh, van gam ka tung ngap kei a, ngaihsun kha leng ka kha lau-in ka dip bang kua liang hi. Tua a kipanin a piangthak taktak nai lo ka hih lam ka kitel hi.

2001 in Tuilangh Khua a Sia Vungh Kap pen ko khua ah Camp bawl dingin kicial hi. Tua sung pan mawhna le hotkhiatna thu ka tel a, khamuanna taktak ka ngah hi. Tua ni a kipanin tuni dong vangam ka tung tam, ka tung kei tam, cih tawh kha launa khat vei beek ka nei nawnkei hi.

I pianthak taktak kei leh i gamtat hoih laitak vangam i tung zel a, i hoih den zawh loh laitak ei le ei hell i kidenna zel hi. Tua ahih manin kei bang mahin a lau thei lai i om leh, kitelna nei nailo na hi a, hoihtakin thungetna tawh ahi zong, thungaihna tawh ahi zong Kha Siangtho huhna ngen inla ki-ap in, cih kong hanthawn nuam hi. Banghang hiam cih leh, i nuntakna banghun ah bei ding i genkhol thei kei hi. Tua ahih manin sun kal zan kal i nuntakna bei leh i paina ding tel takin i theih ding thupi penpen hi.

Pasian bawlsa khempeuh lakah ei mihingte pen i sih ciangin nuntakna taktak a kipanpan ding ihi hi. I mai ah nuntak tawntungna mun nih in hong ngak hi. Hell ah zong sihna om lo hi. Laisiangtho in than zong a sih lohna ci hi (MK.9:48). A ngek mahmah than zong si lo ahih leh, ei mihingte kisi hetlo ding hi. A gennopna in sihna om nawnlo tawntung kahna le ha gawina tawh kidim ding hi. Hell i tung phet kisi pah hen la, kikang tum pah hi leh, i pianthak loh hang tawmvei thuak pak theih lel hi. Ahi zongin tua mun ah kisi thei nawnlo ding hi mawk ahih manin, tua mun tawh i kipelh theih nadingin Pasian mah zon masakin nei ni maw.

Pasian in a tapa khat neih sun Jesuh tawh singlamteh tungpan eite hong zong khin a, tu in  en amah i zong kik ding hun hi ta hi (John3:14-16). Aman hong zong masak manin, amah zonh kik theihna hamphatna i ngah thei hi (Amos5:6). Na kha a ding na lungmuang nai hiam sanggam aw. Nuntak veve, hell ah nungta nuam zaw maw, a nuam mahmah van kham khuapi ah eite hong gumpa tawh nungta nuam zaw, cih tu laitakin ki sittel ding hihang.

Hih Tetti panna tungtawnin Pasian in khatlenih hong hopih ngiat ta hen, cih ka thungetna ahi hi.

Lungdam