• Nikhat i Topa Jesuh thuhilh in a vak kavilkawina, dawi hawlkhiatna, mittawte khuamusak in cinate a damsakna panin a khua (Caperanum) hong tung hi. Na lamdang a bawl ding, mu nuam ahizongin bang mawhna a bawl kha hiam, cih ahizongin bang kampau khialh a nei kha hiam, cih ahizongin a theinuam mawhna zong nuam mihon in ong nungzuih hi. Inn khat ah thugen dingin ong kipat ciangin mihonpi inn dimlet in khengakna ding zong om lo hi. Tua lai takin khutzaw khezaw mi damlo khat Topa Jesuh damsak ding deihin a lawmte 4 in ong zawng luailuai hi. Innsung ah kilut thei vetlo ahih manin alawm te’n innkhum dawn ah zawngto in innkhum vutlet in i Topa Jesuh omna mai ah khaisuk uh hi. Topa Jesuh in tua cinapa lawmte’ upna amuh ciangin tua cinapa kiangah “Lawm aw, na mawhnate hong kimaisak khinta hi,” ci-in damsak hi (Luke. 5:20).

Hih thupiang sung a gamtang actor mi 4 te dinmun ngaihsun in tuni in nang koi ah ding na hiam, cih na lungngai dih in.

1. Cinapa

Cinapa pen khutzaw khezaw ci hi. Khutzaw khezawte in ama adingin bangmah semthei vetlo a, midangte adingin zong hih theih khat zong nei lo hi. Kamvak kul hi. Midangte kep ding don ding ngak hi. Nang zong na ci adam hangin nang ading a, bangmah semthei lo, midangte adingin zong kimanna na neih kei leh, pumzaw khezawmah na hi lel hi.

Hih thupiang tawh kizom in natna dang khat tawh i zom ding hi. Natna nam khat pen Lungsim cinatna (mental sickness) ahi hi. Lungsim cina cih ciangin lungsim man lo, hainat, lungkham sinkhamna thuak cihte i ci kei-a, lungsim hoih lo, hoihsak nei ngei lo, mi elna, hatzatna lungsim puaden, mi mawhna bekbek zongin midangte thupi sa thei lo ngiatte a ci nuam ihi hi. Tuhun in tuabang mi kimkhat ki-om citciat hi. Tua ahih manin tuni in tuabang lungsim na paai leh, khutlekhe zawpa banga a cina na hi-a, Jesuh kiang na zuat ding a kisam na hi hi. Rev. Tuan Suan Mung lasak “Lungsim thak hong pia aw Topa, Kha Siangtho ka lungsung hong guan in” ci-a la sak ding a kisam na hi hi.

2. Mihonte

Mihon lakah Topa Jesuh na lamdang bawl a mu nuam, a thugente a zahpih wayphan nuam, mawhna zong nuam tampi om hi. Innsung dim mitmet ahih manin cinapa ong pai ciangin kuamah a awnnuam om ngiatlo uh hi. Midangte khual loin amau angsung bek a khual (egostics) vivete ahi uh hi. Na innsung, na vengsung, na pawlpisung, na khuasung, na gamsung ah midangte noptuam nading, cidam nading awlmawh lo, lam a awn nuam lo pa na hi kha hiam? Pawlpi siate’ thuhilh, siate’ thugen peuh, a kiu khat pan a el koko lel peuh a, a mawhna zongzong peuh na hi kha hiam?

3. Mi 4 te

Hih mi 4 te mi hehpihna lungsim in ei Tapidawte lungpuak ding ong hilh hi. Cinapa uih mai ding hi. Kih lo uh hi. Lungtom thei laimai ding hi. Thuak keeikaai uh hi. A dam ding deihsak ngiat uh hi. Daipih ngam uh hi. Hih mi 4 te upna in a lawmpa uh damsak ahih ciangin nang upna hangin midangte in kha cidamna le pumpi cidamna ngah thei, cih phawk gige in.

4. Inn neipa

Tapidawte’n phalna lungsim i neih ding ong hilh hi. Inn tung vutrang di ahih ciangin Judah te innlam dan ih mitkha in ihbawl the hi. Cement concrete tawh a zang dide a kisung hi ding hi. Ei Zo innte hi leh silkkaang, ahih keileh suangsan hi ding a, a kikal khaang gawp ding ahih manin innsia suak ding hi. Inn nei pa’n phal hi. Midang khat peuh phattuam nading, dam nading in na inn ong kibalkham ding hi leh, na phalding hiam?

5. A lawmte upna hanga damna hotkhiatna ngah.

Ulenaute hih Lai Siangtho sunga actors zatlaih 4 te nuntak khuasakzia en in, ei dinmun lungngai-in hoih i sak a om leh, zat ding hanciam pahin, hoih lo i sakte peel pah lehang ci-in i theih sasa, zak sasa thute tungtawnin kong phawkkik sak hi. A lawmte’ upa hanga damna hotkhiatna ngah hi.

(23rd April, 2022 Tedim Baptist Convention,  Child Protection and Child Rights morning devotion ah hunzatna ahi hi.)