Pianthankna I gam sung hong tun’ pan kipan in piangthak pawl in I veipi pen bang hiam cih leh, Mate 28:18-19 sung a mi khempeuh nungzui hoih suahsak ding ahi hi. Tua tawh kizui- in I mai a I tuah peuppeuh, “Na Piang thak nai hia” ci-in I dong pahpah hi. Hih bang a nasepna pen thupi mahmah hi. Tuabang na sepna hangin mi tampi in Pasian hong theih lawh hi. Ahih hang in tua nasepna pen sawlna lianpi gen kimkhat bek hi pan hi. Sawlna lianpi in mi khempeuh Pasian theisak ding bek hi lo -in nungzui hoih suahsak ding ahi hi. Tun hun teh piangthak lo I om kei a nungzui hoih tawm mahmah in ka mu hi. Inn kikhop, thunget kikhop, tentan (seminar), antanh thunget, mualtung thunget cih I tam zat mahmah a lungdam huai ka sa mahmah hi.

Ahi zongin a langlam pan en leng, ei Pasian thuzui teng mah in sum ngah nang hi peuh leh, zuau a hi zong, kumpi deih lo van ahi zong, Pasian min paulamin sumzonna tuamtuam, sponsor ngah nang peuh tawh pawlpi phuan, nu le pa mawhna lah uang semsem, nupa kikhen lah phamawh sa lo phial zong I tam ta. Kuamah a peng I om tuan kei hi. Pawlkhat bang khami tektek innkuan sung buai tektek zong I om man khasiat huai sa ing. Tua ahih man nungzui hoih I cih bang tawh teh ding I hiam? Kal khat khat vei antangna maw? Kamtuampau man maw? Sumpi piak hat man maw? Ni khat nai bangzah thunget cih maw? Nungzui hoih I cih pen a tunga I gente tawh kiteh loin nisim na nuntakna ah Jesu bang cih nuntak pih na hiam cih, hi zaw hi.

Tua ahih leh Pasian kammal bang cih nuntak pih I hia? Jesu hong pai baih ding cih bek tawh mi tampi tungah Pasian thu I gen a mi tampi in Pasian hong thei uh hi. Tua hi na pi’n a ban I zom nawnkei a nungzuihoih taktak I suaksak nawn kei hi. Banghang hiam cih leh biakinn bekah thu I gen a, sumbawlte, kumpi nasemte, sangnaupangte kiang bang mah I sem nawnkei hi. Siate mahmah in zong mipite Pasian thugenzia, nungzui hoih suahsak na’ng cihte I pantah zo kei hi. Pawlpi mite’n zong I nasepna mun khat peupeuh ah Pasian thu I gen kei a i nuntak pih kei hi. Mimal phattuam na’ng ahih nak leh pumpi na ngawn sih ding lau lo, Pasian lah lau lo, kumpi thukhunte lah lau loin I sem ngam mawk hi. Tua ahih man I gambup nungzui hoih suak thei lo hi. Tua ahih leh I gambup nungzui hoih a suak thei dia? Gupna thu in I gam sung vai hong khel zo tam? I gamsung khantoh na’ng le Pasian a ding in lamet a om dia? Hihte dawnna dingin Pasian thu in midangte’ gamte bang cih khel, cih tawm i en ding hi.

Tuma kum 1500 hunlai in Ireland gam pen milimbia gam, sila kawltang a zuak, a lei gam ahi hi. Khang khat sung bekin hih Ireland gam hong kikhelin gam hoih, Pasian nasem mi tampi, le mipil, misiam tampi hong pian khiatna gam hong suak hi. Laibu minthang mahmah ahi “How the Irish Saved Civilization” in a genna ah Ireland gam kikhelna pen mimal khat nasepna tam pen hi, ci hi. Patrick in kum 30 sung Pasian na Ireland gam ah sem a, pawlpi 700 le Pasian nasem 3000 nungzui suaksak hi. Tua bek hi loin Ireland kumpi vaihawmzia hoihtak panpih ahih manin kumpi thukhun (Constitution) te a hoih lamin va huh a, sal/sila (slavery) sumbawlna Ireland kumpi in hong bei sak hi.

William Wilberforce pen kum 21 a phakin mipi palai sem dingin parliamen ah nih vei kitel hi. William in hi bangin gen, “kasep ding naseppi (mission) maan nih bek ka nei hi. Tuate in salte/silate (slavery) suakta sak ding le mite gamtat hoih na’ng (moral) ahi hi” ci hi. William kum 40 tawntung salte’ suahtak na’ng, thukhun (law) le ngeina hoihlote khel na’ng tawlnga loin sem hi. 1833 July 26, William sihma ni 3 ni in England kumpi in slate suahtakna pia uh hi. Hih bang na sepna pen Pasian nungzui hoih khat I nasep ahi hi. Pasian le gam -le- mi a ding nasem nuamte Pastor suah sese kisam lo ahih lam hong phawk sak hi.

1768 kum in Scotland a pastor a sem John Witherspoon in pastor sepna pan tawpin New World ah pilna hong sin hi. Pastor a tawp hangin a upna le Pasian nasepna tawpsan hi lo hi. Biakinn ah pastor sepna pan pilna lam tawh Pasian nasem cihna hi zaw hi. Asawt loin US gam, New Jersey sangah sang siapi hong sem hi. Tua sang panin Pasian nasem tampi tak hong piangkhia bek tham loin tua sang panin USA te kumpi khat, Vice-President khat, U Lian mahmah 10, 21 Senator, 39 congressman, thukhenmang 1, USA independent bawlciang a lasa siam mi 5 ah khat, USA te gamsung thukhenpi vai hawmte mi 6 ah khat tua sang pan hong piangkhia hi. Hih mipa John Witherspoon pen USA mi te’n, “America vaihawmpite ii siapipa” ci in ciamteh uh hi. Kammal dangin ci leng, USA makai tampi nungzui hoih a suaksak pa ahi hi.

Kum 2021 pan Kawlgam ah ukna buluh hangin mipi’ neihsa inn le lo kihaltum, suahtakna teng thautawi te’n beisak, gambup ah sihna le kahna bek tawh kidimin om hi. Pulpit tung, biakinn sung teng bek a thugen tawh kicingsak lai ding maw? I gamsung a kihhuai thute, thuman lopi a kibawlsiate, zawngkhal daipam meigong cimawhte, anduh dangtaak cimawhte, pilna le siamna deih na pi’n sang kah zo lote a ding bang I sem a? Sum-le-pai, le inn-le-lo nei lote, thuman lopi a bawlsiatna thuakte pawlpi in bang cih I huh hiam? Antang thunget, veng kikhop, sumpi piak cihte bek I thupisak kha a gamsung le mi cimawh zawngkhalte I mangngilh kha hi. I pawlpi, I khua sung bek hi lo, I gamsung bup nungzui hoih suahsak ding Pasian deihna ahi hi. Hih nasep pen Pasian um ing, a ci takpi mi khempeuh I nasep ahi hi, cih Laisiangtho ah tel takin I mu hi. Tua ahih man tu ni pan ki pan nang bang sem ding na hiam? Lunggim a si le zu-le-zatui hoih lo tawh a si nisim kibehlap den ahih leh Pawlpite’n en hithiat lai ding I hi hiam?

Flight Lieutenant Rev. Suan Muan Thang, MA,  MSW, D.Min, PhD

Counsellor/ Lecturer

Chairman of Global Alliance for Myanmar

(Kha lam, Human Rights le Peace tawh kisai a nasepnate hangin Australia kumpi in “The Legend Award”  tawh pahtawina pia uh hi.)